ألف من هنا ولا من هنا الف(مشكله شارع النحاس فى طنطا)

الموضوع ده كان محيرنى اوى لكن أكتشفت انو محير جهابزه المرور عندنا فى محافظه الغربيه ومرور طنطا
الموضوع هوا العقده الكبرى فى المرور (باين كده والله وأعلم )
ببساطه عندنا شارع رئيسى أسمو شارع النحاس واسع منظم ومتشجر وثلاث حارات فى كل جانب وفى النص جزيره جميله ومتشجره وحاجه زى الفل لكن واه من كلمه لكن الشارع ده يا حضرات فى أشاره مهمه وحيويه عند فندق مشهور أسمه بانوراما وناصيه شارع رئيسى اسمه شارع أبن الفارض وشارع تجارى أسمه شارع سعد الدين
كان الشارع ماشى تمام وبعدين فى ليله عملو جزيره سدو الشارع ولغو الأشاره وبقت الفه بعد 50 متر والمرور من داخل شارع جانبى (حاجه تجن لكن ومالو الحكومه عايزه كده)وفى ليله لغو اليوترن الكان على بعد 50 متر وأصبحت الفه بعد مشوار 3.5 كيلو اه والله متستغربوش ومن حته مخنوقه أسمها المحطه (مايضرش لكن دى بعيده اوى ) هوب فى ليله شالو الجزيره ومشو الشارع زى زمان والحياه ورد وعملو أشاره فى الناحيه التانيه وعملو يو تيرن قبل الفتحه القديمه الى أتسدت ب 20 متر (ماشى يا حاج لمصلحه البلد )
هوب فى ليله من يومين مش عاجبهم الكلام ده ورجعو شالو لأشاره وعملو الجزيره القديمه الى سدو بيها الشارع زمان
مع العلم الشارع ده بيعدى فيه طوال النهار الناس الى رايحه المحطه والى راجعه على وسط البلد وفيه كميه معاهد ومدارس وكليات منها سنوى واعدادى وكمان أبتدائى ولحد السعادى محدش فاهم حاجه خالص
ولا أنا والله يعنى انا من سكان الشارع ده ودلوقتى مش عارف ألف منين علشان أروح وميكونش من شارع عكس السير
ومشعارف أصلا فين دلوقتى الشارع الى رايح والشارع الى جاى علشان أروح منو البيت
ودى بقا أداره المرور الكريمه بتاعتنا هنا فى طنطا مع العلم أن كل التغيرات دى فى خلال أقل من سنه وفى عهد 2 مديرين مرور