الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة sherif0333

استاذ طارق انا معايا شارك 2008 و كنت عملت صيانى الالف فى 1-1-2009 بعد ما عملت الصيانة لقيت الكمبيوتر بتاع العربية كاتب ان الصيانة القادمة بعد 9000 كيلو او 3 شهور و من اول ابريل كل ما دور العربية يكتبلى ميعاد الصيانة الدورية انا استخدامى للعربية مش كتير لغاية دلوقتى انا عامل 4000 كيلو فياريت حضرتك تقولى اعمل اية

هو الفترة الزمنية بتكون تقريبية انما الكيلو متر هو الصحيح يعني الصيانات بتتم عند 1000 ثم العشرة آلاف ثم العشرين وهكذا كل 10 آلاف كيلو وده المعدل الصح اللي الواحد يلتزم به انما التواريخ مش مهمه وبيتم تصفير عداد الصيانة عند عمل الصيانة لحساب الفترة القادمة من جديد

المشاركة الأصلية كتبت بواسطة daash

استاذ طارق

لاحظت شئ غريب بالسيارة ولا اعلم الامر

انا لدى لانسر شارك واقوم بتفويل بنزين 92 ولكن ارى ان العربية ضعيفة فى السحب وبصراحة اتخنقت منها لما ركبت البومة حسيت ان العربية الشارك ضعيفة جداً بالنسبة للبوما .

المهم والدى مره قام بتفويل بنزين 90 للعربية ولقيت العربية بقا حالها غريب لقيتها قوية جداً والسحب بتاعها بقى شديد وحسيت انها اقوى من البوما .

انا لا افهم النظرية فى استخدام بنزين 92 او 90 ولكن السؤال المهم هل يضر السيارة استخدام بنزين 90 ؟؟

ياريت اصحاب لانسر شارك يجربوا بنزين 90 مرة ويقولولنا النتيجة يمكن تكون عربيتى مختلفة :)

بصراحة الكلام غريب لأن المفروض ان العربية يكون اداءها مع البنزين 92 أفضل من اداءها مع بنزين 90 مش العكس واعتقد التفسير الوحيد للكلام ده ان نوعية البنزين الـ 92 اللي استعملتها مش حلوة او من محطة مغشوشة

المشاركة الأصلية كتبت بواسطة johnson

استاذ طارق
مساء الخير دى اول مشاركة ليه
انا محتاج اسال حضرتك سوال
انا هاغير بطارية عربيتى لانسر 1600 موديل 2006
ايه احسن الانواع واجيبها 55 زى اللى ركبه فى العربية ولا اجيبها 70 او 60 محتاج رد حضرتط بسرعة ولو حد من الاعضاء عنده راى ياريت يضيفه و شكررررررررررا

هو دايما التوكيل لا ينصح بعمل اي تعديلات في العربية وبالتالي عند تغيير البطارية يتم تغييرها بواحدة 55 زي اللي فيها

المشاركة الأصلية كتبت بواسطة zonboroky

باشمهندس طارق انا معايا لانسر 99 1300 اوتوماتيك كاربيراتير شاريها من سنتين بس من ساعتها وانا حاسس ان فيها مشكلة في الفرامل بتفوت ساعات وغيرت خزنة الزيت والتيل ولسة برضه ساعات الفرامل تقع لتحت قووي كانها مش موجودة اصلا .ثانيا صوت الموتور عالي قوي ومش ناعم على الرغم اني مش بسيبها عايزة حاجة وبغيرلها كل حاجة بأحسن نوع . فهل ممكن في التوكيل يعملوا فحص للموتور والفرامل ويقولولي لو فيه مشكلة ولاايه الحكاية لاني بدأت اشك انها كانت عاملة حادثة قبل كدة (ربنا يستر )انا متشكر لسعة صدرك

حضرتك شرفنا في توكيل قليوب في اي وقت ويتم الكشف عليها وتحديد المشكلة فين وتتطمن عليها بشكل عام

المشاركة الأصلية كتبت بواسطة amer20042

السلام عليكو انا الدكتور امير على الاسيوطى
من اسيوط انا ممكن اسئل الباشا كام سوئال كده بس معلش هوا قديم شويه
انا معايه عربيه 504 وهغير بعربيه متسبيشى 2004 انت ايه رايك ويا ريت تقولى ايه ميزاهه وايه عيبها علشان انا
حابب الموستبيشى جامد والف شكر للمنتدا الجميل ده و جزاك يا ريت الرد بسرعه يا باش مهندس الله خيرا الجمعة 21 جمادى الأولى 1430

اهلا يا دكتور أمير
لانسر 2004 يعني الشكل البومة ودي بالتأكيد اثبتت وجودها قي مصر ومنتشرة جدا انما حضرتك مقولتش هتجيبها 1300 و 1600 ومانوال ولا اوتوماتيك ، ومبروك مقدما وحضرتك اقرا اكتر في المنتدى هنا هتستفيد كتير عن مميزات وخصائص العربية

المشاركة الأصلية كتبت بواسطة amer20042

وياريت تقولى الاكسسوار الى سمشى علها ايه يا بشمهندس طارق

الاكسسورات الأصلية غالية زي الاسبويلر او لمبات الشبورة انما ممكن برضه تشوف قسم الكماليات في المنتدى هتلاقي فيه حاجات كتير

المشاركة الأصلية كتبت بواسطة invisiblebaby

باشمهندس طارق

بارك الله فيك

أنا مقبل على شراء لانسر بومة 2006 أوتوماتيك سبورت إن شاء الله وأنا مقيم بالمنصورة فهل هناك مركز خدمة قريب من المنصورة لعمل فحص شامل للسيارة ؟؟

وثانياً: قال لي أحد التجار أن لانسر بومة sam موجودة من بداية 2007 ولا يوجد منها قبل ذلك فهل كلامه صحيح؟؟

وأخيراً :
سؤال للباشمهندس طارق أو من يستطيع المساعدة من الأعضاء الكرام

ما هي الطريقة المثلى لفحص السيارة والتأكد من سلامتها قبل الشراء وخاصة أنني من المنصورة كما ذكرت وبالتالي بعيد عن مراكز الخدمة الرئيسية ( أرجو التفصيل في هذه النقطة بالذات وخاصة ممن لهم تجربة سابقة في شراء سيارة مستعملة بالمنصورة )؟؟

آسف للاطالة ولكن الموضوع مهم جدا بالنسبة لي وخبرتي محدودة للغاية في هذا المجال.

وجزاكم الله خير الجزاء واجزل لكم المثوبة والعطاء

فيه مركزين معتمدين للصيانة في المنصورة ممكن تعمل فحص للعربية عندهم وهم الدلتا والعدوي وعناوينهم وتليفوناتهم مذكورة في الموضوع المثبت عن مراكز الخدمة والصيانة

السام هي نفسها السبورت لكن تزيد عنها فرش جلد طبيعي اصلي فقط

اعتقد الطريقة المثلى لفحص السيارة ان تتم في التوكيل او مركز معتمد علشان يكشف عليها من كل النواحي ويديك تقرير شامل عن حالتها من سمكرة وحوادث ودهان اصلي ولا مرشوشة وحالة المحرك والتكييف والفتيس والعفشة

بشمهندس طارق
بعد السلام عليكم عندي استفسار صغير؟
انا عايش في الكويت و ان شاء الله في احتمال كبير اني اجيب لانسر شارك في مصر لما انزل في الصيف و بفكر اني اجيب معايا الجنوط ال 18 انش بتاعت ال gt. يا تري هل ده هياثر علي العربية و لو هياثر هيبقي علي ايه بالظبط

شاكر ليك حسن تعاونك و وفقك الله في مساعدة الناس