الموضوع: اضافه تضاعف عمر الزيت 3 مرات

السلام عليكم يا شباب اولا بشكر كل شخص ساهم بمعلومه مفيده وادعيله ربنا يجعله فى ميزان حسناته
ثانيا انا من الناس المتابعين للمنتدى من بعيد لبعيد يعنى مشاركاتى قليله جدا لكن إن شاء الله المره دى اتمنى افيدكم بتجربتى
انا معايا هيونداى فيرنا 2007 وطبعا زى اى واحد نفسى تكون احسن عربيه فى الدنيا ولانى موسوس شويه بحب افهم كل حاجه فى العربيه واعمل كل حاجه تحافظ على جودة الاداء وتطول عمر العربيه بدون مشاكل وده يمكن لانى كان معايا زمان سيات 133 وللى ما يعرفش السيات دى ارخص واسوأ عربيه فى مصر وتوريك الويل والنجوم فى عز الظهر بالبلدى تعلمك الادب وتلففك على كل ميكانيكيه مصر على امل انها ترجع عربيه تانى وبرضه مفيش فايده وبعد كده جبت سوبارو 82 وبصراحه عرفت معنى انك تاخد عربيه يابانى وفايده انك تاخد العربيه من واحد كان بيحافظ عليها العربيه فعلا كانت تحفه ومن هنا تبدأ قصتنا
اول ما أخدت السوبارو من صاحبى واللى على فكره كان مهندس ميكانيكا سيارات فى رياسه الجمهوريه فى الوقت ده حبيت اغير زيت واعملها صيانه ولما نزلنا الزيت لقيت حاجه غريبه الزيت لسه بحالته زى ما يكون جديد والمفاجأه انه كان عامل 8 الاف بزيت من بتاع الالف ونص قلت يمكن عشان العربيه يابانى بالكامل وموتورها ممتاز لكن صاحبى المهندس قاللى على نوع من الاضافات بيتحط على الزيت بيحافظ على لزوجته ل 3 اضعاف المعدل العادى وبيمنع الاحتكاك وكده بصراحه طنشت وكبرت دماغى لكن بعد ما جركن الزيت بقى ب 100 جنيه افتكرت الموضوع ده ولما سألته (صاحبى المهندس) عن الاضافه اللى كان بيستعملها عرفت انها كانت عينات من شركه اضافات ومكانها فى مصر الجديده وكانت بترحلهم الرياسه من قبيل المجاملات والعلاقات العامه وبدأت ادور على الشركه دى لغايه ما وصلتلها فى مجاهل مصر الجديده فى كليه البنات واللى لقيته عندهم ما كنتش مصدق انى فى حاجه زى كده فى مصر .
الحلقه التانيه:-
بعد ما وصلت الشركه لاحظت انهم مبدئيا منتجاتهم موجهه للقطاع الصناعى ومش الافراد وقلتلهم انا جى من طرف المهندس فلان عشان زيت اسمه اوميجا بيتحط على زيت موتور العربيه بعد شويه قابلنى شاب محترم جدا اسمه المهندس تامر عبد الحميد ممثل مبيعات وبعد التعارف التقليدى وتبادل الكروت وجهت نظره انى ممثل للمنتدى واننا ممكن نتعامل معاهم لو ثبت ان منتجهم مفيد فعلا (عرضتها اوى مش كده؟) الخلاصه لان الموضوع طويل جدا والمنتجات كتيير جدا اللى شد انتباهى كان 5 حاجات
1 زيت اوميجا وده عباره عن زيت بيضاف بنسبه 1:20 لزيت الموتور بيضاعف عمره 3 مرات وبينعم الموتور ويهدى صوته وبينظف الرواسب تدريجيا وليس مره واحده زى الفلاش اللى بيبرجل العربيه بيعمل طبقه لأجزاء الموتور تخليه فى حاله تزييت مستمر وبيلغى الاحتكاك تماما واثبتلى ده عمليا بواسطه اسطوانه حديد حط عليها زيت عادى وطلب منى ارفعها من على المكتب وعملت كده بصعوبه وبعدين حط شويه زيت اوميجا على الاسطوانه وكان مستحيل صوابعى تقدرتمسك الاسطوانه وده فى منه كان 325مل لاستخدام الملاكى وبيعمل حوالى 55 جنيه بعد الخصم.
2 اضافه للبنزين للعربيات الانجكشن بينظف ويزيت البلوف والرشاشات وبينظف دوره الوقود ويرفع الاوكتان ويعالج اثر وجود الميه فى البنزين وده فعلا يا جماعه لما جربته العربيه فرقت كتيييييييير جدا كان عندى صوت يشبه صوت الصفاره لما ازود او اقرص على البنزين وده اختفى وكان دايما بيبقى فى تسقيفه بسيطه اختفت ونفس الغيار طول عن الاول والسحب بقى احسن واستهلاك البنزين فرق حوالى 25 كيلو فى ال 20 لتر.
3 اضافه للبنزين للعربيات الكربراتير
4 اضافه لماء الردياتير (ميه الحنفيه) بيعالج الاملاح وبيزيت طلمبه الميه وبيلين الخراطيم ويمنع الصدأ وتأكل المواسير وانسدادها بس لازم يتغير كل 8 اشهر (ليه ما اعرفش؟)
4 اضافه للسولار لعربيات الديزل
5 زيت فتيس وده مشكله مشكله مشكله بجد بس سعره مبالغ فيه فمفيش داعى تتحسروا زيى:K_crying[1]:

المنتجات كلها للاسف امريكى بس عليها ضمان جوده وكل عبوه عليها رقم بيتحط فى الفاتوره للضمان وكمان مستعدين يأخدوا عينه من زيت عربيتك ويبعتوها تتحلل على حسابهم وعلى فكره ا.تامر عرض عليا شهادات الجوده والاعتماديه ومن عملائهم شل وهوندا ومرسيدس ومصانع كتيير بس هم مش مهتمين بسيارات الركوب
( انا طولت اوى معلش بس اللى عايز يسأل عن حاجه انا فى الخدمه والسلام ختام

المشاركة الأصلية كتبت بواسطة zazw

واللى عاوز الزيت ده يروح الفرع بتاع الشركه عشان يشتريه

والله انا بقول نشوف تقريبا كام واحد عايز يجرب ونشترى كميه عشان نأخد خصم كويس (جمله يعنى) او ياريت حد من الأخوه فى أداره المنتدى والاخوه الاكثر خبره منى يعملهم زياره ويجيب خصم احسن من اللى جبته انا (5%)
لأن الشركه دى فى اساسها للخدمات الصناعيه ومش مهتمين بالجانب ده من منتجات اوميجا