اصطدام ادى الى كسرالبربريز الامامى .........................

**sokasoon** · 30-08-2007 03:21 AM

انهاردا خرجت فشلت غطاء الوتر بروف لقيت خدش فى الرفرف بالطول

قولت الحمدلله انها جت على قد كده المهم ركبت العربية ومشيت روحت

مشوارى ورجعت ركنت العربية وطلعت بعد ساعتين سمعت صوت طراخ

ايه اللى حصل خرجت فى البلكون ولقيت سماعة دى جى على العربية

نزلت بسرعة لقيت عربية نصف نقل بتنزل سماعات دى جى

جيت اشيل الغطاء من على العربية وهيا المفاجأة والبربريز الامامى مدشدش

روحت لصاحب الحاجة قولتلو تعالى شوف عملت ايه قالى مش قصدى وبيعلى صوتو

قولتلو مش زنبى ادفع حقو او تعالى نروح ونغيرو بكره علشان كانت الساعة 3

المهم الراجل كان سىء وماكنش لوحدو دول كانو 6 مع بعض المهم زعقت

معاه جامد وشديت معاه لانو مش معترف بغلطو ويقولى اعمل اللى تعملو قولتلو

انا هوريك هعمل ايه واستحلفتلو انى هقفلو المحل وشديت معاه بالكلام جامد جدااا

وخدت العربية وركنتها فى مكان تانى وبعد ما طلعت البيت بخمس دقايق راح راجع

وقالى غير البربريز وشوف هيتعمل بكام وانا ادفعو قولتلو لا انا عارف ازاى اخد حقى

كويس قالى معلش وحوارات قولتلو تيجى معايا بكره ونروح نغير البربريز الامامى

وتدفع تمنو وهروح بكره ان شاء الله اغيرو ياريت لو حد يعرف تمنو كام تقريبا

ومكان اروح اغير منو البربريز ويكون كويس

**Karim_Monir** · 30-08-2007 05:13 AM

معلش قدر الله وما شاء فعل
انا مش عارف تمن كام بس شوف اقرب فرع للثلاثي فين لو مش لاقي تعالي اللي في جمال عبد الناصر مدخل الحرفيين
وخليك في دكتور جريشماتجيش ام تي ام ولا اي حوار تاني
جريش بس
واغمز الولد بتاع التركيب ب 5 ولا 10 قبل ما يركب عشان يظبطلك السليكون كويس عشان ما يسربش هوا بعد كدة

**sokasoon** · 30-08-2007 05:59 AM

المشاركة الأصلية كتبت بواسطة karim_monir

معلش قدر الله وما شاء فعل
انا مش عارف تمن كام بس شوف اقرب فرع للثلاثي فين لو مش لاقي تعالي اللي في جمال عبد الناصر مدخل الحرفيين
وخليك في دكتور جريشماتجيش ام تي ام ولا اي حوار تاني
جريش بس
واغمز الولد بتاع التركيب ب 5 ولا 10 قبل ما يركب عشان يظبطلك السليكون كويس عشان ما يسربش هوا بعد كدة

هشوف كده يا كريم لو مالقيتش حد قريب منى هروح الحرفيين

وشكراا يا كريم

والحمدلله انها جت على قد كده

**mohsen** · 30-08-2007 09:15 AM

قدر ولطف ومتزعلش نفسك لو عايز الخلاصة اطلع على مصنع جريش ف العاشر من رمضان 24 ساعة ماعدا الجمعة
الزجاج شامل التركيب وتركيب مراية الصالون وكل حاجة 270 جنيه وممكن ياخد منك القديم كمان بمقابل على حسب حالته

Mohsen Ramadan

**MMamdouh** · 30-08-2007 10:20 AM

فى واحد اسمة دقدق فى شارع شهاب... البرابريز كان عمل حوالى 260 او 270 جنية... مش فاكر بالضبط

MMamdouh

**PAYOO** · 30-08-2007 10:42 AM

معلش يا وليد ماتزعلش نفسك أحنا المصريين فقدنا كثير جدا جدا مما كان يميزنا عن باقي الشعوب من جدعنه ورجوله ونخوة ومباقيناش نخاف إلا من العين الحمرا
بس جدع أنك ماتنازلتش عن حقك

روح الحرفيين هاتلاقي في شارع جمال عبدالناصر محل للثلاثي عنده البربريز في حدود 270 جنية وأهو هاتبقى كده قريب من كريم منير يعني ممكن يقابلك وياسلام لو تيجو أنتوا الأتنين عندي نشرب أي حاجه مع بعض كده

**bassam nagy** · 30-08-2007 03:53 PM

قدر الله و ما شاء فعل الحمد لله انها جت على قد كده

**sherif Anton** · 30-08-2007 04:07 PM

انا حصل معايا موقف مشابه من شهرين تقريبا ... وكان يوم خميس وكنت مسافر الجمعة صباحا ... يعني الوقت مزنوق جدا معايا ... رحت غيرت البرابريز عند واحد في شارع دمشق ب 350 جنيه شامل الاكراميات ...بس فعلا لازم تأكد على اللي بيركب انه يهتم بتضبيط السليكون ... الحمد لله ومتزعلش نفسك