الموضوع: تقرير مبدئى عن صيانة ال5000كم فى مركز صيانة العامرية

دا تقرير ملخص عن زيارتى لمركز صيانة العامرية الموجود فى الكيلو 24 طريق اسكندرية القاهرة الصحراوى لعمل صيانة ال5000كم خصوصاً إنى ما قريتش عنه أى معلومة فى المنتدى ومنتظرين من الأعضاء المتميزين كلام أكثر تخصصية عن المكان
بداية أنا وصلت الساعة 11 ظهراً يوم الخميس 26-2-2009 وكنت عامل بالعربية 5170 كم وكان عندى مشكلتين أساسيتين الأولى إنى كنت باسمع زى ما يكون صوت تصفير هوا بيعدى جوا اسطوانة مفرغة من الهوا ودا بيحصل على السرعات العالية بعد ال140 بعد مرة كده دست على زلطة يمكن خبطت فى البدن من تحت وانا على الصحراوى بعدها بدأت أسمع الصوت ده .. والمشكلة التانية حصلت وانا داخل التوكيل يعنى كانت لسه طازة إنى لما قربت من التوكيل دست على الدبرياش كإنى مورت يعنى ولما السرعة تقريباً ماتت جيت أزود عشان أدخل لقيت العربية بطلت من نفسها دورت ودارت علطول ودخلت
وقفت فى صالة انتظار السيارات جالى موظف أسمر إعتقدت إنه موظف الاستقبال طلب منى كتيب الضمان وكتب فيه التاريخ وعدد الكيلومترات اللى أنا عملتها وطلب منى الانتظار دقيقتين بعدها لقيت موظف آخر أعتقد إنه أحد المهندسين بس لابس بدلة ومعاه جهاز بيسجل فيه سألنى عن أى شكاوى باشتكى منها وقاللى على الروتين اللى حايتنفذ فى العربية (تغيير الزيت وقياس مستويات الزيوت والمياه وتزويدها وتربيط العفشة) وبعدين قاللى أنتظر فى الاستراحة وخلال ساعة ونص تكون العربية خلصانة.
دخلت الاستراحة مكان جميل وهادى ومريح فيه جرايد وتليفزيون كان فيه فيلم على mbc2 وكافيتيريا كويسة بس ملحوظتى عنها عدم تواجد أغلب المأكولات والمشروبات الموجود فى القائمة بس أكلهم كويس وأسعارهم كويسة جداً .
لاحظت جوه الاستراحة إن الاهتمام بالكامل منصب على الرينو فى الملصقات والإعلانات حتى إعلانات الإكسسوارات داخل الاستراحة.
بعد شوية لقيت الراجل اللى استقبلنى فى البداية دخل على خدمة العملا اللى مكتبها جوه الاستراحة ومسك التليفون وبدأ يكلم ناس عملوا الصيانة بتاعتهم من أيام وبيطمن منهم على حالة العربية واللى قال له على مشاكل حصلت معاه طلب منه إنه ييجى عشان يعملوهاله .. بصراحة إتبسطت جداً على الاهتمام ده.
الموضوع غاب معايا لحد ما وصلت الساعة 12ونص يعنى بقالى ساعتين ونص جوه الصيانة رحت لخدمة العملا أستفسر عن سبب التأخير ولما عرفوا إنى صيانة ال5000كم استغربوا من التأخير لأن واضح فعلاً إن الموضوع مابياخدش غير ساعة ونص البنت دخلت على الكمبيوتر لقيت فيه جوب بتتعمل فى العربية داخل الضمان .. انتظرت نص ساعة كمان لحد ما لقيتهم بيندهوا على إسمى رحت أخدت المفاتيح وإيصال الدفع دفعت الفلوس فى الخزينة 140 جنيه بضريبة المبيعات وخرجت قابلت المهندس اللى أخد منى العربية ساعة ما جيت سألته عن اللى حصل فى العربية قاللى إنهم لقوا عيب فى شجرة الجكمان (ودا سبب التأخير فى تسليمها)ودا اللى كان بيعمل صوت مع السرعات العالية .. واضح إنه اتخبط ولا حاجة ..غيروها داخل الضمان وكشفوا على الموتور عشان يشوفوا سبب التبطيل مالقوش حاجة وقاللى جرب ولو فى حاجة أروحلهم.
أخدت العربية ومشيت طبعاً ماكانش فيه المكان المناسب إنى أوصل بالعربية للسرعات العالية عشان أشوف المشكلة اتحلت ولا لأ بس لاحظت إن صوت الموتور عالى شوية لما بازود فوق ال2500كم معرفش ده بسبب إن الزيت جديد ولا أنا بيتهيألى.
بجد حسيت وان هناك قد إيه المعاملة متميزة وحسيت كمان بالاحترافية فى شغلهم .. مجمل الموضوع إنى سعيد جداً بالزيارة دى.
بإذن الله أنا مسافر القاهرة الأسبوع الجاى أى ملاحظات تظهر عندى حاوافيكم بيها
أرجو يكون تقريرى مفيد وآسف للإطالة

المشاركة الأصلية كتبت بواسطة princemady

ألف شكر يا جماعة على الردود الجميلة وكنت نسيت أقوللكم إنى كنت فاكر إن العربية بعد انتهاء الصيانة بتتغسل من بره وجوه .. الحقيقة ده ماحصلش معايا ..أنا بصراحة لسه مابصيتش على الموتور وإذا كانوا غسلوه ولا لأ بس بالنسبة للبدن ماحصلش غسيل .. هل ده الطبيعى فى كل المراكز ولا ده استثناء؟!!!!!!

والله حضرتك في صيانة جين 2 عند عز العرب
الغسيل من برده و من جوه اساسي بعد كل صيانه
بس الله اعلم سياسه التوكيل ايه بالنسبة لكيا !!!