حصرياً ... غيرت طنبورة شيري a11 وإليكم التفاصيل :)

طبعا الطنبورة إتكسرت وده لسبب مجهول !!!
الطارة اللي حوالين الدايرة أم أربع مسامير إنفصلت عن بعضها
يعني بقت حتتين
المهم أنا عرفت طبعا إن السبب الرئيسي إن اللي إشتريتها منو كان التيل إتاكل وفضلت حديد ف حديد لحد ما قفشت منو ف مرة ومع السخونية طبعا بتاعة إحتكاك الحديد التيل قفش ف الطارة ومع دوسة البنزين طبعا إتقطمت نصين
المهم
كنت كل ما بامشي بالعربية ألاقيها زي الفل
ومع الفرملة أو التهدية
أسمع صوت ف الشاسية كلو من تحت
ف لما روحت عرفت السبب
وبدأت رحلة العناء
اللي الحمد لله ماخدتش وقت خااااالص
أولاً - أتصلت بالتوكيل :
قالولي
إن التيل بتاعها ب180 جنيه !!!
والطنابير
بتتباع بالجوز
مش بالواحدة
والجوزة ب300 جنيه !!!
كل ده من غير مصاريف التركيب ولا أي حاجة تانية
====================
نزلت عندنا ف مدينة نصر أسأل ف الحي العاشر يمكن ألاقي اللي بادور عليه
طبعا التيل مالقيتش أي تيل تاني يمشي عليه
لكن الطنبورة لقيت
وكانت طنبورة الإيبيزا !!!
بس للأٍسف
أصغر منها نمرة
بتاعة الإيبيزا 13
وبتاعت الشيري 14
المهم خدت بنصيحة واحد محترم وقال لي خد التيل ف إيدك والطنبورة وإنزل بيهم عالتوفيقية - شارع رمسيس وهاتلاقي كل حاجة هناك
وكانت المفاجأة !!!
أول ما نزلت الشارع ده
كل المحلات عندها !!!
خد عندك بقى يا سيدي الأسعار اللي إشتريت بيها الحاجة
أولاً-الطنبورة
هي طنبورة عربية إسمها الأنكا - ودي سيات
سيات أنكا دي عربية مقدمتها زي الملاكي بس بشنطة زي النص نقل كدة
وجوز الطنابير بتوعها ب350 جنيه مش ب300 زي الشيري
بس الفرق الوحيد
واللي خلاني إشتريت فعلا
إن الطنابير ألماني ومنحوت عليها بلد المنشأ
إنما الطنابير اللي ف التوكيل صيني
والحمد لله بالصدفى لقيت عند الراجل فردة واحدة ف خدتها منو ب157 جنيه :)
==========
وبالنسبة للتيل :
مسافة ما الراجل شافو
قال لي بس يا عم سهلة
ده تيل الباسات
!!!
بالبساطل دي ؟؟؟
قال لي أيوة يا عم
ده تيل فولكس باسات
طب بكام حضرتك ؟؟؟
قال لي الباسات مفيش دلوقتي غير التيل الفرنساوي
بكام يا حاج ؟؟؟
قال لي ب120 جنيه !!!
يعني التيل الصيني ف شيري ب180 ؟؟؟
والتيل الفرنساوي بتاع الباسات ب120 جنيه ؟؟
ما علينا
المهم إشتريت التيل الفرنساوي طبعا وفردة الطنبورة وأنا ف منتهى السعادة
ونزلت للميكانيكي بتاعي ف العاشر
وركبهم
وظبطهم
وأخد 40 جنيه
هو كان عاوز 50 جنيه
بس أنا غلست عليه وإديتلو 40 جنيه بس
!!!!
يعني الملخص بتاع الكلام ده كلو
التيل = تيل فولكس باسات = 120 جنيه
الطنبورة = طنبورة سيات أنكا = 350 الجوز
أنا جربت بنفسي وسألت وإشتريت بنفسي كل حاجة
ومن ضمن المعلومات اللي عرفتها برضو
إن كل قطع الغيار الخارجية للشيري a11 هي سيات توليدو
ودي برضو متوفة ف الشارع ده سواء جديد أو إستيراد

حبيت أقول لكو بالتفصيل على كل حاجة
علشان المنتدى ده متميز قوي
بس ليا طلب
ياريت يا جماعة أي حد معاه العربية دي
موديل 2005
يقول لي متوسط إستهلاكها جوه البلد ف البنزين قد إيه
يعني مثلا ال20 لتر بتعمل قد إيه ؟؟؟
رجاء الرد بالله عليكو

هيا فعلا شكلها الخارجي شبه التوليدو بس القديمه تقريبا الي في التسعينات

بس كويس انك عرفت تلاقيها قطع غيار واسعار حلوه

ياريت تقولنا تقييمك عن العربيه

انا بفكر اشترى a11 ممكن تقدر تفدنى عن كل المميزات والعيوب الى فى العربيه وانا سمعت انها بتعمل 140 كيلو فى الصفيحه وده معدل استهلاك عالى جدا جدا جدا فممكن حضرتك تقلى هى بتعمل معاك كام فى الصفيحه وهلى ممكن بنزين 80 ولا غلط عليها وعلى فكره انا من العاشر ومستنى الرد

الأخ حماده المصري
العربية معايا دلوقتي بقالها 3 شهور ف هايكون تقييمي غير موضوعي طبعا
لكن أقدر أقول لك اللي حسيتو طبعا من خلال سواقتي ليها
صراحة العربية تقيلة على الأرض بشكل رائع
خصوصا بعد ما باعدي ال120 كيلو بتبقى هايلة
صوت الموتور عالي نوعا ما ... لكن معدل السحب أعلى وأسرع من عربيات تانية كتير
العفشة حلوة جدا جدا جدا ومتينة (على حسب قول العديد من الميكانيكية) يعني لما روحت أغير الزيت الراجل قعد يمدح فيها ... والميكانيكي اللي كان بيغيرلي الطنبورة والتيل برضو
واسعة قوي من جوه
معلومة
أنا من أصحاب الوزن التقيييييل ههههههه
وطولي معدي ال180 سم ومع ذلك اللي بيقعد ورايا بيقعد مستريح جدا جدا جدا
العربية بتشيل 5 أفراد حلو قوي ... وممكن تشيل 6 بس مايكونوش زيي في الحجم :)
الشنطة أوسع شنطة على مستوى كل العربيات اللي شفتها
التكنولوجيا اللي جوه ظريفة وبسيطة
عرفت من الميكانيكي بتاعي إن موتورها موتور فورد
من الآخر أنا معجب بيها جدا جدا جدا من ساعة ما جيبتها
وربنا يديني خيرها ويكفيني شرها :)
قولوا آمين

الأخ ahmed1_com
لو بتفكر ف a11 كعربية تريحك وعائلية ومتينة
ف أحب أقول لك توكل على الله
الصاج بتاعها 9مللي
يعني أتخن من الأكسينت (ده كلام ناس متخصصة والله أعلم)

موضوع البنزين
أنا باتحايل على حبايبنا أعضاء المنتدى يدلوني عليه
لإن إستهلاك عربيتي ف البنزين 150 كيلو للصفيحة !!!
ف حين إني قريت عنها عالنت
إنت ال6.3 لتر بتعمل 140 كيلو متر !!!!!!
والمفروض إنها نازلة إقتصادية ف البنزين
هل فيه عيب عندي ؟؟
ولا هي كدة وبيضحكوا علينا ؟؟؟
غير كد ةماعندي أي كلام أقولو غير إنها عربية تحفة :)
وربنا يوفقك

شكرا ليك جدا يا
look4love2010

ممكن اعرف حضرتك مجربتش تمونها 80 لانها لو قبلت 80 تبقى كويسه جدا وكمان ممكن اعرف من حضرتك انت جبتها بكام وشكرا ليك

احسن حاجة انك ماستسلمتش لاستغلال التوكيل واتصرفت فى قطع الغيار من برة
ربنا يباركلك فيها

الف شكر ياباشا على التقييم الحلو ده

وربنا يديك خيرها ويكفيك شرها

انت المفروض بقى تسال الميكانيكي والتوكيل في الحوار ده

عموما عندي في عربيتي لما الاستهلاك بيزيد بيبقى من الزيت قدم والبوجيهات باختصار طقم السيرفس بينشط العربيه ويحسن الاداء

انما انت عربيتك زيرو يعني مش هتفرق كتير
ف الاحتمال الابعد يكون الانجكشن عايز يتزبط او في عيب مرتبط بيه
وخلي بالك ان البنزين جه فتره مغشوش تقريبا او حاجه زي كده وكان بيخلص عند ناس كتير بسرعه ف مون من بنزينات محترمه

هو طبعا البنزين 80 ليه أضراره
أنا كان معايا فيات 131 وكنت بالمس بنفسي الفرق ده لما أكون حاطط بنزين 90
وأرجع أحط 80 العربية كانت بتنتش قوي مني
وبعدين أنا سمعت من ميكانيكية إن الإنجكشن بيبقى صعب يتعامل مع ال80 لإن نسبة النقاء فيه مش عاليه
وبالنسبة للسعر
ف أنا جبتها ب37 ألف بالظبط وهي موديل 2005 وماعملتش فيها أي حاجة لما أخدتها - يمكن يكون السعر حلو قوي ده لإني أخدتها من إبن عمي :)
إنما صاحبي إشتراها نفس الموديل من كام أسبوع كده ب42 ألف
يعني ده المتوسط بتاعها :)

الأخ حماده المصري
يعني متوسط إستهلاك عربيتك ف الصفيحة بيعمل كام ؟؟؟
علشان لو كدة يبقى فعلا فيه مشكلة عندي

الاخ look4love بالنسبة للبنزين ماتحتش اقل من 92 وبتعمل معايا من المطرية الى سيدى بشر بالاسكندرية من الدائرى مسطرد الى المحور الى الصحراوى 22 لتر احسبها بقى على مهلك.

كمان مكتوب على باب البنزين 93 او اعلى
لأن اوكتين البنزين له علاقة بنسبة الانضغاط للمحرك

في المعدل العادي 20 لتر = 200 كيلو

وفي الزحمه بيقل ل 160 احيانا خصوصا مع التكييف والتوقف والمشي المتكرر وبرضو لما بيبقى السيرفس عايز يتغير بيقل للمستوى ده

على طرق السفر لو على سرعه 100 ممكن يزيد يوصل 230

عامه متوسط العربيات 1.6 خصوصا المانيوال 10 لتر =100 كيلو
العربيات الي بتقل عن كده تبقى مستهلكه الي بتزيد عن كده تبقى اقتصاديه ده طبعا في حاله القياده الطبيعيه بدون حرق
انت ممكن يكون اسلوب القياده بتاعتك عنيف او بتحرق سنه على الغيارات انسب وقت تغير فيه لما الار ب ام يبقى على 2.5 او 3
وانسب طريقه لقياس استهلاك العربيه هي على طرق سريعه
========

إنت ال6.3 لتر بتعمل 140 كيلو متر !!!!!!

الرقم ده صعب شويه انه يتحقق بس على طريق ممكن يبقى رقم قريب منه ممكن نقول 7 او 8

تصديقا لكلام الاستاذ حمادة المصرى
مكتوب فى كتالوج السيارة ان استهلاكها المثالى 6.9 لتر لكل 100 كم للمنوال ترانس ميشن عند ((Uniform speed90 كم/ساعه (Half load)
على الطبيعة العربية بتعمل معايا 8.5 لتر للـ100 كم على الطوالى بسرعة 100 كم/ساعه منتظمة تقريبا بنزين "95" ومن 9.5 الى 11 لتر داخل المدينة
وجربت البنزين الـ 92 عمل كيلومترات أقل وبتصقف على المطبات الصناعية على الثانى يعنى المفيد اكتشفت البنزين الـ92 مفيد على الطوالى و الـ95 داخل المدينة علشان متصقفش.

نسيت اقول لحضرتك ان الحسابات دى من غير تكييف

شكرا للاخ Look4love على موضوع الطنبورة وتيل الفرامل الموضوع حقيقى جميل يكشف استغلال التوكيل

العفو أحبائي :)
بس أنا ماقولتش إن عربيتي بتستهلك 6.3 لتر في 140 كيلو متر !!!!!!
أنا قولت إني قريتها على النت
لكن أنا للأسف عربيتي
لما باحط 10 لتر 92 :( بتعمل بالعافية 70 كيلو :(

عربية حضرتك عاملة كام كيلومتر

عربيتي موديل 2005 - وعاملة 75000 كيلو متر
ملحوظة جديدة حصلت معايا بقالها يومين :
كل يوم الصبح ف عز البرد على الساعة ونص صباحا كدة
لما باجي أدور العربية
بالاقي نور الحرارة ف التابلوه منور
وبعد دقيقة النور ده بينطفي لوحدو
علما بإن المؤشر بيفضل مكانو تحت
هل العلامة لما بتنور مثلا علشان البرد ف بتقول لي إن العربية محتاجة تتسخن ؟؟؟ ولا فيه خلل ما في اللمبة ؟؟؟ لإن المؤشر بتاع الحرارة زي ماهو تحت ماتحركش خالص
مع العلم إن اللمبة دي ماظهرتش غير في أيام البرد اللي فاتت
ولحظة ما بادور العربية بس الصبح
لكن بعد كدة مش بتبقى موجودة خالص طول اليوم

إمبارح كنت بالاحظ جادة غريبة قوي !!!
لما أدور العربية الصبح
تدور
وأمشي بيها وزي الفل
وبعد فترة
أركنها
آجي أدور تاني
ماتدورش
إلأا ورجلي على البنزين !!!!
ومسافة ما أشيل رجلي
العربية تبطل
ولمبة الزيت تنور وتطفي
مع إني أول إمبارح كنت مغير زيت وفلتر
وبعد ما أركن العربية فترة
وأنزل أدورها
تدور على طول
ف روحت للميكانيكي بتاعي ف العاشر
لقى إن الإكزراتير كان محتاج تنضيف بس
إشتريتلو إسبراي ب20 جنيه
وهو فك الإكزراتير برا ونضفو الأول ببخاخة عندو كدة بتضخ جاز بقوة عالية علشان ينضف وبعدين نضف بالإسبراي
وخد 20 جنيه :)
والعربية بقت زي الفل ومية مية
ومن أقل لمسة لدواسة البنزين بقت فايقة قوي :)

ياريت حضرتك تقولنا على الميكانيكى الى بتتعامل معاه عشان بدور على ميكانيكى بيفهم فى العربية بتاعتنا غير التوكيل .
وشكرا مقدما على الرد

الميكانيكي اللي باتعامل معاه أكتر من واحد :)
هههههههههههههه
هما موجودين في الحي العاشر - مدينة نصر
لو المكان قريب منك ممكن أبقى أقول لك فين بالظبط
بس فيه إتنين أشطر من بعض بصراحة
مش بيشتغلو غير ف الأوبل والمازدا والحاجات النضيفة دي ونضيف عليها طبعا شيري الأستاذه ;)
ومهاودين قوي ف مصنعيتهم ومش بيحبو يعملو عليك شغل
ملحوظة :
لما روحت لواحد ف طريقي عشان أسألو على موضوع تبطيل العربية لما بادورها
قال لي فيه ماس ف كهربة العربية ولازم نعيد لك الضفاير من أول وجديد
هههههههههههه
وواحد تاني قال لي لازم أغير لك الزيت والفلتر وطقم البوجيهات
لكن لما روحت للميكانيكي بتاعي
خلص الموضوع ف ربع ساعة بالظبط وب20 جنيه :)

اكتب لنا العناوين لو سمحت القريب من جسر السويس وشكرا مقدما

شكرا يا look4love2009 على مشاركتنا تجربتك ومشكلة استهلاك البنزين كمان موجودة بعربيتي تعمل 150 كل 20 لتر بنزين 92 و قلت للتوكيل قال لي حساس الشكان محتاج تغير غيروا على حساب التوكيل لانه العربية لساها بالضمان وسعرة ب500 جنية لكن المشكلة لساها بالعربية

شكرا يا look4love2009 على مشاركتنا تجربتك ومشكلة استهلاك البنزين كمان موجودة بعربيتي تعمل 150 كل 20 لتر بنزين 92 و قلت للتوكيل قال لي حساس الشكمان محتاج تغير غيروا على حساب التوكيل لانه العربية لساها بالضمان وسعرة ب500 جنية لكن المشكلة لساها بالعربية

عربياتكوا ياجماعة فيها حاجة غلط ،عربيتى والحمد لله تعمل225 كم/صفيحة داخل المدينة & 250 كم /خارج المدينة ف الطوالى بسرعة تقريبا 100 كم/ساعة

يا جماعة اخيرا عرفت سبب استهلاك البنزين العالي بتاع شيري a11 او a15 واحد ميكانيكي قالي السبب حساس الهواء وهو فحص عربيتي وعرف السبب وعطل الحساس لا يوثر على اداء العربية , فقط يؤثر على استهلاك البنزين , يا ريت حد يعرف الحساس ينباع فين وبكم

Bossa - very good

استهلاك البنزين بتاعها 8 لتر لكل 100 كم في المتوسط

لو سمحت لو عارف سير الكاتينة موجود برة التوكيل فين رد عليا لو سمحت

ممكن اسم المحل اللي يبيع تيل وطنابيير

السلام عليكم
انا عندى a11
و عندى مشكلة فى وحدة الكمبيوتر ecu
هل يمكن ان يدلنى احد من اين احصل عليها و كم سعرها ؟

اقتباس:

---

المشاركة الأصلية كتبت بواسطة ahmed_332_eg

السلام عليكم
انا عندى a11
و عندى مشكلة فى وحدة الكمبيوتر ecu
هل يمكن ان يدلنى احد من اين احصل عليها و كم سعرها ؟

---

شوف فى التوكيل وربنا يسهل وتلاقيها فيه هناك مهندس الصيانة اسمة عنتر اسأله بالتليفون