الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة elhamidya

السلام عليكم يا بشمهندس طارق

عملت عندكم صيانة لسيارتى لانسر 2005 منذ اسبوع بالظبط ولى تعليق على التوكيل فى قليوب :
اولا: معظم اامشاكل التى ذكرتها لمهنس الصيانه معرفش يصينها وبدل ما يبدى اهتمام بها عمل الصيانات العاديه مثل تغيير سير الكاتينه وتيل الفرامل والتى اعتقد ان الفرامل اصبحت سيئه بعد تغييرها ولذا اريد توضيح نوع التيل الذى تم تركيبه
ثانيا: المعامله من موظف الاستقبال سيئه جدا
ثالثا: اعتقد ان كل هم التوكيل هو جمع اكبر عائ مادى من الصيانه بتغيير اجزاء كانت كويسه وتعمل بشكل جيد فى حين ان الاشياء الضرورية والتى ذكرتها له مثل ثقل الدركسيون (بيريح دماغه ويقول لى عايزه مدفع دركسيون تمنه 2000 جنيه )وايضا موشر السرعات محتاج تغيير 2000 جنيه فى حين ان تكلفة الصيانه من تغيير زيوت وفلاتر كلفتنى 4000جنيه وللاسف انا حاسس ان السياره اداءه انخفض بعد الصيانه وهذا راجع لان التوكيل لا يكلف نفسه تجربة السيارة بعد الصيانه ولتاكيد كلامى انى بعد ما استلمت السيارة وخرجت من التوكيل وجدت الكلاكس لا يعمل علما بانى دخلت التوكيل وهو يعمل بصوره جيدة
رابعا: كلام سيادتك عن ان المهندسين فى التوكيل احسن من نظرائهم فى خارج التوكيل كلام غير صحيح لاى عندم ذكرت مشاكل السياره لمهندس الصيانه وجدته فى حاله فنيه سيئه ودليلى على ذلك هو ان المشاكل بسيارتى لازالت بها والتوكيل فقط مقصور على تغيير الزيوت والفلاتر التى من الممكن عملها خارج التوكيل اما الصيانات الضروريه لا يكلف نفسه عناء بحثها.
من هذا كله افيد علم حضرتك انى فقدت الثقه كليا فى الوكيل ولم اتبع نصح اصدقائى الذين نصحونى بالبعد عن الصيانه فى الوكيل

أهلا يا استاذ محمد

في البداية انا مقدر زعلك من التوكيل مش لأن التوكيل وحش انما لأن العربية اللي حضرتك اشترتها جديد طلع فيها مشاكل كتير وبالتالي ده خلاك زعلان من العربية والتوكيل وكل ما يمت لها بصله وكان لازم حضرتك تكشف على العربية كويس قبل الشراء لأن ممكن العربية كانت شغالة ايجار ولا حاجه ومتبهدلة

انا راجعت ورق العربية بالكامل وصرفت ايه وعملت ايه واسمح لي أرد بالتفصيل لأن دي سمعة التوكيل ولازم كل الناس تعرف اللي تم مع حضرتك بالظبط ايه

اولا : الصيانة والاصلاح المطلوبين عند وصول العربية :
- سرفيس 114 ألف وتغيير زيت موبيل وان
- تغيير زيت فتيس اوتوماتيك وبوجيهات وفلتر هواء وفلتر بنزين
- الكشف على العفشة
- الكشف على مؤشر العدادات RPM وسرعة
- صدمة في الغيار
- تغيير ماء ردياتير (الماء المتغير من عندك)
- الكشف على حركة المرايا
- الكونتاكت صعوبة خروج المفتاح
- الكشف على سخونة المحرك
- الكشف على الدركسيون (وجود بوش به)
- الكشف على الفرامل

ثانيا : الصيانات التي تمت
- سيرفيس 114 ألف (145 جنيه)
- تغيير كاتينة (175 جنيه)
- تغيير قاعدة فتيس (50 جنيه)
- تغيير 2 قاعدة محرك (90 جنيه)
- تغيير فلتر بنزين (50 جنيه)
- تغيير تيل فرامل أمامي (40 جنيه)
- تغيير ثرموستات كوعة (40 جنيه)
- تغيير 2 طقم اصلاح ميزان (40 جنيه)
- فك تابلوه العدادات وتغيير لمبة (40 جنيه)
- تغيير لمبة طفاية وولاعة (10 جنيه)
- فك قلب الكونتاكت وظبطة (50 جنيه)
- تغيير زيت فتيس اوتوماتيك (50 جنيه)

اما قطع الغيار والزيوت المنصرفة فهي كالتالي :
- زيت موبيل وان (210 جنيه)
- فلتر زيت (50 جنيه)

- بوجيهات (90 جنيه)
- فلتر هواء (185 جنيه)
- زيت باور 9 ك × 26 جنيه
- فلتر بنزين 460 جنيه

- سير كاتينة (198 جنيه)
- شداد كاتينة (240 جنيه)
- اويل سيل كرنك (33 جنيه)
- اويل سيل كامة (39 جنيه)
- سير باور (88 جنيه)
- سير تكييف (70 جنيه)

- طقم اصلاح ميزان 2 × 61 جنيه
- قاعدة محرك (235 جنيه)
- قاعدة محرك امامية (245 جنيه)
- قاعدة فتيس (336.5 جنيه)

- غطاء ردياتير (77 جنيه)
- قربة ردياتير (110 جنيه)
- ثرموستات (83 جنيه)
- لمبات (20 جنيه)
- سائل تنظيف (25 جنيه)
- طبة زيت (17.5 جنيه)

تقرير المهندس بيقول ان العربية تعرضت لحادث من أسفل تحتاج تغيير مدفع الدركسيون

موضوع العدادات تحتاج لوحة عدادات وغير موجودة وسعرها حوالي 2000 جنيه

بالنسبة لمعاملة موظف الاستقبال فاللي اتعامل معاك هو المهندس عمرو مدير الاستقبال ولو فيه اي شكوى منه كان ممكن حضرتك تطلب مقابلة مدير مركز الخدمة وتشتكي له رغم ان المهندس عمرو انا اعرفه كويس وانسان محترم

يتضح من الصيانات اللي تمت وقطع الغيار اللي اتغيرت ان العربية كان فيها شغل كتير جدا (صيانة عادية و تغيير طقم كاتينة كامل بكل السيور و تغيير تيل فرامل ثم قاعدة فتيس وقواعد محرك علشان الصدمة او الرجه عند النقل ثم شغل عفشة والعربية دخلت الخميس 30-4 الى الأحد 3-5) وبالتالي حسابها وصل 4000 جنيه

بخصوص المهندسين في التوكيل فهم والفنيين بيحصلوا بشكل دوري على دروات تدريبية يشرف عليها مهندسين من ميتسوبيشي اليابان ويتم تعليق شهادات الدورات في استراحة العملاء ولعلك شفتها

لو فيه اي حاجه حضرتك شايف انها مش مظبوطه من حقك الحضور لاعادة الاصلاح في اي وقت

بالمناسبة تيل الفرامل اللي تم تركيبه هو تيل اصلي بالطبع وسعره 385 جنيه + 10% ض.م والطريف في الأمر انك حاسبت على تركيب التيل وطقم صاجة التيل ولكن لم تحاسب على تيل الفرامل نفسه نتيجة خطأ من موظف صرف قطع الغيار في الورشة وسيتحمل هو قيمتها.

كل اللي اتغير في عربية حضرتك كان لازم يتغير علشان العربية تبقى كويسة انما في التوكيل لا يتم تغيير قطع غيار غير مطلوبة للعربية
بخصوص تجربة العربية فبالتأكيد تم تجربة العربية قبل تسليمها للعميل وخاصة بعد كل الشغل اللي تم فيها ده

المشاركة الأصلية كتبت بواسطة elhamidya

مهندس طارق اكرر شكري لحضرتك لاهتمامك بالموضوع وسرعة الرد ولكن تعليقا على الرد
حضرتك بتتحدث عن تقرير الصيانة بيقول كذا وكذا.........
أين هو هذا التقرير ولماذا لا يسلم للعميل لمعرفة الصيانات التى تمت فى السيارة والصيانات التي لم تتم لعدم توفر قطع الغيار مثلما ذكرت حضرتك أو للتنويه عن عيوب فى السيارة ؟؟؟ وهل من المعقول ان أتسول معرفة الصيانات التى تمت فى السيارة وعذرا على هذا اللفظ ولكن هذا الذى تم بالفعل فالاحق تسليم تقرير بالصيانات اتى تمت
ملحوظه معرفتى بخبطة الدريكسون تمت اثناء سوالى للمهندس عمر اثناء تسلمى السياره عند شعورى بان الاشياء التى ذهبت من اجل صيانتها مثل (الدركسيون –المرايه)لم تتم .
ولى استفسار اخر لماذا لا يسلم للعميل قطع الغيار التى تم تغييره ؟
واكرر لسيادتك عدم تجربة السياره عقب الصيانه حيث ان فرامل السيارة حاليا احس بضعفها عن السابق
فهل تم تغييره بنفس نوع الاصلى التى كان بها ام ماذا ؟
وشكرا مرة اخرى لسيادتك

بالنسبة لتقرير الصيانة هو مش تقرير مطبوع يسلم للعميل وانما ملاحظات يكتبها مهندس المجموعة اللي اشتغلت في العربية على كارت أمر الشغل المرافق للعربية اثناء الصيانة علشان يبلغها مهندس الاستقبال للعميل شفويا

اما بخصوص تحديد الصيانات التي تمت للعربية فالفاتورة تحتوي على قسمين قسم خاص بالمصنعيات فيه كل عملية تمت وتكلفتها كام وقسم خاص بقطع الغيار فيه كل قطعة غيار او زيوت او غيرها تم صرفها للعربية وسعرها كام والاجمالي تحت وبالتالي الفاتورة يتعرف منها كل ما تم عمله في العربية لأنه بيتم المحاسبة عليه

بخصوص تسليم قطع الغيار القديمة التي تم تغييرها فده طبعا من حق العميل وكانت بتتم قبل كده للجميع لكن كثير من العملاء طلبوا عدم استلامها لعدم حاجتهم لها فاصبح الوضع الآن ان يتم تسليم قطع الغيار القديمة للعميل الذي يطلب ذلك

تجربة العربية تتم قبل تسليمها للعميل يعني مهندس من الورشة بيخرج يجربها وبعدين يرجع للورشة تاني وبعدين يبلغ الاستقبال ان العربية جاهزة للاتصال بالعميل للحضور لاستلامها (خاصة للعربيات اللي بتقعد اكتر من يوم زي عربية حضرتك) ولذلك فهي بالتأكيد اتجربت

انما ده لا يمنع ان يكون لك ملاحظات او شكوى بعد الاصلاح ومن حق العميل الرجوع لبحث اي شكوى له بعد عمل الصيانة

تيل الفرامل اللي تم تركيبه هو الأصلي بالطبع انما لو فيه اي شكوى من الفرامل تقدر حضرتك تشرفنا في اي وقت لتجربة العربية والكشف على الفرامل وذلك كاعاده اصلاح دون دفع اي مبالغ اضافية

المشاركة الأصلية كتبت بواسطة ahmedehab

لو سمحت يا باشمهندس انا عندى لانسر 2007 مانوال 1300 عايز اعرف ارقام الrpm المناسبه للغيارات 1_2_3_4 حتى لايوجد عبء على الموتور؟

اهلا يا استاذ احمد
هو علشان الموضوع ميكونش صعب ونعمل جدول وارقام كتير فببساطة طول ما انت في RPM على 3000 لفة فأقل فده كويس جدا وسواقة هادية وممتازة

فوق الـ 3000 وحتى 4000 - 4500 لفه دي سواقة رياضية

اعلى من كده وطالما ما دخلتش في الأحمر تبقى سواقة ناشفة انما البعض بيمشوا كده وسعداء بكده

يعني واضح ان حضرتك سواقتك هادية او تحب انها تكون هادية للمحافظة على المحرك فأعتقد ما بين 2500 - 3000 لفة هيكون مناسب جدا لك

بالنسبة للخليجي فهو ملهوش ضمان عند الوكيل (شركة مصرية) انما ممكن صيانته

لكن بخصوص ضمان الخليجي فيه منه بضمان الرواس (ضمان 3 سنوات او 60 ألف كيلو متر) وفيه منه ضمان مستوردين آخرين بعضهم لمدة سنة واحدة وبعضهم سنتين وفيه منه بدون ضمان خالص واللي بيحدد ده هو المعرض اللي بتشتري منه العربية الخليجي بيقول له العربية بضمان ولا لأ وضمانها تبع شركة ايه او مركز خدمة ايه

علما بأن ضمان مصرية للعربيات المصري بيكون للمالك الأول فقط