اسعار السيارات هتنزل ولا هتطلع....

**NoRmAl** · 22-02-2009 01:42 AM

السلام عليكم

انا فى مقدرتى شراء عربيه الان
ولكن طبعا ولاد الحلال مش بيسيبو ودانى
واحد يقولى اتكل على الله مش هتنزل اكتر من كده
وواحد يقلى اوعى..دى هاتبقى برخص التراب بس استنى انت بس.

وانا بقى مش عارف اعمل ايه

انا رايي الشخصى انها هتغلى..
وحجتى بقى ان المصانع قبل الازمه كانت بتصنع كميات كبيره على اعتبار ان الطلب كتير زى كل سنه ولكن مع الازمه اصبح الطلب اقل من المنتج واللى ادى الى انخفاض الاسعار احسن ماتصدى يعنى.
طبعا كل الكلام ده على موديلات 2008
انما نفس المصانع دى لو صنعت موديلات 2009 هاتصنع على اد الطلب وبالتالى هيرجع سعرها زى ما كان.

ما علينا من رايي...رايكم انتك ايه؟؟؟؟؟
ومعلش قلولى وقولوا لكل واحد عايز يشترى عربيه دلوقتى يشترى ولا يصبر و يصبر تقريبا اد ايه؟

شكرا شكرا شكرا

**Hacker5** · 22-02-2009 01:57 AM

اصبر يا باشا شوية الاسعار ان شاء الله هاتنزل و استحالة تغلى و لو مش هاترخص ممكن تتثبت على الاسعار الحالية لكنى مظنش ان دى هاتبقى اخر الاسعار و نتقابل فى الصيف ان شاء الله مع الوكلاء و التجار :)

**Samir Elshahawy** · 22-02-2009 02:19 AM

شوف سعر المستعمل نزل قد أيه و انت تعرف أن الأسعار نازلة نازلة , الوكلاء خلاص بيطلعوا في الروح بس أصبر الي مابعد شهور الصيف و صدقني مش هاتندم

**ahmed_samir_ahmed10** · 22-02-2009 02:40 AM

اصبر وانضم للحملة واعمل زيي انا اجلت الشراء لشهر 8 ومش هتخصر حاجة لو كملت الكام شهر دول بعربيتك القديمة او حتى موصلات اينعم مرمطة بس فى الاخر إن شاء الله انت الى هتستفيد بفرق السعر

**Hosam_Optrawy** · 22-02-2009 03:09 AM

الصراحه حاجه صعب الواحد يتوقعها
الواحد يتمنى ان الاسعار تنزل
بس حاجه مش مضمونه برضه

**Abo_Lina** · 22-02-2009 11:44 AM

انا رأيي اشتري و عيش حياتك بدلا من اهدار الوقت في انتظار المجهول
و زي ما حضرتك شايف الناس بقالها 6 شهور عمالة تقول الاسعار هاتنزل و في الاخر عربية زي اللانوس الجديدة نزلت الف جنيه فقط !
لو عايز تستنى 6 شهور كمان ممكن تنزل كمان الف ولا حاجة

انا ضربت مثل باللانوس لانها عربية لها سوق و بتبيع ..عربيات زي البولو سيدان ليس لها سوق اصلا و ماحدش كان هايشتريها بحملة او بدون حملة..ده غير ان فيه عربيات زي الياريس تمنها زاد بحسب كلام بعض الاعضاء

**dr_abooody** · 22-02-2009 11:52 AM

اصبر شوية لحد الصيف في شهر 7 كدا

انا بردو مأجل الشراء زيك بالظبط

فبلاش تشتري دلوقتي عشان التجار دلوقتي في مرحلة الفرفرة يعني بيعندوا انهم ما ينزلوش الاسعار و فاكرين ان الناس عبط و هيشتروا

بس احنا خلاص من هنا ورايح مش هينضحك علينا تاني
دة كفاية ان برة الاسعار نزلت 50% يعني موديلا 2009 نازلة 50% من سعرها يعني الجمارك بتاعتها هتكون اقل ب 50%

و يفضلوا يقولو ا دة المخزون و احنا عندنا مخزون
طبعا حجة البليد

**badry** · 22-02-2009 12:02 PM

اصبر يا باشا...........

و ردا على الحجة بالحجة...

انا معاك ان مصنعى السيارات هيخفضوا الأنتاج عشان المبيعات قلت و هتقل اكتر...
بس فى نفس الوقت كل المواد الخام الداخلة فى عملية التصنيع رخصت...علشان الحديد و البترول رخصوا جدا...و دول اهم عنصرين بيأثروا فى الخامات...
و رخص البترول معناه شحن ارخص و طاقة ارخص لتشغيل المصانع...

مش بس كده...الأيدى العاملة بقت مستعدة للتنازل عن الحوافز و العلاوات السنوية لتفادى شبح الاقالة الى حصل فعلا....و ده تخفيض للمصاريف...

عشان كل ده العربيات منتظر ترخص ان شاء الله...

و بعدين من غير الحقائق دى و بالمنطق كده...شركات السيارات هتغلى سعر العربية و هى عارفة ان المستهلكين بيعانوا من الأزمة؟؟؟؟ المنطق انها ترخص علشان تشجع الشراء فى الأزمة....و على فكرة الشراء فى الأزمة قرار صعب على اى حد بيشتغل فى قطاع متأثر بالأزمة و مش ضامن بكره فى ايه...

عشان كده مش بس العربيات هيا اللى هترخص....و الوكلاء بتوع مصر بيكابروا و خلاص بدأوا ينزلوا اهم....

و سيبك من اللى يقولك مصر مافيش حاجة فيها بتنزل و الكلام ده...المره دى مش زى كل مره....و مش بس فى العربيات.......

**memoo_1st** · 22-02-2009 12:08 PM

انا رأيي بردو تصبر شوية انا بردو اجلت قرار الشراء والبوادر ظهرت فعلا في هيونداي الي نزلت اسعار عربياتها إن شاء الله الاسعار هتنزل اكتر .
يعني الي اشترا فرنا من شهر خسر فيها دلوقتي 2.000 جنية ودا رأيي وإن شاء الله حملة خلوها تصدي هتجبرهم انهم ينزلوا الاسعار .

الموضوع: اسعار السيارات هتنزل ولا هتطلع....

LinkBack

أدوات الموضوع

عرض

-

-

-

-

-

-

-

المواضيع المتشابهه

ال i30 هتنزل فى اوروبا كمان شهرين, عندنا هتنزل امتى؟

ياترى أسعار السيارات هتنزل بعد إلى حصل فى مصر

هوة اسعار السيارات هتنزل في واحد يناير 2011؟

هل اسعار السيارات هتنزل فعلا؟؟؟

اسعار السيارات بعد ارتفاع سعر البنزين هتنزل ولا ؟؟؟؟؟؟؟؟؟؟؟؟؟

الكلمات الدلالية لهذا الموضوع

المفضلات

المفضلات

ضوابط المشاركة