سلام عليكم
أنا بفكر إن شاء الله اجيب نيو أكسنت مانويل جديدة
فياريت اللى معاه العربية دى(أو مع حد من صحابه) يقولى رأيه إيه فيها و ملاحظاته عليها
عرض للطباعة
سلام عليكم
أنا بفكر إن شاء الله اجيب نيو أكسنت مانويل جديدة
فياريت اللى معاه العربية دى(أو مع حد من صحابه) يقولى رأيه إيه فيها و ملاحظاته عليها
فى مواضيع كتير عن النيو اكسنت ممكن حضرتك تبص عليها
عامة انا معايا العربية عملت بيها 1500 كم و هى الى الان اكتر من ممتازة و مفيهاش اى مشكلة هى ماتورها 112 حصان نفس تكنولوجيا موتور الالنترا و السيراتو موتور ناعم و سحبة جامد .. موفرة فى البنزين .. غيارتها سهلة اوى .. الباور ناعم .. تقفيل كورى بالكامل ما عدا الكاسيت و الانذار.. باور و تكييف و 4 ازاز كهرباء و كاسيت mp3 و مصدر كهرباء اضافى بخلاف الولاعة و حامل اكواب امامى و خلفى و جراب للنظارة فى السقف .. و انوار امامية للقراءة بخلاف نور الصالون .. شنطة واسعة . الملحوظة الوحيدة اللى كانت فيها ان المارشدير reverse كان بيعلق معايا و قلت على الملحوظة دى فى صيانة الالف و عملوها و بقت مية مية .
و احلى حاجة عاجبانى فى العربية سحبها و التسارع بتاعها العربية بتستجيب معاك فى كسر من الثانية
العربية بصراحة اكثر من رائعة
اضافة لأخويا فوكس الشنطة كمان فيها لمبة
الموديل 2009 الباور بتاعها زيت هيدروليك عكس الموديلات السابقة كهرباء ومفيش لمبة حرارة يعني دور واطلع على طول (بس رأي الشخصي سخن العربية شوية قبل ما تطلع)
انا العربية اللي معايا اتوماتيك ومستغرب جدا انا بمشي بسرعة 140 وساعات 160 (للتجربة فقط طبعا)والتكييف بيكون شغال وبستعمل وقود 92 ومعدل استهلاك البنزين 7.3 لتر بالنسبة 100 كيلو واعتقد انه ده معدل رائع بالنسبة للأخوة اصحاب المانيول ياترى معدل استهلاك الوقود قد ايه؟
في نقطة كمان العربية على فوق سرعة 150 مش ثابتة على الارض وبأكد على المعلومة ديه
وشكرا
العربيه دي تحفه في فئتها فعلا
بس محتاجه مشي بالراحه جوا البلد عشان عفشتها ناشفه شويه
عاليه جدا على الارض عمرها ما تحك على مطب
لدرجه اني بعدي المطب على التاني واحيانا التالت نسيت خالص
قصه اني ادي الاولاني واهدي
هي بتتنطط شويه لما ناس تركب ورا هي عموما الجنط بييزبطها جدا جدا خصوصا لو 15 او 16 هيخلي العربيه تتقل بعد 140 شويه
الباور في 2009 فعلا زيت وده هيخليك حاسس ان العربيه تقيله تحت ايدك بس طبعا هو باور اتقل من العادي
قطع الغيار مولعه فعلا واعلى من فئتها بس انا بقول انها معمره
انا ماشي 130 الف بعربيتيي ومدمرهااا فعلا من ناحيه جري ومطبات وكلام من ده
العربيه بيبوظ فيها الحاجات العاديه غيرت بليه فتيس على 120 تقريبا من كتر الحرق وناس كتييير اساسا بتسوق العربيه بس حتى اسطوانه وديسك زي الفل مع اني مش راحمها
غيرت مساعدين مرتين كل مره على 50 الف بس
اسلوب سواقه بصراحه مصيبه وفي ناس ماشيه اكتر من كده مغيروش حاجه بس بياخدوا بالهم من المطبات والنقر
المقصات اتغيرت مره واحده على 100 الف
هي باختصار تنفع لشاب وتنفع كمان للتزبيط اي حاجه بتلييق فيها جنط فاميه حاجات من دي ممكن برضو سوست رياضيه هتبقى تحفه التحف
بس هي طبعا تعتبر غير مريحه ف مش هتنفع للعائله
لو بتفكر تجيبها عائليه يبقى سيراتو بدون منافس
انا كنت عايز اخد راي الاستاذ حماده بما انه اكتر واحد عنده خبره بالنيو اكسنت
حضرتك بتقول انك عامل بيها 130 الف و العربيه اتبهدلت من سواقتك
بس هل لسه ماسكه نفسها
يعني من ناحيه الاعتماديه؟؟؟ايه الاخبار
انا بحب العربيه دي قوي
بس لازلت محتار بينها و بين المنافسين الجداد ليها زي
الرينو السيمبول
و ال frv
ولا اصبر شويتين و اجيب النترا و اريح دماغي؟؟
ياريت رايك و شكراا
طبعا ياباشا لسه ماسكه نفسها وفي الغالب العيوب الي عندي من العفشه والكلام ده مش بتتلاحظ الا لو حد عارف العربيه ودارسها ولما بتصلح فيها بيبان عليها يعني بزبط العفشه مثلا واغير كوتشات علطول احس بالفرق تصليح عبله دركسيون مثلا تطلع العربيه كانها جديده وماسكه نفسها جدا بس للاسف بتتبهدل مني بسرعه برضو
وانا عامه اثق في عربيتي واسافر بيها في اي وقت وبجري واعدي 180 لمده ساعه كمان واكتر
وعمر ما العربيه وقفت مني خالص
---------------
انا شايف ان المبلغ ده ميدفعش في frv
انا من غير ما اركبها بقول انها ممكن تكون اثبت من النيو اكسنت او انعم مثلا
بس كاعتماديه ف انا برضو بقول انها ضايعه وصالونها في التراوه
واضح جدا جدا انها صيني بس قطع غيارها مش غاليه
مساعد الجالينا تقريبا ب 300 جنيه في التوكيل مش فاهم ازاي لحد دلوقتي وكبلن السبلندور برضو ب 600 جنيه تقريبا ودي ارقام رخيصه جدا جدا
صالون النيو اكسنت افضل جوده واعتماديه مقبوله
الرينو السيمبول معنديش معلومات ليها بس رينو عموما عفشه حلوه
بس الفرنساوي كله بيتبهدل ومينفعش لمصر
بس الاعتماديه فعلا محدش يعرف العربيات دي ايه ظروفها
ممكن تصبر شويه وتجيب اللنترا وانا شايف ده افضل حل
وممكن تجيب جين تو امكانيات ثبات كل حاجه
وانا موجود وممكن تجرب عربيتي لو عايز ومفيهاش اي احراج خالص خالص
متشكر و كفايه ردك جدا
عموما انا هخليني في الهيونداي احسن
بس كل ما اقول هجيب اكسنت الاقي حاجه تانيه بتلعب في دماغي
بس غالبا هي الاكسنت عشان سعرها حنين
في عربيه واحده عايز اشوفها الاول و بعد كده هيكون قراري الاخير
عايز ابص علي الاسكودا روم ستر دي تمنها اول فئه ب 87الف بس!!
وربنا يسهل و مستني بردو شويه الاسعار اخرها فين
اخويا احمد
موضوع البور زيت اعتقد انه افضل لأنه كان عيب في الموديلات السابقة وتم تعديلة في موديل 2009 معلوماتي انه كان بيعوم العربية يعني ممكن تفقد السيطرة مع سرعة عالية شوية
السؤال التاني بتاع حضرتك فعلا العربية لايوجد بها مؤشر حرارة (غير لمبة تحذيرية بتظهر مع بداية التشغيل فقط) انت غير محتاج لتسخين السيارة لكن نصيحة (وده رأي شخصي) سخن العربية شوية عداد الـ RPM بيكون عالي في بداية تدوير السيارة لو تركت العربية في حالة تشغيل شوية العداد بينزل لو انت مستعجل يبقى ممكن تمشي بس مش بسرعة عالية في البداية بكرر ده رأي شخصي
واكيد الزملاء الخبراء اكيد عندهم معلومات اكتر
تحياتي
يا جماعه طيب ليه مفيش مؤشر للحرارة
مش ده غلط ؟
طيب تعرف ازاى حرارة الموتور ؟
ممكن حد يصور العدادات عشان انا شوفت على موقع هيونداى ان فيه مؤشر حراره
اخويا اسامة ازيك الاول
الموضوع بمنتهى البساطة ان مؤشر الحرارة تحذيري فقط بيظهر مع بداية التشغيل
الموديل الجديد في 2009 بيختلف قليلا عن الموديلات السابقة اولا موضوع مؤشر الحرارة
المعلومة اللي عندي ان الموتور مصنع من مادة انتيمونيا وديه من مواتير الجيل الثالث (تقنية الموتور واحدة) CVVT لكن المادة المصنع منها تقريبا هي اللي مختلفة (والله ما كلامي ده كلام البائع)
التعديل الثاني في الباور كان في الموديلات السابقة كهرباء اصبح زيت في موديل 2009
هذا والله اعلم
أكد الموديل الجديد من الجيل الخامس للسيارة هيونداى اكسنت الجديدة قدرته الفائقة على التفوق والتميز عن منافسيه في نفس الفئة قد فازت السيارة "نيو أكسنت" بجائزة أفضل سيارة مرغوبة في فئتها طبقا لـ Edmunds.com لمساحة المقصورة الداخلية.
ليس هذا فقط بل فازت أيضاً بجائزة افضل محرك في فئتها 112 حصان في محرك CVVT و عزم يصل لـ 146نيوتن لكل 4500 لفة، هذا المحرك فائق التطور الذي يملك أقل معدلات استهلاك للبنزين عند بلوغ السرعة المثلى، كذلك أقل معدل اهتزاز و أعلى معدل ثبات.
كما أثبتت السيارة جدارتها على الطرق بفضل أنظمة التعليق الرياضية ذات الخدمة الشاقة، و التي تتوائم مع كافة أنواع الطرق، و توفر الثبات و الهدوء لكل ركابها في أصعب ظروف القيادة.
الاكسنت الجديدة كلياً جاءت بتعديلات متميزة من حيث الشكل الجديد للسيارة الذي بتماشي مع روح العصر و المظهر الجديد للسيارة والذي يعطي الإحساس بالثقة و الفخامة فهي منتج عالي الجودة متوفر بجميع الكماليات، فالخطوط الخارجية لهيكل السيارة تعطي الإحساس بالجمال بالرحابة، كما تعطي صورة متناسقة جذابة و رياضية في آن واحد.
السيارة هيونداى أكسنت الجديدة تعمل علي توفرة فى الوقود بنسبة 35ميل لكل جالون فازت بجائزة أقوى سيارات هيونداى فى فئة حجمها من حيث القدرة على التحمل من خلال مؤسسة "جى دى باور أند أسسوشيتس" فى دراسة قوة تحمل السيارات الصادرة عنها فى 7 أغسطس من عام 2008.
تلك الدراسة التى تنظم المشكلات التى يواجهها المالكين الأصليين للسيارات التى مضى على أول استخدام لها 3 سنوات ( أى الصادرة عام 2005 )، كما تستند هذه الدراسة إلى استجابات ما يزيد على 52000 مالك للسيارات الجديدة التى تم شراءها بين نوفمبر 2004 و أبريل 2005.
الدراسة تعتبر إحدى دراسات "جى دى باور" الثلاث المتعلقة بالجودة بالإضافة إلى دراسة الجودة الأولية التى تقيس جودة السيارة بعد مرور 90 يوماً من الشراء علاوة على دراسة أداء تقيس قدرة العميل على فهم تصميم و محتوى سيارته الجديدة.
منقــــول
طيب ممكن لو حد عنده موديل 2009 يصور العدادت من فضلكم
انا ان شاء الله ناوى اجيب العربيه قريبا
يا جماعه انا لسه شايف ال 2009
هي السنتر مختلف عن 2006 ريموت منفصل عن المفتاح
شكله كوري مش مصري
لما بتدور العربيه اللمبه الحمره موجوده في مكانها بتنور وتطفي اول ما تدور
بس مفيش لمبه رزقا خالص الي هي بتاعه البروده
بسؤال صاحبها هو هو الي بيحصل مع كل النيو اكسنت
يدور ال ار بي ام يبقى عالي يوطى تبقى العربيه سخنت
عامه انا متهيالي زيها زي النيو اكسنت هي حركه عاديه
ومفيش اي جديد
عشان كل التكنولوجي اليي بترفع دورات المحرك بتبقى مش محتاجه تسخين
لكن بالنظر للتجربه العمليه انك تقف تسخن 5 دقايق زي الفل المتور بيقوم صاحي معاك
وده بيبان عكسه على المدى البعيد
عربيتي كاسره ال 100 الف اليوم الي مسخنش فيه احس المتور متدايق وصوته عالي
لما بسخن واطلع بحسه زي الفل
انا معايا العربية 2008 و بردوا الريموت منفصل بس الريموت ايجيبت برده زى ما هو مش كورى ولا حاجة
انا بصراحة مش فاهم زيت هيدروليك اية فى اكسنت 2009 ؟!!1 وكاسيت مصرى اية ؟!! وانذار مصرى اية؟ هو انتم بتتكلمو على عربية تانية غير نيو اكسنت 1600 ؟؟؟وعفشة اية الاى جامدة وبتنط ؟!! اكيد حضرتك اشتريت نيو 128 مش اكسنت انصحك بعها علشان انت كسفتنا بالفتى بتاعك دة
اولا بما ان دى اول مشاركة ليك فالمفروض تاخد واجبك الاول و اهلا بيك فى المنتدى
ثانيا بقى واضح من مشاركتك انك معاك النيو اكسنت و بتحبها اوى .. لغاية هنا مفيش مشاكل بس المنتدى معمول عشان نفيد بعض يعنى لو في حاجة مش هنخبيها بنقولها .. دة مفيهوش حاجة تكسف .
و على فكرة هتلاقى فى المنتدى مجموعات متعصبة شوية للعربية اللى معاهم و لو حد قال فيها اى عيب او مشكلة او انتقدها يعملوها مشكلة .. الموضوع ابسط من كدة.
و على الرغم من انى مش عارف انت بتوجة كلامك لمين .. و لكن كل اللى اتقال دة حقيقى .. مع تصحيح صغير ان الكاسيت و الانذار مش مصرى و لكن يتم تركيبهم فى مصر بمعرفة غبور و موضوع العفشة لما بيتقال عليها ناشفة هى فعلا ناشفة بس مش اوفر يعنى بالعكس ميزتها انها بتتحمل اكتر و بتدى ثبات اكتر
لكن موضوع التنطيط دة بصراحة فعلا محستوش عندى خالص .
و اهلا بيك مرة تانية بس يا ريت بعد كدة تاخد بالك من اسلوبك شوية مش عايزين مشاكل من اولها:satelite:
ياباشا بالراحه مش من اولها كده شمال
وعامه انا من اوائل الناس الي اشترت العربيه دي
وهي عفشتها ناشفه وده شيء معروف جدا
وكمان بتنط سنه وكزا واحد كمان معاه النيو اكسنت قال كده وده سعادتك تلاحظه لما تركب عربيات تانيه هتلاقيها بتنط اكتر منهم وده نظرا للعفشه الناشفه
وده ميمنعش برضو انها افضل عربيه في فئتها ولو رجع الزمن كنت هشتريها برضو
لو سعادك بقى دي اول عربيه تركبها في حياتك ف هتبقى طبعا لا بتتنطط ولا عفشتها ناشفه ولا الهوا
دي بالعكس زي الحرير وحسن عربيه في العالم
وكمان باور ال 2009 هيدروليك والسنتر مش الاصلي ده سنتر مصري وبيتفل في مصر وبصراحه هو اضيع سنتر شوفته في حياتي
هو شكله متغير في ال 2009
بس في ال 2006 كان مفتاحين مصري فيهم الريموت وكمان مكنش بيشتغل الا
من مسافه 5 متر فقط يعني متعرفش تفتح العربيه بالريموت الا وانت واقف جمبها
يا عم فوكس اللى بيشترى حاجة أكيد بيحب يمدح فيها أوى وعلى ما سمعت انك اشتريتها قريب والاكسنت انا معاك عربية مش وحشة بس برضه القرد فى عين امه غزال وكل المميزات دى ممكن تلائيها فى عربية زى السيراتو وهى عربية مش خالدة أوى فاهمنى مش خالدة:36_6_3[1]::36_6_3[1]::36_6_3[1]:
بصوا يا جماعه انا بجد تعبت و محتار موت بين النيواكسنت(اوتوماتيك) و الكيا ريو (اوتوماتيك) ؟
حد يعرف الباور بتاع الريو هيدروليك ولا كهرباء عشان الواحد خلاص خاف جدا من موضوع الباور الكهرباء ده
خلاص ياباشا الباور في النيو اكسنت بقى هيدروليك
وفي الريو برضو هيدروليك
والعربيتين زي بعض مفيش فرق
نيو اكسنت تكسب فرق الموتور
شكرا يا سيد حماده , انا ان شاء الله ناوى على الاكسنت اوتوماتيك بس مش عارف ليه فى هاجس بيقوللى زود كمان و اشترى سيراتواوتوماتيك لكن سمعت انها فيها مشاكل فى العفشة الخلفيه بيظهر صوت دبدبه فى الصباح فقط , على العموم الواحد المفروض يصبر الى شهر 5 يمكن الاسعار تنزل و لا رأيكم ايه يا جماعه
إن شاء الله هتنزل
او يخلوها تصدى جنبهم
موضوع لمبه الحرارة معظم الحديث وتجدها فى اليارس تويوتا مافيها لمبه حرارة بس لما تسخن عن المعدل الطبيعى تولع اشارة حمراء ودة كل الجديد كدة مش هيونداى فقط وبعدين يا ابو الشباب انتى فى الزحمه انصحك تركب اتوماتيك وخاصآ هيونداى فيها الاتوماتيك ممتاز وخلى كلام الورشجيه على جنب هما لسه عايشين عصر الحنطور
أنا لسه مستلم النيو أكسنت مبقليش اسبوعين بس حبيت أدون ملاحظاتي المتواضعة:
1- الشكل: رائع وبه انسيابية
2- مجموعة الألوان كلها حلوة
3- العفشة ممكن تكون ناشفة شوية لكن بسيط مش كتير والكل بيقول انها بعد فترة بتتحسن
4- الباور ممتاز
5- ليست ضيقة
6- الشنطة واسعة
7- الشكل الداخلي رائع ومريح
8- لا يوجد عداد حرارة ولكن ذلك لا يعتبر مشكلة
9- لا توجد الفرامل الـ ABS (ودي اللي كان نفسي فيها)
10- لا توجد الـ Air bag (مش ليها لازمة)
11- خفيفة على السرعات العالية (خليك معقول في السواقة)
من الآخر تمنها مناسب لإمكانيتها ولما ربنا يكرمك ويرزقك بأكتر من كده ،فكر في المستويات الأعلى. ومبروك مقدما