عايز اتجوززززززززززززززززززززز زززززززززززز

**mtema99** · 29-08-2007 01:22 AM

hehe
شكرا بجد على الروح ديه
و ربنا يديم المعروف
و على فكره ممكن الواحد يتجوز من اي عمر
مش عيب ولا حرام
بل العكس
الرسول وصى ان الجواز يبقى بدري
يارب ارزقني

**PRO-DRIVE** · 29-08-2007 01:26 AM

والله اعرف واحد متجوز و عنده دلوقتي 17 سنه اصغر مني :( بسنه و متجوز من سنه

**kareem_Ashmawy** · 29-08-2007 01:43 AM

السلام عليكم...
بص يا أبو حميد و أنا بقرأ كلامك..كأنك بتتكلم عنى بالضبط
أنا حاسس بكل كلمة بتقولها..و عندى نفس المشكلة
انى مش بعرف أكلم بنات
و بصراحة شايف برده ان فيه شبهة حرام..فبرده مش عارف أعمل ايه.. :(
بس انت ي عم عندك البنات فى الــGUC تشرح القلب الحزين
انما عندنا بأه....أجارك الله
بس أنا بأه يمكن ظروفى أصعب منك شوية
لأنى فى كلية طب ورايح رابعة
يعنى قدامى كده - ان شاء الله - بتاع 3 سنين على ما أتخرج و بعدين سنة او اتنين امتياز
و بعدين الجيش
و بعدين من تلات خمس سنين عشان الماجيستير الى هو هيخلينى ممكن افتح عيادة او اشتغل فى مستشفى محترمة بره او جوة
و الموضوع اصلا مش موضوع امكانيات
لأنك ببساطة لازم تكون بتشتغل عشان ( قدام نفسك و قدام ابو العروسة)
تقدر تطلب ايد بنت
انما لو تحط نفسك مكان ابو لعروسة و تلقى شاب جايلك يقولك انا عايز ايدج بنتك
و هكتب الكتاب على طول و بابا هو اللى هيصرف علينا لغاية ما اشتغل
شوف انت ممكن ترد عليه بيدك و لا برجلك( و لا ايه يا بشمهندس أحمد )

المهم عشان ما أطولش عليك يا ابو حميد..
ان شاء الله بالنسبالك فاضل حاجات بسيطة على ما تخلص بس انت اجتهد فى دراستك عشان ان شاء الله
ربنا يكرمك بشغل
و فى الحالة دى تقدر ان شاء الله تقدم على خطوة الجواز

و لو لقيت حل لموضوع الفراغ العاطفى و الجسدى ( غير الصيام عشان جربته) ميكونش يغضب ربنا
ابقى الحقنى بيه.. :D

تمنياتى لك بالسعادة فى أقرب وقت ان شاء الله
و فضفض يا عم و لا يهمك..احنا هنا كنا اخوات

ألف حمد لله على السلامة يا أ.mtema99

**جندى مجند** · 29-08-2007 01:56 AM

أبو حميد ربنا يثبتك يا رب انه سميع مجيب ... أنا عارف الموضوع صعب و ربنا يكون فى عونك بس فعلاً لو مش حتقدر تتجوز دلوقت خالص (رغم انى أعتقد انك ببعض الالحاح و الاصرار ممكن و أعرف عدة حالات ناجحة و الحمد لله) -- بأقول لو مش حتقدر تتجوز دلوقت يبقى عليك بالصبر ثم الصبر ثم الصبر ... عليك بالاكثار من قراءة سورة يوسف و الجأ الى الله و تضرع اليه كما فعل يوسف عليه السلام:

"قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ وَإِلاَّ تَصْرِفْ عَنِّي كَيْدَهُنَّ أَصْبُ إِلَيْهِنَّ وَأَكُن مِّنَ الْجَاهِلِينَ (33) فَاسْتَجَابَ لَهُ رَبُّهُ فَصَرَفَ عَنْهُ كَيْدَهُنَّ إِنَّهُ هُوَ السَّمِيعُ الْعَلِيمُ"

و مع احترامى لأصحاب الآراء التى تناديك بالانفتاح مع البنات و عدم الخجل من ذلك الا أن رسول الله صلى الله عليه و سلم يقول فى الحديث الصحيح "الحياء شعبة من الإيمان" فما العيب فى الحياء ان كان حياء من المعصية؟ و بعدين أنا للأسف أيام الجامعة كنت "منفتح" كما يطالب البعض و الآن أشعر بالندم الشديد من ذلك و الخوف من كل المعاصى التى ارتكبتها بشكل يومى من تحدث و هزار و خلافه ... و أتمنى لو كان عندى وقتها من خشية الله ما هو عندك ... فتمسك بما تفعل و اصبر و ادع الله أن يثبتك ... و تذكر قول الله تعالى "انما يوفى الصابرون أجرهم بغير حساب" و قوله تعالى الذي نحفظه جميعا "و العصر، إن الإنسان لفى خسر، الا الذين آمنوا و عملوا الصالحات و تواصوا بالحق و تواصوا بالصبر" ...

و احرص على أن تلزم صحبة الخير دائماً ان لم يكن فى الكلية ففى جيرانك و مسجدك "وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا" - الكهف 28

و أدعو الله لك بالتثبيت فالقابض على دينه اليوم كالقابض على الجمر

**معاذ الشرباصى** · 29-08-2007 02:23 AM

يا احمد باشا الزواج مش بس علشان مش قادر تمسك نفسك و كده

الزواج ده ارتباط و مستقبل و شخصين اختاروا يقضوا بقية حياتهم مع بعض

علشان كده لازم يكون فى تخطيط سليم للموضوع, و تتأنى فى اختيار الزوجة الصالحة (تنكح المرأة لاربع, لمالها و جمالها ونسبها و دينها فاظفر بذات الدين تربت يداك)

يعنى متقولش اتجوز واحدة علشان جميلة, او علشان فلوسها او خلافه, اهم حاجة الدين

و من بعده تأتى بقية الحاجات, اللى اختيارها بيتم مع التوافق مع وضع طالب الزواج

يعنى واحد من نفس الوسط او البيئة اللى انت عايش فيها, طموحاتكم و تطلعكم للمستقبل يبقى متقارب علشان ميحصلش صدام فى المستقبل لا قدر الله, شخصيتها و طباعها مناسبة لك, و العكس صحيح

و حكاية انك مبيتكلمش بنات او كده, انا اؤيدك فيها, و انا كمان زيك, و ان شاء الله ربنا هيكرم اللى بيتقى ربه فى الحاجات الصغيرة دى و يرزقه الزوجة الصالحة

**modux** · 29-08-2007 03:02 AM

المشاركة الأصلية كتبت بواسطة معاذ الشرباصى

ة (تنكح المرأة لاربع, لمالها و جمالها ونسبها و دينها فاظفر بذات الدين تربت يداك)

+1

**M_Abdallah** · 29-08-2007 03:20 AM

انا مقدر أوي حالك لأني زيك في صيدلة بس صيدلة الزقازيق في سنة تالته والمفروض دلوقتي ابقي في خمسة بس نزلت سنتين القدر بقي .المهم انا رأي تصبر ومتفكرش في الارتباط رسمي إلا اما تخلص لأن ظروف كليتنا متسمحش لأي ارتباط أثناء الدراسة إلا إذا كنت تقدر تنظم حياتك بس ده انا متأكد انه صعب أوي. وفرق كبير بين اما تتجوز وانت طالب واما تتجوز وانت متخرج وشغال . والموضوع مش مادي ولو كان كده كان زمان الواحد اتجوز من اولي جامعة بس الصيدلي مش بيحس بقيمته الا اما يشتغل ويمارس المهنة بنفسة .واما تتخرج أي بنت هتتمناك ولو الموضوع جامد أوي في دماغك ممكن تخطب في سنه خمسه وتتجوز اما تتخرج بحيث فترة الخطوبة مش تطول.واهم حاجة التزم بالصلاة والعبادة.وربنا يوفقك.

_________________
محمد عبدالله

**ahmed ismail** · 29-08-2007 06:32 AM

احترم الاراء اللى بطالبنى بموضوع الانفتاح على الاخر بس انا كان لى وجهة نظر تانى

اولا: انا مش بعتبر انغلاقى على نفسي ده خجل ولكن بعتبره نوع من انواع الحياء وده لا يدل على ضعف فى فلله الحمد الواحد يملك من الجرأة الكفاية للتعامل مه الجنس الاخر المشكلة من وجهة نظرى فى استمرارية هذا النوع من التعالم انا ارى ان يكون مقتصرا على موقف معين او حاله فرضتها الظروف زى مثلا حضربلكم مثال بيحصل عندنا فى الجامعة عندنا فى الجماعة انا من مؤسسين حاجه اسمها zusammen club وده club لعمل بعض الانشطة الخيرية وكيفة نشر الوعى الاسلامى داخل الجامعة عن طريق حث الطلبة على النشاطات الخيرية حاجة زى ديه انا كنت ماسك فيها موضوع ال fundraising وده بيبقى مخصوص بتنمية الموارد المالية للclub للصرف على ال events اللى احنا بنعملها عن طريق عنل sponsorship and partnarship مع الشركات اللى ممكن تدعمنا فى سبيل الحصول على استفادة اعلانية لها المهم مش حطو عليكم
عشان تقدر تقدم نموذج للمجتمع المسلم كان لازم تعمل حاجه متكاملة فالclub عندنا فى الجامعة بيتكون من ولاد وبنات بيبقو منفصلين عن بعض فى التنفيذ لكن بتبقى الاجندة واحدة بتاعتنا والevents واحدة وليهم نفس ال fundraising resource فكان من الطبيعى ان يحصل اختلاطط ولكن وفق الحدود والضوابط معرفة ومحددة سابقا

القصد ان الموضوع مش نقطة ان الحاجه ديه ممكن تأثر عليه مستقبلا لا ديه حتفيدك ان انت استطعت انك تجاهد نفسك على كده فربنا اكيد حيرزقك الزوجة الصالحة اللى تكون خير تعويض ليك وقرة عين ان شاء الله

**ahmed ismail** · 29-08-2007 06:35 AM

فى نقطة تانية انا نسيت اتكلم فيها بالنسبة ان الواحد يتجوز دلوقتى انا عندى قناعة شخصية ان القوامة بتاعت الرجل بتتاثر جدا فى موضوع مين اللى بيصرف على البيت معلهش لما بابا يصرف عليك ممكن تنزل شوية من نظر القدامك ومن نظر نفسك حتى وبالذات فى نقطة انك تكون مسؤول عن واحدة ومتكفل بيها وفى نفس الوقت فيه لسه اللى نسؤول عنك فده انا بعتبره من التناقض اللى من الافضل ان الواحد يبتعد عنه

**3mr Farrag** · 29-08-2007 08:09 AM

و الله الواحد مش عارف يقول ايه ولا ايه.....
لأن موضوع الجواز ده بقي مش سهل خالص .....يعني الواحد عايز واحده محترمه و عارفه ربنا و بنت ناس بمستوي اجتماعي و مادي كويس و حلوه :lol:

طيب فيه نوعيه من كده؟؟؟؟ ....بصراحه صعب اني الاقي كده
و علي فكره يا احمد انا نفس نظامك مع البنات .....ماليش كلام معاهم غير في الضروره و خلاص.....

و بصراحه فكر كويس في موضوع وقت الجواز ....انا في سنه اولي كنت عايز اخطب بس الحمد لله الموضوع فركش .....و بجد انا بحمد ربنا علي كده .....
لأن لقيت نفسي ما ينفعش في الوقت ده خالص ....مش قبل ما اتخرج و اشتغل حاجه كويسه (و ده بالنسبالي )
فا متتسرعش غير لما تكون مهيأ نفسيا مش عاطفيا.....

و ربنا يهدي البنات اللي مش لمين نفسهم.....و اوعدنا بي بنت الحلال