الموضوع: تجربه استعمال منظفات وبنزين 95 في النيو اكسنت

المشاركة الأصلية كتبت بواسطة حماده المصري

السلام عليكم

ازييكم يا احلى هيونداويه

عامه انا جربت اني احط بنزين 95 ومنظف انجشكن ورافع اوكتين ودي القصه

العربيه بقالي فتره متقلش عن 50 الف ولا غيزت فلتر بنزين واهمال في تغيير الزيت
وفعلا حسيت ان العربيه بتجري بس مش مستريحه والصوت بقا عالي جدا عن الاول ومزعج

غيرت زيت وفلتر وخدوا بالكم الفتره دي في فلاتر مضروبه نازله في البنزينات بتتباع انها اصليه ولكن هي مضروبه ام 10 جنيه وبرضو الفلتر متبرشم وزي الفل
ولازم تتاكدوا انه اصلي بان علامه كيا وهيونداي مكتوبه على الفلتر نفسه الازرق وليس فقط على العلبه او البرشام

-----------
بعد كده دخلت موبيل الي في الرمايه في الهرم
عندك ايه ياعم
قالي في 3 حاجات
اول حاجه بترفع الاوكتين
تاني حاجه بتنضف الانجشكن
والاتنين تمنهم في حدود 20 جنيه
تالت حاجه قزازه فيها الميزتين ترفع الاوكتان وكمان تنضف الانجشكن بس تمنها 53 جنيه هما كتار
بس قولت مش خساره في الانجشكن
وروحت حاطط 20 لتر 92
العربيه صوتها وطي سنه فعلا والسحب والاستهلاك كويسين بس مش فرق ملموس اوي ويحسس الواحد انه عمل حاجه
عملت 100 كيلو واتبقى في حدود 13 لتر في العربيه
ساعتها كنت على دائري المعادي وقولت احط بنزين تاني
شوفت بقى ال 95 اغراااني بصراحه عشان كنت بحطه احيانا كان فعلا بيزبط العربيه
روحت حاطط 15 لتر 95 ب 42 جنيه تقريبا
اول ما طلعت من المحطه العربيه اختلفت اختلاف جذريي فعلا وانا طبعا هاااتك يا جري وهااتك يا غرز
صووت فعلا كويس وناعم مش تجعيير تماما
العربيه الموتور عاايز يجري فعلا واستجاابه احسن من الاول بكتييير
والحاجه الاهم استهلاك البنزين بقى فعلا كويس واتحسن مع العلم ان عربيتي ماشي 125 الف وكمان مجنط
بس فعلا من ساعه ال 95 مقضيها جري وحرق والاستهلاك كويس جدا ال 20 لتر عاملين 210 كيلوو
بالجري والحرق وكمان شغلت المكييف مره الضهر
بس ودي كانت النتيجه
انا شايف ان 95 فعلا مفيد
ومجموع الي عملته على بعضه خلى دي النتيجه
بس ال 95 فعلا هوالي رجع العربيه الى سابق عهدها
بس بصراحه هو يخرب البيييت فعلا
بس مش هتفرق اوي لو 20 لتر 92 ب 38
او 15 لتر 95 ب 43
المعادله هتبقى متساويه من ناحيه الكيلوهات
مع فرق لصالح ال 95 في الصوت وراحه الموتور

مستني ارائكم

والله كلامك مضبوط
بصراحة انا مش ببخل على العربية لما بتكون معايا
انا فعلا جربت الـ 95 فرق بين السماء والارض
صدقوا اولا تصدقوا
انا سفرت السويس حطيت 20 لتر 95 وكانت لاكتمال التانك (يعني فولت على الاخر)
تخيلوا
تجولت داخل السويس
ثم سافرت الى الاسماعيلية
ثم إلى القاهرة
مع تشغيل المكيف
محدش يصعق من الرقم
استهلاك 12 لترفقط!!!!
فعلا صوت الموتور واطي
فعلا سحب فوق الرائع
فعلا هو خراب بيوت لكن مش عارف اقول لكم
لما بشوف بنزين الـ 95 من بعيد بجري ومون منه