ارجوا النصيحة يا جماعة

**Mustafino** · 28-08-2007 04:30 PM

السادة الافاضل، السلام عليكم و رحمة اللة و بركاتة

انا مقبل بمشيئة المولى عز و جل على شراء عربية لادا 2107 زيرو روسى....... يا ترى اية رايكم؟؟؟ علما باننى سوقت لفترة طوياة قبل ذلك عربية 128 فهل سيكون هنالك فرق كبير بين الاثنين لدرجة اننى لن استطيع قيادة اللادا؟؟؟؟

شكرا جزيلا.................Mustafino

**amgad29** · 28-08-2007 05:37 PM

ربنا يوفقك
اللادا انشف شوية من 128 بس مش كتير و خاصة الحديت منها.
اختيار موفق إن شاء الله

**محمد حسين** · 30-08-2007 04:52 PM

يا باشا ربنا يوفقك ويباركلك فيها ان شاء الله
ان هاحاول اساعدك بما ان عندي لادا 2107 روسي بس 2005 وهاقولك علي مزاياها وعيوبها وانت تقرر
المزايا
-عربيه بتتميز بالاعتماديه العاليه والتحمل والأداء الممتاز يعني من العربيات اللي بتستحمل شقا وتعب واظن ان وجودها كتير علي هيئة تاكسي وفي الجيش أكبر دليل
- راسيه وهاديه علي الارض مش زي الـ 128 اللي لو شلت رجلك فجأه من علي الدبرياج تحس ان في حد شد العربيه من ورا مره واحده وتلاقيها بتنتش كده بطريقه تضايقك
-العفشه قويه وتفوت في الحديد زي ما بيقولوا (انا اشك انها عفشه عربيات ربع نقل) :D :D :D :D
-السحب فوق الممتاز يعني الشد وتجميع السرعه بالنسبه لفئتها وامكانيتها
-الفرامل فوق فوق فوق الممتازه (عربيتي داخله علي 50000كم ولسه بفرامل الفبريكه)
-اقتصاديه جدا في استهلاك البنزين بتاخد حوالي صفيحه في مشوار 250 كم
-قطع غيار رخيصه ومتوافره وجميع الميكانيكه بيفهموا فيها
-قابله للإضافات (كاسيت نضيف وسنتر وزجاج كهربا ) وبقا في في توكيلها تركيب باور !!؟؟؟ باور اقولك آه باور للـــ 2107
-الارتفاع عن الارض ناس بتشوفها ميزه وناس بتشوفها عيب انا شايفها ميزه عشان لو معاك حد في العربيه أحيانا بشيل فيها 9 اشخاص عمرها ما تحك في المطبات ابدا وكذلك لما اقف بيها جنب رصيف عالي مش هاضطر اني انط النحيه التانيه عشان انزل
-الثبات والكلبشه في الارض عشان الزوايا بتاعتها ممتازه علي السرعات العاليه لحد 140كم وبعد كده ما اضمنلكش :mrgreen: :mrgreen:
-التابلوه شكله معقول وماسك نفسه وخصوصا التقفيل الروسي والخامات اللي فيه
-العجلات التيوبلس وانت عارف ما هي التيوبلس 50000 كم معايا وما قالتش بم
العيوب
الصوت ثم الصوت ثم الصوت (الموتور صوته عجيب ) كأنك راكب جرار زراعي معلش في اللفظ أنا معايا لادا بردو وزي ما قلت المزايا هاقول العيوب
التعويم علي السرعات العاليه نتيجه ارتفاعها ومقاومتها للهواء
ناشفه نسبيا يعني مش ناعمه زي العربيات الجديده
نصف قطر دورانها ضيق نسبيا بعني لازم تاخد الملف علي الواسع عشان ما تضطرش تقف وترجع وكده
وربنا يوفقك يا باشا ان شاء الله وتاخد القرار السليم

**حسام كرم** · 02-09-2007 10:22 AM

تقييم رائع وشامل يا محمد
وبالنسبة لموضوع الباور يا ريت تعرفنا سالت علية امتى فى التوكيل وكان سعرة كام
واهلاً وسهلاً بك ونورت منتدانا وخصوصا منتدى اللادا
حسام كرم

**محمد حسين** · 02-09-2007 01:42 PM

يا عم حسام انا اللي ليا الشرف ان انضم لمنتدي دميل زي نايل موتورز وابقي نايل موتورزاوي
وليا الشرف انك تعدي علي موضوعي وترد اما بالنسبه للباور ودي كانت المفاجئه انهم قالولي انه هايكون متاح في شهر 9 وانا سئلت عليه بالضبط من شهر وحددولي انه هايتكلف 2000 جنيه بالمصنعيه وانه نازل من الشركه الام عشان يناسب المساحه المتاحه في الحوض من غير عك ولا قص ولا تأثير علي العفشه بالاضافه انه معمر علي حسب ما قالوا وتخيل انت بقا مثلا عربيه لادا 2107 لما تتنقل النقله دي من دركسيون بتحارب معاه لدركسيون زي الميه بس انا شايف ان 2000 ده رقم مبالغ فيه ولا ايه؟

**Mustafino** · 02-09-2007 05:56 PM

الف شكر لكم جميعا يا اخوانى على الرد و الاهتمام................... جزاكم اللة كل خير

Mustafino

**ابوحميد** · 02-09-2007 06:26 PM

2000جنيه رقم مبالغ فيه بالنسبة لباور اى عربية
الا اللادا
اللادا لما يتركب لها باور دا حيبقى عيد ونقلة نوعية و shift تجاه القرن القادم
:mrgreen: :mrgreen: :mrgreen: :mrgreen: :mrgreen: :mrgreen: :mrgreen:

**ahmed1981** · 02-09-2007 06:50 PM

لما تركب اللادا هتحس إنها أحد أقرباء ال 128 (ولاد عم)
وسبب ذلك أن اللادا 2107 مبنية على موديل فيات قديم وهو 124 سنة 1974

بالنسبة للسواقة هتقدر تسوقها عادي مع إحساس بصعوبة الدركسيون المشهورة لكن مقدور عليه

اللادا صالونها من جوة مقارب لل 128 في الحجم (لما كنت راكب اللادا 2107 موديل 2006 كانت راسي واصلة للسقف وده مبيحصلش في ال 128 ) لكن من حيث المساحة الداخلية واحدة تقريباً
الشنطة أكبر بكتير جداً من شنطة ال 128 لكن يوضع في أحد جوانبها الإستبن ولكن تظل أوسع من شنطة ال 128

الكبوت حجمه أكبر بقليل من ال 128

الشكل الخارجي هو نفس الفكر التصميمي الصندوقي مثل ال 128 والشاهين وأمثالهم

قفل الأبواب وفتحها عادي خالص وخشن وصعب شوية

الشكل الخارجي يوحي بالقوة أكثر من ال 128

الشاسيه أمتن من ال 128 وهي سيارة ناشفة فعلا من جانب الشاسيه

بالنسبة للعفشة فهي ناشفة والعربية تشيل فيها مش هتوطى وفيها مشكلة البيض التي تم عمل تعديل بسيط فيها لكن تظل مشكلة البيض (ولكن مع صيانتها الدورية وتشحيم البيض والكشف عليه من فترة لأخرى مش هتبقى مشكلة)
لكن العفشة متينة وتقدر تقاوم شوارع مصر الجميلة مش زي ال 128 تاكل بيها كام مطب جامد وبعدين تقف وتقولك وديني أوام على المكانيكي :mrgreen:

الكرونة الخلفية بها عيب بسيط وهو جوان الكرونة ضعيف وبالتالي يبدأ في التسريب أحيانا وفي حالة تجاهلة الكرونة تفضي الزيت وفجأة تلاقيها بتجعر وغير قابلة للإصلاح وتشترى كرونة تانية تخشلها في 1000 جنيه (ولكن الحل بسيط وهو المتابعة العينية للكرونة ولو ظهر أي زيت عليها فورا تغير جوان الكرونة وتزود الزيت وأحيانا التسريب بيحصل من أويل سيل العجل الخلفي لو لاحظت زيت على العجل الخلفي من الداخل يبقى زيت الكرونة بدون تردد تروح تعمله فوراً) ومع الملاحظة الدائمة عمر الكرونة ما هتبوظ منك

ثبات السيارة منخفض مع السرعات العالية ولكن صوت العربية مش هيخليك تزود عن 100 كلم :mrgreen: ويستحسن تمشي بيها بالمعقول لأنها مش عربية جري قوي

بالنسبة لصوت العربية والخشونة مش هتلاقي أوحش من اللادا في هذه النقطة :mrgreen: وحتى ال 128 تتجاوزها بمراحل في هذه النقطة لكن تظل هذه النقطة مقدور على التعود عليها وقبولها بعد فترة

بالنسبة لتقل الدركسيون حدث ولا حرج ولكن سمعنا أنباء سعيدة من حوالي شهرين إن في تعديل باور هينزل في التوكيل مخصوص لدركسيون اللادا 2107 وأفلحوا إن صدقوا وحتى يصدقوا لابد أن تعود نفسك عليه وتعرف إن دركسيون ال 128 أخف منه طبعاً
والباور لو ب 2000 جنيه ميبقاش غالي ده سعر معقول جداً

الموتور 1600 معقول جداً على العربية ورغم أني مجربتش الإنجكشن لكن أنصحك بيه لأنه أوفر في البنزين وأفضل لأداء الموتور من الكربيراتير عموما في أي عربية
والله أعلم
وفي النهاية لو حضرتك هتجيب لادا زيرو وإنت كان عندك 128 هتحس بفرق وطبعاً الزيرو زيرو مهما كان
ومفيش عربية بدون عيوب وأكثر ما يميز اللادا متانتها وتحملها لشوارع مصر الجميلة
وربنا يباركلك ومتنساش صلاة الإستخارة وكذلك المشورة

ولما تجيبها إبقى قلنا تصوراتك وإنطباعاتك عنها وبالتوفيق

**حسام كرم** · 03-09-2007 09:02 AM

قمت امس بالاتصال بالتوكيل لمعرفة حقيقة البدء فى تركيب وحدات الباور بالسيارة اللادا 2107
حيث اكدوا المعلومة وقالوا انهم فى خلال شهر سيبدوا فى تركيبها
ورقم تلفونهم لمن يريد اى استفسار منهم كالتالى :-
24839645