ههههههه اه طبعا كنت رايق جدااا كمان انا حتي كله بيقولي اتخصص جراحة عشان الروقان دة والجراحة عايزة برود
عرض للطباعة
لأ لما تلاقي واحد ماشي صح مش هايتحرق دمك معاه...
لما تلاقي واحد ماشي صح هايستريح و يريحك...
الاعضاء في المنتدي هنا فوق ال 30,000 يعني رقم مش قليل لو اتفقنا كلنا علي حاجه واحد اكيد هانعمل فرق في الشارع...
اكيد مع الوقت هيكون في اختلاف ملموس مع الوقت...
لو انت عايز تروح اسكندريه من القاهره ماشي اول حاجه هاتعملها انك تمشي خطوه واحده الخطوه ديه مش هاتوصلك بس تراكم الخطوات هو اللي بيوصل...
تراكم العادات الكويسه مع الوقت اكيد هايخلينا نوصل لشوارع منظمه...
وأنا معاكم طبعا ً في الحملة دي ...
وإن كنت أساسا ً وصلت للمرحلة دي من فترة بفضل الله ...
- ليه تتضايق لما حد يكسر عليك ... طالما عدت بخير ومخبطكش يبقى كمل عادي
- لو حد طالع من شارع جانبي وعايز يقطع عليك ، وماله عديه هتخسر بالظبط 5 ثواني ونقلتين تلاتة
صدقوني يا جماعة موضوع الهدوء وعدم التعصب ده بيفيد كتير في السواقة وبيحميك من مصايب كتير
أنا هحكي عن موقف حصلي اتعلمت منه كتير
كنت ماشي في شارع زحمة والعربيات راكنة فيه عمودي على الرصيف ، فأنا كنت ماشي في الحارة الي جنب العربيات الي راكنة ، لقيت واحد بيطلع من الركنة وقفل الحارة بتاعتي ، ضربت إشارة يمين ودخلت الحارة الي جنبها بعد معاناة ، لقيت واحد تاني طالع من الركنة وقفل الحارة الي أنا فيها - مفيش غباء أكتر من كده 0- طبعا ً اتعصبت وسقطت نقلة وحرقت جامد على الغيار ، فجأة لقيت قدامي واحد بارد معدي الشارع بالعجلة وباصص الناحية التانية ، فرملت جامد يا دوب خبطه وهوا وقع بجنبه على الكبوت ، عجلته اتعجنب بس هوا مجرالوش حاجة
من ساعتها وأنا قررت أكون تلاجة في السواقة ، لدرجة الي يقعد جنبي وأنا سايق هوا بيجيلوا الضغط من كتر الغباء الي بيحصل ، بس أنا الحمد لله ولا في دماغي
انا أضم صوتى لصوتك فى الحمله الرائعه دى
وانا ليه تجربه فى الموضوع ده انا كنت لحد سنتين بس بامشى بسرعات عاليه جدا يعنى العادى بتاعى على كوبرى أكتوبر أو صلاح سالم 120 كلم/س بس شاءت الظروف وسافرت للخارج فى أجازه قصيره لمده اسبوعين وهناك اكتشفت ان المتعه فى النظام والهدوء والله أول ما رجعت طبقت الموضوع ده يسلام والواحد ماشى هادى ويعدى الناس وماشى سايب مسافه كويسه بينى وبين اللى قدامى فرقها بسيط والله 5 دقائق فى المشوار كله بس بترجع البيت هادى ومش متنشن ولا عصبى
فعلا القياده متعه مش تضيع المتعه دى بالعصبيه وخليك هااااااااادى الدنيا مش هتطير
فيها ايه لو كل واحد التزم بحارته
فيها ايه لو كل واحد استخدم الإشارات قبل ما يدخل شارع ب 100 متر
فيها ايه لو كل سواقين التاكسى والميكروباص رحمونا شويه من أصوات الكلاكسات المزعجه بتاعتهم
فيها ايه لو الواحد مايشوفش واحد ماشى عكس الإتجاه
فيها ايه لو نحترم المشاه وبره المشاه يحترموا السيارات ويعدوا الشارع من الأماكن المخصصه لذلك
تفتكروا ده حلم ولا ممكن يبقى واقع زى كل شعوب الأرض الا احنا
وياريت ياجماعة كل اللي عنده مقترحات او افكار عشان الواحد ازاي يقدر يسوق بهدؤ ويقدر يفصل نفسه عن اي توتر ممكن يتسببله بسبب السواقة