انت تسأل وإستشاري منتدى متسوبيشي يجيب (2)

**eltorky** · 09-06-2010 11:14 AM

السلام عليكم بعد أذنك يا بشمهندس طارق أنا بس كنت عايز أسئل حضرتك علي وش فانوس الصلون (الباغه بتاعته ) بومه 2007 لاني مش لاقيه خالص و سئلت عليه في مركز بيع الكيتكات و بردو مش موجود وقالولي أنو موجود في قليوب فياريت بعد أذن حضرتك تقولي هل فعلا الباغه ديه موجوده ولا لا و سعرها كام ؟ و جزاك الله كل خير

**مصراوي جدا** · 09-06-2010 01:38 PM

المشاركة الأصلية كتبت بواسطة unxpected

السلام عليكم
يا بشمهندس طارق سؤال صغير.. أنا معايا لانسر شارك 2009 فول أوبشن بس للأسف ناقصها زي أي لانسر مثبت سرعة.. هل من الممكن يتركبلها مثبت سرعة؟ أنا سألت في التوكيل قالولي مبنعملش تعديلات في العربيات.. طب أنا عايز أعرف مين يقدر يعملهولي بإحتراف ويبقى عنده المثبت نفسه؟؟

مثبت السرعة مش بينزل في الشارك غير في ال2000 سي سي واعتقد gt فقط كمان ودي مش بتنزل مصر وفعلا في التوكيل مش بنعمل اي تعديلات في العربيات لو مش اصلية فيها حتى لو مثبت السرعة متوفر

انما انا مش عارف ممكن تلاقيه فين - اعتقد ممكن تدور في منتدى الكماليات والتعديلات

المشاركة الأصلية كتبت بواسطة nashaat1970

متشكر جدا علي الرد المفتاح بدون ريموت والعربية 1600 مفتاح مشفر وياريت اعرف سعرة كام وهل هو موجود في قليوب وشكرا مرة تانية علي الاهتمام

سعر المفتاح الخام حوالي 300 جنيه والتشفير حوالي 180 جنيه ولازم رقم الشاسيه لتحديد الصنف بالظبط
وعند التركيب لازم تكون العربية موجودة لتغيير الشفرة القديمة بشفرة جديدة للعربية والمفتاح القديم
ولازم يكون مالك العربية هو الموجود وميكونش على رخصة العربية حظر بيع

المشاركة الأصلية كتبت بواسطة eltorky

السلام عليكم بعد أذنك يا بشمهندس طارق أنا بس كنت عايز أسئل حضرتك علي وش فانوس الصلون (الباغه بتاعته ) بومه 2007 لاني مش لاقيه خالص و سئلت عليه في مركز بيع الكيتكات و بردو مش موجود وقالولي أنو موجود في قليوب فياريت بعد أذن حضرتك تقولي هل فعلا الباغه ديه موجوده ولا لا و سعرها كام ؟ و جزاك الله كل خير

للأسف الباغة دي مش موجودة خالص - واضح ان الطلب عليها ضعيف جدا

**مصراوي جدا** · 09-06-2010 03:35 PM

الردياتير كامل للعربية الاوتوماتيك سعره 2700 جنيه شامل الضريبة

والكسر ممكن يكون له اسباب كتير بس معظمها خبطات أمامية بتأثر عليه

**rebel** · 10-06-2010 10:30 AM

من فضلك يا باش مهندس أنا عربيتي لانسر بوما رياضية 2008 أوتوماتيك بس بحس إنها بتاكل بنزين هو آخر مرة فولت التانك 92 وقبل المؤشر ما بيدي لون أصفر بحاجة بسيطة أوي لقيت العداد عامل بالضبط 404 كيلو وكنت ساعات بشغل التكييف فهل المعدل ده طبيعي؟ آسف للإطالة وشكرا على اهتمامك.

**مصراوي جدا** · 10-06-2010 11:02 AM

المشاركة الأصلية كتبت بواسطة drmsadek1979

باشمنهندس طارق انا حطيت بنزين مخلوط جاز بس فضيت التانك علطول وفولت بنزين كويس فعاوز اعرف اعمل ايه ونوع منظف الرشاشات الي اجيبة؟
مع جزيل الشكر

انا سألت المهندس احمد عناني مدير الورشة وقال لي مش ضروري منظف الرشاشات في المشكلة دي (هو عادي انه يستخدم دوريا لتنظيف الرشاشات وفيه نوع ميتسوبيشي اصلي تمنه 60 جنيه يباع في منافذ بيع قطع الغيار الأصلية) انما المهم بعد انزال البنزين المخلوط بالجاز من التنك في المرة الأولى ثم بعد قرب انتهاء التفويلة الجديدة يتم انزال اللترات المتبقية مرة تانية من التانك لأن الجاز اتقل من البنزين وهيكون موجود تحت

المشاركة الأصلية كتبت بواسطة rebel

من فضلك يا باش مهندس أنا عربيتي لانسر بوما رياضية 2008 أوتوماتيك بس بحس إنها بتاكل بنزين هو آخر مرة فولت التانك 92 وقبل المؤشر ما بيدي لون أصفر بحاجة بسيطة أوي لقيت العداد عامل بالضبط 404 كيلو وكنت ساعات بشغل التكييف فهل المعدل ده طبيعي؟ آسف للإطالة وشكرا على اهتمامك.

من الصعب الحكم على معدل استهلاك البنزين كويس و لا لآ في المشاوير العادية داخل المدينة انما طريقة الحساب الصحيحة للحكم على استهلاك البنزين بتبقى عن طريق تفويل التنك تماما ثم المشي بالعربية لمسافة لا تقل عن 40 كيلو متر بسرعة منتظمة 90 كيلو متر في الساعة بدون تكييف ثم اعادة التفويل مرة اخرى وحساب استهلاك البنزين في الـ 40 كيلو وده لأن الحركة داخل المدينة لا يمكن الحكم من خلالها خاصة القاهرة المزدحمة دائما

**ahmedtito** · 13-06-2010 12:09 PM

الباشمهندس / طارق بصراحة علشان أنا لقيتك فى منتهى الذوق و الأخلاق الحميدة فى ردودك مع الناس فى المنتدى فقررت بعد متابعة أطلب منك إستفسار بسيط محيرنى بقاله شهور أنا أشتريت لانسر كريستالة موديل 2000 glx مانيوال بس لقيت الفرش الدخلى بتاع الأبواب من غير لوحة مفاتيح الأزاز الكهرباء والماكن بتاع الأزاز فأنا عاوز الفرش بتاع الأبواب الأصلى الشمال مش اليمين بتاع الأستيراد ومتعدل شمال أجيبها منين وبكام ؟؟؟؟ ضرورى منين ديه لحسن أنا مش عارف ألقيه فين وبكام وشكرا وأسف طولت عليك.

**مصراوي جدا** · 13-06-2010 01:16 PM

اهلا بيك يا استاذ أحمد وشكر لكلماتك وكنت اتمنى اساعدك انما انا معظم معلوماتي عن ميتسوبيشي من واقع عملي في التوكيل في شركة مصرية مديرا للحاسب الآلي وبالتالي اي معلومات من التوكيل باقدر اوفرها

اما بخصوص موضوع فرش الباب ده فهو من الحاجات اللي مش بنجيبها في التوكيل الا بالطلب وبالطبع هيكون غالي جدا مقارنة بسعره لو جبته استيراد انما للأسف انا ما اعرفش يتجاب استيراد منين غير انه من الحرفيين انما منين بالنحديد مش عارف

وبالتالي السعر كمان مش عارفه