الموضوع: مهزلة المخالفات المرورية

أنا بقى حصل معايا حاجة تحرق الدم بس سبحان اللى خلانى إتعاملت مع الموقف ببرود
كنت راجع من البلد بالعربية ال 128 اللى كانت معايا من حوالى سنة ونص على الطريق الزراعى بعد توشيا العربى و قبل كوبرى الشموت بحوالى 100 متر الفردة اليمين قدام إتخرمت ربنا ستر و شغلت الإنتظار و سبت العربية لحد ما وقفت يدوب فى نص الكوبرى على اليمين و طبعا لحظات مرت ساعات و خصوصا إنى كان معايا مراتى والأولاد و خايف أحسن العربية تتقلب بينا.
المهم وقفت لحظات لحد لما هديت و نزلت علشان أغير الإستبن , الكلام ده كانت الساعة 11 بالليل تقريبا , لقيت أمين شرطة و عسكرى جايين يتمخطروا ناحيتى (بتوع الكمين اللى فى أول الكوبرى ) ولما وصلوا الأمين يقوللى يا بيه ممنوع الوقوف هنا إنت كده بتعطل المرور و هاعملك مخالفة تعطيل حركة السير و كلام كده أنا مافهمتوش لإنى أساسا ملا كنتش مركز معاه و سبته يرغى لحد لما غيرت الإستبن و بعدين بصيتله و قولتله هو فين الحركة المتعطله دى ؟(ده كل دقيقة على لما تعدى عربية) , وبعدين كمان إنت شايفنى واقف بلعب تنس قدامك ما انت واقف فى الكمين و شايف الكاوتش ضرب قدامك بدل ما تيجى تساعدنى و تقول ربنا ستر والعربية ما إتقلبتش , جاى تقوللى ممنوع الوقوف ( حاجة تفقع ) المهم ما لقاش حاجه يقولها غير طيب الشاى بتاعنا المهم لقيتهم مغتتين و لزقة طلعت 10 جنيه إديتهالهم و قولت فى سرى (يصرفوها على المرض والدوا يارب)
آسف للإطالة

أنا مرة برضو الفردة الشمال اللي ورا نامت مني (في ) كمين كفر العرب بين المنصورة و المحلة و ماكانش معايا كوريك
قلت الحمد لله انها نامت في (العمار).و خصوصا انه كان في بوكسين نيسان جداد راكنين (يا رب يولعوا) .

المهم ان الأمناء فضلوا يشقطوني لبعض و أخيرا للضابط اللي قعد يديني محاضرة في فوائد الكوريك و آداب السفر و فضل يأدب فيا ربع ساعة و بعدين قاللي خللي حد من العساكر سواقين البوكس يشوفلك كوريك من معاه

و قعدت أسأل العساكر اللي هما أساسا الواحد مايلبسهمش في ......يجي عشر دقايق و كل واحد محسسني انه هايديني عيل من عياله و فين و فين لما الضابط طلع تاني بره لقاني لسه واقف و هاطلع فلوس خلاص (و انا ماكنتش هاطلع فلوس لو كانوا ماتوا). فقام قاللهم ( مابلاش صداع يا ولاد ال ؟!*%^## ×÷َْ ما تمشوا العربية دي ياللا و خلصونا بقى ) و أخيرا ادوني كوريك من غير دراع (أي و الله) بس أنا اتصرفت و مشيت و أنا باهتف بحياة مصر و باشكر القدر اللي جعلني مواطن مصري و فعلا احنا ظالمين الشرطة جدا جدا







جدا :?

المخالفات ده نصيب و توفيق من عند الله أنا عملت كذا مخالفة قبل التجديد الماضى و عند التجديد لم أجد أى مخالفات و بدون أى واسطة شكرا