شكراً على إهتمامك بالرد و أرجو أن يتسع صدرك لردي.
أمريكا فيها عدد من المصانع و التسهيلات لهيونداي و هي:
1- المصنع الأساسي بولاية ألاباما و ده بينتج السوناتا و السانتا في فقط و إحتمال يصنع الإلنترا الهيبريد بعد ما تنزل في كوريا.
2- مركز هندسي للتصميمات و التكنولوجيا في ولاية ميتشيجان.
3- موقع ضخم للتجارب و الإختبارات Proving Ground في صحراء موهافي بكاليفورنيا (و من هنا جاء إسم كيا موهافي) إتبني فيه طرق بتحاكي الطرق الأمريكية و تراكات إختبار.
http://revver.com/video/938745/insid...oving-grounds/
4- مركز للتصميمات الهندسية و الأبحاث بولاية كاليفورنيا و ده إلي إتصممت فيه الإلنترا اللي بتتصنع في مصنع أولسان في كوريا و تتصدر للعالم كله. (الـ I30 إتصممت في مركز هيونداي للتصميمات في Russelsheim بألمانيا لإنها موجهة للذوق الأوروبي لكن برضه متصنعة في كوريا و هي هي الإلنترا في كل حاجة من موتور لشاسيه لكل حاجة لدرجة إن الأمريكان بيسموها الـ Elantra Euro Hatch أوالإلنترا الهاتش باك الأوروبية)
http://www.hyundaiusa.com/abouthyund...nvestment.aspx
بالنسبة لأسس التقييم فإسمحلي أختلف معاك لإن مكتوب إنه معتمد على:
Our car rankings are based on a consensus of America's top automotive experts. The rankings do not rely on our own tests or U.S. News editors' preferences.
و أسس التقييم بالكامل موجودة في اللينك التالي و داخل فيها تقييمات الخبراء للأداء و التصميم الداخلي و الخارجي و تجهيزات السلامة و تقييمات الإعتمادية من JD-Powers و الجوايز اللي واخداها العربية.
http://usnews.rankingsandreviews.com/methodology/
نييجي بقى لمصر... أنا مازلت عند رأيي إن الإلنترا هنا هي الإلنترا هناك مع إختلاف سعة المحرك لكن نفس جيل المحركات و التكنولوجيا بالإضافة للكماليات الغير طبيعية اللي نازلة هناك و تجهيزات السلامة القوية جداً.
و كونها تاخد تقييم أعلى من الكورولا و الانسر و غيرهم في أمريكا فده لإن التقييم معتمد على خليط كبير و متكامل من الأسس اللي رفع الإلنترا فيها عن منافسينها السعر الأقل و تجهيزات السلامة العالية و الضمان الكبير و إنها واسعة لكن محدش قال إنها بمفهومنا إحنا كعربية إنها ركوبة أحسن من المازدا أو الكورولا أو السيفيك مع تحفظي على اللانسر الجديدة.
هو ذكاء مش أكتر من هيونداي إنها تصمم عربية حديثة و مريحة بإيد الأمريكان للذوق الأمريكي أساساً و تدي عليها ضمان كبير و تجهزها بتجهيزات سلامة تزغلل عين المستهلك الأمريكي.. لكن طبعاً كسواقة و إستمتاع بالسواقة فالمازدا 3 مثلاً بالتأكيد أحسن منها و من الكورولا و السيفيك و اللانسر رغم إن تصميمها أقدم منهم كلهم و ده برضه من التقييمات و المقارنات الكتير. النعومة محدش يقدر يتكلم عن نعومة و إقتصادية الكورولا ... الموتور القوي محدش يقدر يزايد على مواتير الهوندا عامة.
الجيتا طبعاً عربية ممتازة بس بالنسبة لخبراء السيارات في أمريكا الإلنترا أوسع و نفس الكماليات و تجهيزات السلامة بسعر أرخص و ضمان أعلى يبقى تقييمات الإلنترا ممكن تكون أعلى .. ده عادي بالنسبالهم لكن لو في مصر حد قال كدة يبقى فيها إهدار دم :khd:
اللينك ده من موقع تويوتا صفحة الكورولا لمقارنة الكورولا بمنافسينها.. حضرتك إختار أي Trim في الكورولا هتلاقي إن by default أول و أكبر منافسينها هما الهوندا سيفيك و الهيونداي إلنترا.. يبقى معنى كدة إن الإلنترا بالتأكيد نفس الفئة...
طب بلاش دي حضرتك إختار في المقارنة مع الكورولا السيفيك و الإلنترا و قارن بنفسك مع التأكيد مرة تانية إن ده موقع تويوتا مش هيونداي و ده من وجهة نظر تويوتا مش هيونداي.
http://www.toyota.com/compare/?model...lla#h_overview
أرجو إني أكون وصلت وجهة نظري بصورة جيدة و في الآخر كلها عربيات
و لسيادتك خالص تحياتي.
