الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة hatem_taia

السلام عليكم و رحمة الله و بركاتة
انا كنت سالت حضرتك عن التكيف و الف شكر على رد حضرتك و اسف لتعب حضرتك معايا
انا عرفت ان الكمبروسر الحمد لله شغال انما المشكلة من الفريون قد اتسرب
و دة بسبب ( بلف ) فلو ممكن اعرف عملية اعادة الشحن تتكلف كام و قد تم اصلاح العيب
و لو ممكن اعرف نوع الفريون المستخدم اية و يتم ظبط ضغطة على كام ( psi )

طيب الحمد لله ان الكمبرسور طلع سليم
نوع الفريون المستخدم R134 و زيت الفريون R134
وسعره 165 جنيه + 10%
الضغط العالي من 12 الى 13 بار
الضغط الواطي من 2.5 الى 3 بار

المشاركة الأصلية كتبت بواسطة meko_s

انا عندى العداد بتاع البنزبن بايظ بومة 2005
رحت للكهربائى قالى دى العوامة وغيرتها مكملتش 1000 كيلو و العداد مش بيقرا تانى
اولا هى كانت ب 150 جنيه بس مش عارف نوعها ايه و لا الاصلى ولا لاء ( واحد قريبى هو اللى اشترهالى)فياريت تقولى
الاصلى بكام و موجودة و لا لاء (انا من اسكندرية)و لو مش موجودة ايه افضل نوع و بكام
تانى حاجة انا كل ما اسال حد يقلى ""عوامة التانك ؟؟؟؟؟؟؟"" هى العربية فيها عوامة تانية؟؟؟؟؟
تالت حاجة ممكن تكون فى مشكلة تانية غير ان العوامة بايظة خصوصا ان العوامة المش اصلية مهما كانت درجة سوءها مش هتبوظ بسرعة كدة غير انى سمعت اسعار لعوامات ب 70 و 85 جنية وشكرا

العوامة واحدة وموجودة في التنك طبعا

هو سعر العوامة الأصلي 425 جنيه + 10% انما فعلا صعب انها تبوظ بسرعة كده وممكن يكون العيب في العداد نفسه وده هيبان من الكشف على العربية

المشاركة الأصلية كتبت بواسطة mohsamir

السلام عليكم

عندى خبطة فى العتبة -العتبة داخلة لجوة معظمها
هل فى جهاز فى التوكيل لشفط العتبة
واية الحل لاصلاحها

لو الخبطة بسيطة نوعا ما ففيه جهاز للشفط بيعالجها

اما لو الخبطة جامدة فبيتم تغيير العتب بالكامل وسعره حوالي 2000 جنيه بالضريبة

اعتقد من كلام حضرتك ان الخبطة مش جامدة فممكن تجيب العربية التوكيل بيشوفها مهندس السمكرة والدهان وبيحدد تتكلف كام وحضرتك تقرر تعملها او لا

المشاركة الأصلية كتبت بواسطة mohamed777

السلام عليكم ورحمة الله وبركاته
معايا لانسر 2007 اوتوماتك 1600 سى سى
من ساعت ماستلمت السيارة فى نوفمبر 2006 ختى الان ماغسلتهاش فى محطة بنزين
يادوب بغسلها من برة وجوة الصالون يدوى فقط
وعاوز اغسلها فى المحطة وخايف احسن المية تبوظ الحاجات الكهربة اللي فيها
ياترى الغسيل ده هيبوظ الكهربة بتاعتها ولا عادى اغسلها فى بنزينة؟

هو فعلا غسيل محرك العربية في محطات البنزين بمسدس الماية ممكن يعمل مشاكل وبالتالي الغسيل بيكون بالهواء والفوم فقط

المشاركة الأصلية كتبت بواسطة M_H

السلام عليكم ورحمه الله يا استاذ طارق
انا معي سياره لانسر 1600 موديل 2007 اتومتيك-انا بحب السياره ديه اوي ومستحيل اغيرها
السئول يا فندم / هل ممكن اركب abs في سيارتي في التوكيل - ويا تري صعب ولا سهل ويتكلف كام
مع جزيل الشكر

للأسف لا يتم في التوكيل تركيب اي نظم غير أصلية في العربية ومنها نظام الفرامل ABS

المشاركة الأصلية كتبت بواسطة cera

انا عندى لانسر 1300 موديل السنادى الى هو شكل البوما اوتوماتيك
و عملت بيها 100 كيلو لانى لسة جايباها
لما جيت نزلت بيها النهارده سمعت زى ما صوت كحت فى الاسفلت صوت متقطع و انا ماشية بيها فدة معناه اية
و هو تشغيل التكييف غلط على1300
و انا ماشية بالعربية دايما بجيبها على ال d
و ما ليش دعوة بباقى السرعات الى هى 1 2 3
هل ده صح و لا غلط
شكرا ليك يا بشمهندس

اولا مبروك العربية
حضرتك محددتيش الصوت جاي منين يعني من الكاوتش ولا من المحرك
وعموما لو حضرتك قلقانة من اي حاجة فيه ممكن تجيبي العربية من دلوقتي حد يجربها من مهندسين الاستقبال معاكي ويطمنك على الصوت ده
تشغيل التكييف مش غلط في الفترة الأولى كل المطلوب خلال الألف كيلو متر الأولى عدم زيادة السرعة عن 90 كيلو متر وعداد لفات المحرك لا يزيد عن 3000 لفة في الدقيقة
فعلا تشغيل الفتيس 99% من الوقت بيكون على الـ d انما استخدام ال 1و2و3 بيكون نادر لأنه بيكون في اوقات خاصة مثل المطالع والمنازل المنحدرة (يعني باجبر العربية على المشي على الأول او التاني او التالت)

المشاركة الأصلية كتبت بواسطة abdullahalbadr

يا باشمهندس طارق أنا فى غاية الأسف والإتذار من حضرتك ، وسامحنى لأنى ما أخدتش بالى من الإجابه ، على العموم ربنا يبارك لك ، ويجعله في ميزان حسناتك ، وشاكر شاكر شاكر لك على الإجابه الكافيه الوافيه وأرجو أن تتقبل إعتذارى مره أخرى
وشكرا جزيلا

لا ابدا يا استاذ عبد الله لا داعي للاعتذار

المشاركة الأصلية كتبت بواسطة dafy001

السلام عليكم ورحمة الله
عندى استفسار محيرنى جدا امتلك سيارة لانسر 2007 رالى ارت 2.0 و الفتيس تترونك بحس بنتشة فى تبديل الغيارات ولا اعرف السبب رحت لميكانيكى قالى ممكن يكون من الزيت لانو محروق فقلت طيب غيرو قالى التغيير على مسؤليتك فاستغربت و سالتو يعنى اية على مسؤليتى قالى فى احتمال اما تغير الزيت للفتيس يضرب و السيارة ما تمشيش ......... افيدونى لانى لا اعرف ماذا افعل السيارة ماشية 98 الف و انا شاريها من شهريين و هى مواصفات خليجى

حضرتك هات العربية للتوكيل وهيتم الكشف على العربية وتوصيلها بوحدة الكشف على الأعطال لتحديد المشكلة فين ويفضل الحضور للمركز الرئيسي في قليوب

المشاركة الأصلية كتبت بواسطة essam1974

السلام عليكم / فى الحقيقة مواضيعكم شيقة جدا
عندى سيارة لانسر 2008 1600 كاملة أوتوماتيك ( هاف سبورت ) عاوز أعمل فحص شامل على كل السيارة ياريت تقولى حضرتك اعمله فين ويكون مكان مضمون ويكون كله كمبيوتريزد

حضرتك هات العربية المركز الرئيسي للتوكيل في قليوب وسعر الكشف الكامل 200 جنيه