الموضوع: انت تسأل وإستشاري منتدى متسوبيشي يجيب (2)

ارجو قبول الاعتذار للتأخر في الرد شوية لانشغالي

المشاركة الأصلية كتبت بواسطة مهندس_حسام حسين

السلام عليكم
إزاي حضرتك يا باشمهندس طارق
انا عملت صيانة ال 1000 كم في فرع موبيل المطار بتاريخ 31-5-2009 وكنت عاوز اعملها في قليوب للتعرف علي حضرتك بس ظروف الشغل والسفر وعندي بعض الملاحظات:-
1- انهم شدوا علي الفرامل الخلفية فهل دة بيتعمل في هذة الصيانة ؟وتلاحظ بعدها بسخونة الجنوط الخلفية
(انا رجعت لهم مرة اخري فاجابوا اننا بنعمل رجلشة للفرامل الخلفية علشان تبقي اقوي وتحسن اداء الامامية) فهل هذا صحيح وهل مكنتش مضبوطة في المصنع وهل دة (السخونة)في الطنابير الخلفية معناها بتاكل في التيل الخلفي0
2- هل الضمان لايتم ختمة بخاتم التوكيل في الصيانة ولا بيكتفوا بكتابة التاريخ وعدد الكيلومترات بة فقط .
3-عندي جانب في الاكصدام الامامي مريح شوية من تحت الفانوس وسألتهم علية فاجابو دة ملوش ضبط.
4-بعد شيل الاستكر العلوي من السقف وجدت دائرة حوالي 5 سم ساقطة من السقف عايزة ترد من الداخل مش عارف حد حمل عليها ولا دي جاية كدة من الشحن بس مكانتش باينة من الاستكر فكيف ترد (هي مش ملحوظة قوي ولكن انا بحب ادقق في كل حاجة)
وشكرا مرة اخري علي الاهتمام0

1- بخصوص رجلاش الفرامل الخلفية فده جزء من الصيانة والمراجعة الطبيعية على العربية ومش معناها انها مكانتش مظبوطة في المصنع أما سخونة الطنابير الخلفية لو كانت في الحدود المعقولة فهي طبيعية ولا تؤثر على التيل او غيره علما بأن التيل الخلفي بيعيش فترة طويلة
2- في محطات الخدمة السريعة التابعة للتوكيل في محطات موبيل بيسجل التاريح وعداد الكيلو متر والفاتورة هي اللي بتأكد على ان الصيانة اتعملت فعلا وعند زيارة المركز الرئيسي او فرع جسر السويس في اي وقت بعدها يمكن ختم الزيارات السابقة لكن عند تقديم الفواتير
3- هم في محطات الخدمة السريعة مش بيقدموا أعمال سمكرة انما فقط ميكانيكا وكهرباء وحضرتك ممكن تعمل ظبط الاكصدام والفانوس ده في المركز الرئيسي او فرع جسر السويس في اي زيارة قادمة باذن الله
4- دي مش هيتحدد علاجها غير بالمعاينة واعتقد من الوصف انها بسيطة باذن الله

المشاركة الأصلية كتبت بواسطة essamalihussein

مساء الخير يا باشمهندس طارق

انا قدامي عربية لانسر 2008 بس مش عارف احدد انها خليجي ولا مصري ولا اردني بس المواصفات اللي فيها هي:
اتوماتيك - ايرباج - فيها جنوط وعتب والاوكر نيكل - والمرايات نفس لون العربية - ولا يوجد بها abs

مش عارف احدد هي اية بالظبط واتمني انك تساعدني

شكرا جزيلا

عصام

طالما فيها ايرباج ومفيهاش abs تبقى مش مصري لأن المصري 1300 بدون ايرباج وبدون abs و1600 فيها الاتنين
والخليجي هتلاقي رقم الشاسيه 6 أرقام والأردني زي المصري 3 أو 4 فقط (الأرقام اللي في الرخصة)

المشاركة الأصلية كتبت بواسطة fashash12

السلام عليكم :
مشكور على تواصلك مع ملاك الميتسوبيشي وجزاك الله عنهم خيرا.
ـ عندي باجيروا 2003 ناقل الحركة فيه تأخير شوية بيطول وبسمع صوت المحرك لمدة ثواني معدودة عند النقل بالأوتوماتك . ولو دوست بنزين يفضل كده على طول لغاية لما يعدي ال100 كيلو وبعدين يغير الرابع مباشرة. الأربي ام بيكون على 3 والمحرك على 100 وبعدين فجأة ينزل على 2 أو فوقها بشرطة واحدة . أو شرطتين . هل يحتاج الأمر غلى تجفيت الجير ولو حبيت أبدل جير كام تكلفته مع التركيب .

اعتقد لازم حضرتك تجيب العربية للتوكيل للكشف عليها قبل ما نحكم ان فيه مشكلة في الجيربوكس وباذن الله يطلع موضوع بسيط

المشاركة الأصلية كتبت بواسطة sweetshero

gr8 topic delwa2ty ana m3aya lancer puma 1.6 2008 mabrkbsh 3'eer teel asly we abs we elmaster we elservo we zyet kolo tmam bs elframel we7sha gedan sa3at teb2a kwayesa we sa3at l2 bgd mara tdos tl2y tmam we mara tdos mabto2fsh fe nas 2altely framel elancer we7sha we hya kda bs ezay ya3ni fa law fe 7al yba katr 7'yerk
دلوقتي انا معايا لانسر بومة 1600 موديل 2008 مبركبش غير تيل اصلي و abs والماستر والسيرفو والزيت كله تمام بس الفرامل وحشة جدا ساعات تبقى كويسة وساعات لأ بجد مرة تدوس تلاقي تمام ومرة تدوس مبتقفش فيه ناس قالت لي فرامل اللانسر وحشة وهي كده بس ازاي يعني فلو فيه حل يبقى كتر خيرك

أولا تم ترجمة السؤال لأن الكتابة بالفرانكو اراب دي ممنوعة في المنتدى اوعى المشرف يشوفنا
هو فيه احيانا ناس بتشتكي من فرامل العربية انما كل شكوى ولها سبب وطالما العربية موديل 2008 يبقى طبعا يجب أن تكون الفرامل سليمة 100%
فأرجو الحضور للتوكيل او اي مركز خدمة معتمد ويقوم مهندس الاستقبال بتجرية العربية مع حضرتك وتحديد المشكلة فين بالظبط وعلاجها ويجب عدم التأخر على الموضوع ده لأن دي مش كماليات دي أرواح ناس

المشاركة الأصلية كتبت بواسطة mghprial

الاخ العزيز والعظيم / الباشمهندس طارق بك

رجائى مواصفان السيارة 2009 Lancr1500 EX GLS
وهل نقل الحركة بفتيس اتوماتيكى عادى او الدائم التغير CVT
واقصد السيارة سبورت
سعرها حاليا فى الوكيل (الحاج سيد الرواس)

ولك منى كل الاحترام والتقدير

سعر العربية الشارك السبورت حاليا في التوكيل 150 ألف
الفتيس فيها اوتوماتيك عادي (للأسف CVT فقط مع 2000 سي سي اللي مش بتنزل مصر علشان الجمارك)
الكماليات

http://www.mitsubishi-motors.com.eg/products/lancer/Lancer%20EX/options.html

تكييف أوتوماتيك
باور ستيرنج
سنتر لوك مع ريموت كنترول
ايموبيليزر
جهاز انذار
4 زجاج كهرباء
مرايات كهرباء
زجاج مانع للآشعة الفوق بنفسجية
زجاج خلفي وزجاج ابواب خلفية فيميه غامق يثبت على الرخصة
فتحة سقف
سبويلر خلفي
جنوط سبور 16 بوصة
راديو سي دي مع 6 سماعات واريال سقف
التحكم في الراديو سي دي من الدركسيون
كساحات أمامية واعتاب جانبية
تشغيل المحرك بدون المفتاح Keyless operation system
فرامل ABS, EBD
2 ايرباج
نظام عازل صوت
فوانيس شبورة
تبريد لدرج التابلوه
عفشة مرتفعة ومخصصة للأجواء المصرية

المشاركة الأصلية كتبت بواسطة dr_sharara

السلام عليكم ارجو معرفة هل هناك فرق بين عفشة اللانسر البومه الهاف سبورت وبين الرياضيه وبين الكلاسيك ؟ هل عفشة الهاف مثل عفشة الاسبورت؟علشان اريد شراء سياره وطبيعة تنقلي في طرق صعبه شويه

كل الفروقات بين اللانسر العادية والسبورت والسام والهاف سبورت في الكماليات اما العفشة فهي رياضية في الجميع

المشاركة الأصلية كتبت بواسطة invisiblebaby

الأخ الفاضل باشمهندس/ طارق
بارك الله فيك

هل هناك اختلاف بين لانسر بومة 2006 سبورت و نظيرتها موديل 2007 ؟؟ ( من حيث مثلاً .. العفشة والجنوط ، وجود فلتر تكييف من عدمه ، أي تعديلات تمت أو اضافات ، إلخ.......... )

هل تم نزول الجنوط ال 15 بوصة مع التعديل الذي حدث في الشكل ( الاكصدام البارز وخلافه ) أم قبله؟

وهل هناك لانسر 2006 سوبر أكشن؟؟

وجزاكم الله خيرا

اهلا يا دكتور
انا هارد هنا ومفيش داعي ارد على الايميل لعموم الفايدة
لانسر 2007 تميزت بالاكصدام البارز عن موديلات 2006
الجنوط الـ 15 بوصة ظهرت مع موديلات 2006 في المحركات 1600 سي سي وبالتالي تغير معاها عفشة الـ 1600 عن عفشة 1300 بجنوط 14 بوصة
لكن 2007 هي نفس عفشة وجنوط 2006
وكذلك فلتر التكييف موجود في 2006

بخصوص الاكصدام البارز هل موجود في 2006
في اواخر موديلات 2006 ظهر موديل سوبر أكشن لأول مرة وكان 2006 وليس 2007 وكان الاكصدام بارز والشبكة شكلها متغير وبالتالي كان الشكل العام مختلف عن الموديلات العادية في 2006 وكان اللي عنده 2006 سوبر اكشن بيحس انه متميز جدا عن العادية او السبورت 2006

اما مع ظهور موديلات 2007 اصبحت جميع العربيات البومة باكصدام بارز وبالتالي اصبح الفرق الوحيد بين السوبر اكشن والسبورت انه بيزيد عنها فرش جلد (والفوانيس الأمامية عادية مش غامقة والخلفية حمراء مش شفافة)

المشاركة الأصلية كتبت بواسطة hus_hti

استاذ طارق
معلش هطول عليك شوية
انا سيارتى البوما موديل 2008
عاملة لحد دلوقتى 8000 كيلو
ومنن حوالى اسبوع فولتها بنزين 92
وبعدها مش عارف اية اللى حصل فيها
بتسحب كويس لحد 60 وبعد كده بتاخد
وقت طويل نسبيا لكى تصل الى سرعات اعلى
ومش عارف اعمل ايه

ومعلش كنت عاوز اعرف ايه الفتحة الموجودة
تحت قدم السائق لانها عندى الغطاء الخاص بها
طلع الى اعلى

يرجى الرد بسرعة لحسن التصرف

وجزاكم الله كل خير .

بخصوص الشكوى الأولى فلازم يتم الكشف على العربية وحضرتك خلاص على مشارف الـ 10 آلاف وهتعمل الصيانة وخلالها ممكن يتم الكشف على العربية

بخصوص موضوع الفتحة الموجودة تحت قدم السائق فهي مش واضحة رغم اني نزلت سألت السمكري عنها فأرجو تصويرها للرد على السؤال