كنت قاعد فاضي يوم السبت بعد الظهر قلت أنزل التوفيقية أشوف موضوع السارينه اللي كنت قولتلكوا عليها .
المهم رحت وشوفت حاجات جميلة جدا وغريبة جدا :-
وأنا واقف عند واحد فارش في الشارع كده بشوف إيه اللي عنده لقيت جهاز صغير كده في علبة ومكتوب عليه بركة دخول السيارة بقوله إيه ده ؟ قالي ده دعاء بالصوت أول ما تدور العربية يشتغل ، المهم قلتله بكام قالي من الآخر 8 جنيه قلت مش مشكلة المهم بعد ما جبته لقيته صنع في الصين !!!! بصراحه اندهشت جدا جدا إنهم وصلوا بتفكيرهم لغاية كده .
المهم لاقيته عند واحد تاني وقالي من الآخر 5.5 خمسه حنيه ونص !!!!!!!!!!!!!!!!
مشيت تاني لاقيت السارينه الفدرالي كالتالي :-
80 وات وديه بيبيعوها ب 250 وفيها فصال جامد
100 وات نفس السعر
150 وات بيطلبوا فيها 420 بس تخلص على 350
المهم دخلت لمحل بتاع جمله لاقيت عنده طقم دواسات بتاع البنزين والفرامل والبدرياج بس عجبني لأن لاقيت عليه علامة الانسر وجبته ب 15 جنيه كان بره ب 20 ، وبسأله على السارينه الفدرالي قالي حاجه جديدة خالص بقه عنده واحده 130 وات !!!!!!!!!! بكام يا سيدي قالي سعر أغرب 175 جنيه !!!!!!!!!! والأغرب برضه إنه قالي كان عندي ال 150 وات ب 290 جنيه بس خلصت !!!!!
المهم مشيت شويه كده لاقيت واحد بتاع سراين وعنده حاجات كثير قوي لاقيت عنده البوش الألماني وجبته ب 85 جنيه وجبت سارينه 4 صوت و 4 تردد تاليواني مش صيني ب 120 وهيه ديه اللي ركبتها وقلت أشيل الألماني للعوزه .
الجنان بقه :-
واحد بتاع معطرات عليه زحمه موت دخلت بكام يا عم المعطر اللي هو الشجرة ده قالي ال 100 ب 100 جنيه طيب عايز 5 قالي لأ 100 ؟ تخيلوا قمت جايب 100 ب 100 جنيه هاعمل بيهم إيه مش عارف !!!!!!!!!!!!!!!
قدام بقه لاقيت بتاع سبويلرات سألته على بتاع الانسر 2007 طلع ب 50 جنيه جامد جدا جدا جبته ولسه هرشه وفيه ستوب كمان .
كملت لف وجبت حليه لفرامل اليد شكلها حلو قوي 7 جنيه .
المهم روحت البيت لاقتني صارف مبلغ وقدره فقررت إني مش هاروح تاني بصراحه طول ما انت ماشي تحس إنك عايز تشتري كل حاجه ، نصيحه لما حد يروح ياخد فلوس بزياده قوي .