معلش اني هاخد من وقتكم شويتين .. بس انا عندي مشكلة مش عارف الاقي لها حل .. ببساطة انا ساكن في شارع طوله حوالي 50 متر او اكتر شوية وعرضه 8 متر .. الشارع فيه 27 سيارة !!! تخيلوا الركنه تبقى ازاي !!! المهم ان صاحب عماره في الشارع فكر انه يفتح ورشه تحت بيته وجاب سمكري وعفشجي وكهربائي وماشاء الله الشغل على ودنه ... تخيلوا بقى سيارات السكان ومعاها سيارات بتييجي تتصلح يوميا لدرجة انه مفيش خرم ابره في الشارع ممكن الواحد يركن فيه لما يرجع من شغله او لو رحت مشوار ورجعت مش هتلاقي مكان .. امبارح رجعت من الشغل والحمد لله لقيت ركنه بالعافيه بعيد عن عمارتي شوية وبعيد عن الورشه بشكل ملحوظ وطلعت شقتي وبعدها بشوية بصيت من البلكونه ملقيتش العربيه !!! نزلت بسرعه وسألت لقيت ان الصنايعيه المحترمين قاموا بفك التعشيقه من تحت العربيه وجروها لمكان بعيد علشان محتاجين المكان بتاعي مع انه بعيد عن الورشه .. طبعا انترفزت .. يقوم الأسطى الباشا صاحب الورشه يقولي لو مش عاجبك شوف لك سكن تاني .. تخيلوا !!! وعلى طريقة عادل ادهم اله يرحمه ضحك وقال لي امال لوكانت مرسيدس كنت هتعمل ايه ؟؟
ياترى لو انتم مكاني هتعملوا ايه ؟؟ وهل فيه قانون او حل يمنع افتراء وجبروت الباشا ده ؟؟ دلوني على حل وعايز اعرف رأيكم ....