الموضوع: أنا وغبور (سرقة-نصب-كدب-تنفيض-توزيع)

مساء الخير

طبعا أغلب الأعضاء هنا عارفين مشكلتي مع الفتيس و الدبرياج منذ حوالي شهر ونص او شهرين، و للإستزادة راجع المواضيع التالية :

1- صوصوة في الدبرياج..!

ومن ثم من إهمال التوكيل و عبثيتهم المشكلة اتطورت لعضة في الفتيس او حشرجة محسوسة مع النقل.

2-
مشكلة مع فتيس فيرنا 1600

---

و اخيراً حدث ماحدث يوم الخميس الماضي كما كنت مرتباً، بأن أذهب للتوكيل لعمل حل نهائي لهذه المشكلة و إليكم ما حدث.

الاستقبال من شخص لا يوجد لديه أي نوع من أنواع الأدب، لدرجة انك تعتقد انك دخلت بار مثلا او غرزة و وكان عليك حساب قديم و بيقولولك لما تدفع اللي عليك!!

شخص أسمه محمد -مش فاكر باقي أسمه- المفروض إنه مهندس استقبال...بمجرد ماعرف ان الموضوع مش مجرد صيانة عابرة للسيارة....قال خلاص مفيش امر اصلاح الموضوع وما فيه ان العربية عايزة تتشحم ياباشا!!

فهمته ان دي رابع مرة اجيلهم لنفس المشكلة والمشكلة بتتطور...قالي لا متقلقش تعالى نجربها...وهوب طلع جاب اول وتاني و راح مفرمل فجأة و هوب لف العربية و اول وتاني ودخل التوكيل!!

خلاص العربية كدا مفيهاش مشكلة.!! طبعا سيبته بيتكلم مع نفسه ومشيت ورحت لمدير الفرع المهندس كورلوس. والراجل كان محترم معايا كالعادة وقالي ان هو هيدي امر اصلاح للعامل و بعدين اجرب العربية ولو ظهر فيها حاجة هيبقى يفحصها تاني....يعني من الاخر نظام تثبيت و تضييع وقت و كأني فاضي اروحلهم كككككككل يوم مش كفاية يوم الاجازة الواحد بدل مايشبع فيه نوم لا نازل متدهول يصلح فتيس عربية بسبعين ألف جنيه و مكملتش 14 الف كيلو...حاجة تقرف بجد وتجيب نكد ومرارة

المهم!

العامل يدوب شحم حاجات و ظبت حاجة في الدبرياج في 10 دقايق وقالي خلاص ياباشا....

وانا مروح افاجئ بالتالي :

1- كل ما تم هو مجرد تشحيم حتىلا يظهر صوت عند الضغط على الدبرياج، وبعد مرور يومين عاد الصوت مرة اخرى وبشكل أسوأ!

2- لازالت هناك عضة في الدبرياج عندما يتعدى الار بي ام ال3...ولا تحدث تلك العضة قبل ذلك. --مما يؤكد وجود عيب فعلا!-

3- و هنا كانت الصدمة....انا كنت حاطت في التابلوه ازازة برفان و كريم جيل....وهوب ملقتهمش!! يعني مش بس خربوا العربية..لا دول سرقوها كمان و نزلت شيكت على الاستبن لحسن يكون اتسرق هو كمان..ولاقيته موجود الحمد لله!!


خلاص كدا..انا جبت اخري وبفكر ااقدم شكوى لجهاز حماية المستهلك، خصوصا ان لي تجارب مع هذا الجهاز تجعلني متأكد إنهم ناس غاية في الاحترام وهيجيبولي حقي حتى لو من بق غبور بيه!

أيه رأيكم ياجماعة..ااقدم الشكوى ولااعمل ايه؟ و هل حد جرب يقدم شكاوي ؟ والموضوع بياخد قد ايه؟

وشكراً.

ربنا يوافق وباذن الله هاتتحل المشكلة