و الله العظيم بعشق ترابك يا مصر
بحبها حب غير عادي
و نفسي بقى ينصلح حالها
عرض للطباعة
و الله العظيم بعشق ترابك يا مصر
بحبها حب غير عادي
و نفسي بقى ينصلح حالها
طبعاً بنحب مصر وترابها وكل من فيها طبعاً فيها عيوب بس أكيد هتتغير إن شاء الله .:ask:
وليه مفيش ولا واحد منتمي للنظام الحاكم ؟
مافيش هنا ولا واحد عضو في الحزب ؟؟؟
ايكش تولــــــــع
من الاخر انا اكتر حاجه منتمى ليها فى البلد دى (النادى الاهلى) بس
بصراحه لازم تنتمى لكل ده غصب عنك مش بمزاجك بس بجد البلد ملهاش زمب المشكله فى الناس الى فيها بجد عمرك مهتحس بقيمة الوطن وخصوصا مصر غير لما تعيش فى اى مكان تانى هتلاقى برده فى مشاكل كتير وناس رخمه كتير ودا يدل على ان المكان ملوش ذمب المشكله كلها فى الناس ونظام الحكم الفاسد والمحسوبيه والرشاوى والى ليه ضهر ميضربش على بطنه انا كنت فى الخليج فتره كان اى حد يسالنى ايه الاحسن هنا ولا مصر كنت بجامله واقله هنا كلهم اجتمعوا على كلمه واحده لا طبعا مصر ام الدنيا كنت بقول قد كده الغريب عارف قيمة بلدنا واحنا لأ وكانوا لما اقلهم كده يقلولى كلمه تانيه برده صحيح فيها نوع من الاستفزاز لكن كلها حقيقه يقلك مصر غنيه جدا انتو ليه بتشتكوا منها بس صحيح الحراميه فيها اكتر من المواطنين
أنا بأه منتمي لأهلي ومنتمي لقطر البلد اللي عيشت فيها أحلى سنه ونص في حياتي نظافه ومعامله ورفاهيه وممكن أنتمي لأي بلد تحترم آداميتي
طيب هي بلدي بتقدملي ايه عشان اموت فيها واحبها وعشقها
الـأخوة اللي مش بيحبوا البلد , ايه مشكلتهم مع ارضها وترابها وحدودها ؟؟
يعني انا متفهم انت ليه ما بتحبش النظام الحاكم
وممكن تكون مبتحبش الناس علشان في ناس كتيـــــر و......... وحشة !
إنما معندكش انتماء لأرضها ليه ؟؟
مش حاسس ان ده امتداد لعرضك زيها زي بيتك وحريمك ؟؟؟
الأرض ذنبها ايه إن اللي قاعدين فوقيها عاوزين الحرق ؟؟
مش كل الناس زي بعض واللي موجود في التصويت مش كل حاجة
مثلا في الناس إنتمائها لبلدها بسبب إن أهله وعشيرته وأصحابه فيها وهو ده الغالب من الناس
وناس تانية علشان حبيبته أو زوجته وأولاده
وناس علشان شغله وعمله
وناس علشان ما بيعرفش يتكلم إلا لغة بلده
وناس علشان تاريخ وحضارة بلده
وناس علشان حاجة دينية زي السعودي اللي ممكن يكون سبب انتمائه لبلده هو مكانتها في دينه
وناس علشان لها رسالة لبلدها
وناس علشان فلوس بلدها والنعيم اللي هي فيها زي دول الخليج
وللناس في ما يعشقون مذاهب
لكن اللي بيوضح الموضوع أكتر هو التعصب للبلد والتعصب للبلد هو جزء من التعصب للنفس.
والتعصب يظهر غالبًا عند المقارنات والحروب أو التباهي أو لأغراض شخصية
أما إن واحد ينتمي للبلد علشان التراب أنا ما اعتقدش . هو التراب ايه علشان أنتمي له
الحكومة برضه صعبه إن واحد يكون إنتمائه لبلده بسبب حكومته لأن الحكومات بتتغير لكن الأنتماء بيفضل
دي وجه نظري في موضوع الامنتماء والوطنية
كلام جميل بس أنت ليه مستغرب ان في انتماء للتراب ؟
يعني لما راحت سيناء ما حسيتش بألم في صدرك ؟؟
لو راحت تاني , مش حيبقى هدف قومي ليك أنت وأهلك وأنا وأهلي ومجموع السكان كلهم تحرير الأرض اللي ورثناها من أجداد أجداد أجدادنا وعيب قوي تضيع في عصرنا ومنورثهاش لأولادنا ؟
حط نفسك مكان أي سوري , مش حتحس بالغيض وأنت شايف الأنجاس بياكلوا من خير الجولان
يا راجل دا انا هنا في مصر و الموضوع ده عملي حرقة ما بعدها حرقة , ما بالك باللي في سوريا ؟
واللا اللي سوريا كمان مش في دماغهم الجولان وألا إيه بالظبط ؟
أما الأنتماء للنظام الحاكم
لا طبعاً في ناس منتميه للنظام
وساعة الملحمة لما حيهرب النظام, حيهربوا وراه
وأعتقد إن اي واحد ارتضى لنفسه انه يتكتب اسمه في كشوف الحزب الحاكم علشان منفعة دنيوية سواء بقه الحزب الوطني أو حزب البعث أو حزب الجبهة الطبيعي أنه يكون منتمي للنظام الحاكم اللي مشترك فيه
أمال ساعة الإنتخابات حيدي صوته للإخوان مثلا ؟
أنا منتمي لهذا المثل
أمشي جنب الحيط يحتار عدوك فيك
:C_laugh[1]::C_laugh[1]::C_laugh[1]:
انا لو قلت رايي هضرب هنا :C_laugh[1]:
أنا ما اختلفش معاك في اللي أنت بتقوله
لكن عندي سؤال هو تراب سيناء هو سبب انتمائك لسيناء ....؟؟؟؟
ولو كان سايكس بيكو قسم تل أبيب تبع مصر كنت برده حدافع عنها علشان بقت جزء من مصر
يبقى ما فيش حاجة اسمها انتماء للتراب أنت إنتمائك لوطنك ولأن سيناء جزء من وطنك أنت بتدافع عنها مش علشان ترابها ولا حاجة
أتمنى لأن تكون وجه نظري واضحة لك
أنا منتمي لتراب بلدي و لأهل بلدي
انا سمعت الريس بيتكلم عن محدودى الدخل و ازاى هو مهتم بيهم
الحمد لله انى مصرى و ان مصر مباركه بمبارك صاحب الضربه الجويه الى فتحت باب الحريه
انا بلا فخر بحس بالانتماء لمبارك انا اتربيت و اتعلمت و اتجوزت و خلفت و هموت و الريس موجود حوالينا بيملا علينا البلد
ربنا يخليه لينا و يفضل موجود كده معانا
حلو كده؟
ربنا ياخدهم و ريحنا منهم بقى
على فكره انا قصدى ياخد عدوينه و القله المندسه
انا مش فاهم انت ليه فهمتنى صح!!
كدا يبقى انت انتمائك تابع لرغباتك وليس نابع من عاطفتك
سنه ونص ينسوك بلدك عجايب انا عشت 10 سنين فى السعوديه فيهم 1: احلى ايام حياتى 2: ذكريات طفوله
3:ذكرياتى مع والدى 4: اصحابى الى اتعرفت عليهم هناك
5:زملاء العمل 6: الناس الى حبتهم وحبونى ومكنتش احب يوم انى افارقهم 7:الرفاهيه والاكل والشرب والمعامله النضيفه من ناس والى مش نضيفه من ناس تانيه مهى البشر اختلافات فى كل بلد وفى كل مكان دنتا حتى يوم القيامه هيبقى فى اختلافات بين البشر مش كلهم وحشين ومش كلهم حلوين حتى فى الجنه فى درجات ورغم كل دا كنت كل يوم احلم باليوم الى هرجع فيه بلدى وافضل اغنى طيرى يا طياره
السلام عليكم
أعتقد الإنتماء يعني أنا مصري ويعني مصر بكل حذافيرها وتفاصيلها الحلوة والسخيفة ولا نظرية الإنتماء دي في الكورة والنوادي بس !!!
يعني أطلب جنسية مكان تاني أظن انها ضد الإنتماء
أو السلبية في الشارع المصري والإستسهال والطناش ضد الإنتماء
ما هو امتى هنتعدل واحنا بنتفرج بس وننتقد ونشتم ونعمم السيئة وتقول :ماهي بلد كذا وبنت كذا و بدون تغيير المنكر ...!!!!
احنا البلد
ربنا يصلح حالنا ونتحرك والبلد تتحرك بينا
ورأيي :(في الإستطلاع) إن الإنتماء يستدعي الغيرة على كل شىء يخص بلدي وما فيش أحلى منها
إزاي انتمائي تابع لرغباتي وأول شئ ذكرته هو أهلي وده أكبر دليل إنه إنتمائي نابع من عاطفتي يبقى أهلي دول رقم واحد في حياتي بعد كده اعيش في أي حته نظيفه تحترمني وتحترم آدميتي أهم شئ ان اهلي يبقوا معايا وبعدين انا مش شايف عيب اني انتمي لمكان احترمني واحترم ادميتي ما ادام مش عارف اعيش في بلدي حياه كريمه
ومع ذلك برده بنحبها
محدش عاوز يبل ريق حكومة اي بلد ويقول انه منتمي لنظام الحكم ؟؟؟
الله؟ طيب هما بيحكمونا ليه طالما مافيش ولا واحد من الشعب طايقهم ؟؟؟
انا منتمي لعيلتي يعني اهلي واصحابي بس مش اكثر من كدة انما الوطن والكلام الكبير دة ؟؟؟
هو فين الوطن اصلا ؟ حد يقدر يجاوبني انا اللي اعرفة عن الوطن دة انة بياخد مني فلوس وبيتفنن انة يدايقني في عيشتي بس
انا عشت معظم حياتي برا مصر (اوروبا كلها _الكويت _دبي_قطر_السعودية) منها ترفيه ومنها تعليم ومنها شغل..
بس مصر دي بلدي
زبالة مش زبالة بحبها
حرامية مش حرمية بعشقها
فقر مش فقر بموت فيها
حكومة حلوة وحشة مش سايبها
دي بلدي ولو ايه بالذي دي بلدي..
اللي ملوش خير في بلده ملوش خير في غيرها
احنا البلد واحنا اللي بنتحكم فيها .. بس قبل منلوم البلد لازم نلوم نفسنا.. الحكومة اللي بتحكمنا مهو هما دول احنا .. ناس من اهل البلد.. الناس اللي بترمي الزبالة في الشارع وتكسر الاشارات وتسرق وتقتل وتغتصب مدول احنا.. الناس اللي قاعدة علي القهاوي واللي بتلعب قمار واللي بتشرب مخدرات ومضيعة فلوسها مدول احنا..
ماللي بيكسروا الشوارع احنا..
حاسبوا انفسكم... وشوفوا الصح من الغلط...
الاعضاء اللي اتكلموا عن العيشة برا وانها احلي.. متسألوا نفسكم هما الشعوب اللي برا بيعملوا الي بنعملوا ؟ الطلبة بتزوغ من المدارس؟ المدرسين مبيشرحوش؟ الناس قاعدة علي القهاوي مش بيشتغلوا؟ الناس بتكسر الاشارات ويرموا زبالة في الشوارع؟
لو كل واح فينا حب البلد دي من قلبه وضحا عشانها هنبقي احلي بلد في العالم.. بس ياخسارة. شوفوا انتوا بتقولوا ايه علي بلدكم..
انا افخر بتاريخ مصر و منتمي ليه و ليس لاي شيء اخر!
هى فين البلد
مصر ؟؟؟!!!! يعنى ايه مصر ؟!!!
الواحد بينتمى للحاجات اللى ما يقدرش يغيرها :دينه،امه،ابوه،اخواته و اى حاجة غير الاربعة دول ما تلزمش حتى بجناح دبانة