الى خبراء النوبيرا

**ahmed1_com** · 23-02-2009 12:27 AM

الى خبراء النوبيرا انا عايز اجيب نوبيرا 2002 اوتوماتيك فياريت اعرف منكم ايه المميزات والعيوب للعربيه

ثانيا معدل استهلاك البنزين اسمه انه عالى جدا فياريت اعرف معدل استهلكها كام

ثالثا ايه الفرق بين الاتوماتيك والمانيوال من حيث فرق السعر والصيانه ووايه الافضل فى النوبيرا

رابعا اسعار قطع الغيار

مستنى ردودكم ضرورى

**HERO_MTN** · 23-02-2009 04:34 AM

انصحك بالمانيوال

انا معايا اتوتو 2006

بس غيرت الفطيس مرة و ربنا يستر

**ahmed1_com** · 23-02-2009 06:14 PM

غيرته بكام يا ريت تقدر تفدنى بتفصيل عن العربيه وانا اصلى قدامى واحده اتوماتيك حلوى فياريت لو تقدر تقلى ايه عيوبه وهو فعلا بيسقط علطول ولا ايه

**moudy88** · 23-02-2009 11:42 PM

انا معايا نوبيرا 2003 اوتوماتيك عامله 75000 كم ..والحمد لله الفتيس زي الفل وماعملش مشاكل ...بس ده مايمنعش ان النوبيرا الاوتوماتيك من اكتر العربيات اللي بيبوظ فيها الفتيس ..علشان مابيستحملش الرجل التقيله وكتر الكيك داون ...لو انت ناوي تجيب اوتوماتيك لازم تكشف على الفتيس كويس بالسكانر وتشوف اذا كان بيتاخر في النقل وفيه نتشه ولو حسيت باي عيب فيه ابعد عنه ....وبعد لما تشتريها ..تغير زيت وفلتر الفتيس كل 15000 كم وتجيب احسن نوع (زيت موبيل ) (فلتر gm) وطبعا ماتبقاش عنيف في السواقه علشان ماتقللش عمره...اما العيوب كاعربيه ...هتلاقيها في السحب اقل شويه من النوبيرا المانيوال وزياده في استهلاك البنزين حوالي 20 كم في الصفيحه...وصوت الماتور اعلى...وياريت لو نويت عليها تصلي استخاره قبل لما تشتريها

**ahmed1_com** · 24-02-2009 07:22 PM

مشكور جدا يا moudy88

ممكن اعرف استهلاك البنزين بيعمل معاك كام فى الصفيحه

وازاى ققدر اكشف على الفتيس بتاعها

وكمان هى تعملها كام العربيه موديل 2003 اتوماتيك

وياريت تفاصيل عن قطع غيرها ومشكور جدا ليك

**moudy88** · 25-02-2009 12:07 AM

ياسيدي لا شكر على واجب ...ممكن تكشف على الفتيس على الاسكانر في اي محطة بنزين محترمه او التوكيل او اي مركز خدمه...وبعد تكشف عليه بنفسك عن طريق سواقتك للعربيه ..بحيث انك تشوفه بيتاخر في النقل (يعني الصوت بيعلى ومافيش سحب) ومع كل نقله بيبقى فيه نتشه في العربيه..ومعدل النقل الطبيعي الاول لحد 20 التاني لحد 50 التالت لحد 80 وبينقل عند (2.5 -3 ) rbm ..مايزيدش عن كده...واستهلاك البنزين حوالي 180 كم في الصفيحه داخل البلد و 210 على السريع ...بالنسبه لقطع الغيار اللي انا اعرفها....
1- فلتر زيت اوتوماتيك كوري 40 جنيه
2- فلتر زيت ماتور 15 جنيه
3-سير كاتينه الاصلي جي ام 85 جنيه
4- ريدياتير كامل 550 جنيه
5-تيل فرامل كوري 45 جنيه
7- بوجيهات 3 شمعه NGK ب 65 جنيه
ممكن تعرف اكتر عن قطع الغيار في المواضيع المثبته في قسم الدايو ... بالنسبه لسعر العربيه 2003 اوتوماتيك لو حالتها نظيفه ممكن تعمل 50000 في ظل الركود في السوق..وخلي بالك من العربيات المضروبه وماتتغرش بالسعر لانك ممكن تلاقيها ب45 الف بالذات الاوتوماتيك........... وشكرا