بماذا تساهم في شل و إفساد حركة المرور المصرية ؟

**mshamy** · 01-03-2009 11:24 AM

أولا شكرا على الموضوع الجميل
إخترت نقطتين:بس في أثناء السفر
1- التخطي من اليمين وخصوصا مع مرضى الإلتصاق بالحارة الشمال
2- إستخدام الأنوار العالية و الزينون بدون عدسة و ده علشان باسافر بالليل والنظارة

**tamohsen** · 01-03-2009 01:35 PM

تعدى السرعه القرره داخل و خارج المدينه - بتحصل مني احيانا بس بالعقل
التخطي من اليمين - نادرا وللضروره القصوي

**Amrrr** · 01-03-2009 02:29 PM

تعدي السرعات المقررة داخل و خارج المدينة خطر ومتعب لأعصاب سواق العربية بالذات لو كان بيعرف يسوق لأن المفروض كل مازادت السرعة يزيد التركيز بنسبة اكبر

خطف مسافات عكس الإتجاه للإختصار خطر علي انا شخصيا وطبعا على عربيتي وماليش دية لو اتخبطت او اتشتمت حتى

عدم إستخدام الإشارات و عدم الإلتزام بإشارات الغير اذا كان بيكلح او بيستهبل بقوم طافيها وداخل بلطجة لو الوضع يسمح

المشي ببطئ علي الجانب الأيسر من الطريق مالوش لزمة يتعمل

التخطي من اليمين طبعا اثناء الغرز

الإستخدام المفرط لألة التنبيه مالوش لزمة اصلا ولا أعتمد عليه وأعتمد بس على اني انا اللي أخلي بالي يعني لو واحد اصر يعدي من قدامي بهدي ولو لقيته مصر بافاديه او اقف اذا لزم الأمر - في الأول كنت باضرب كلاكسات واكتشفت انها مش ملزمة للي قدامك انه ياخد باله وانه بيزداد اصرار وعند فبقيت بأكبر دماغي من الموضوع دا

الإنتظار الخاطئ و ركن السيارة صف تاني برضة لأ دا العربية بتتخبط وهي على الرصيف

القيادة المتهورة و الغرز لما تلاقي نفسك مزنوق مع نص نقل على شمالك عمال يحرق وصوت موتوره خارم ودنك وعلى يمينك اوتوبيس كان واقف وطقت في دماغ والدته يطلع من المحطة بعد ما أش الركاب اللي على مزاجة وعايز يجري ووراك سواق تاكسي كابس عليك وعمال زي الاهبل يقلب نور وتيت تيت تيت تيت تيت وقدامك واحد بيتمشى بعربية S class على 40كم في صلاح سالم في الحارة اللي في النص والوضع مستمر لمدة نص دقيقة !!ساعتها مجبر انك تاخد غرزة قدام الوتوبيس وتخطي اللي قدامك من اليمين وتطلع لحد سرعة سبعين كم مثلا وتكتشف ان الطريق قدام كويس وهادي

إستخدام النور العالي بكثرة أو زينون بدون عدسات معنديش زينون ومعلي رجلاش الفوانيس اللي قدام عشان اللي فرحان بنوره وبالزينون وباطفيه فورا لو اللي جاي في وشي قلبلي نور وطفى نوره او اللي قدامي شاورلي انه متضايق غير كدة مش باطفيه عشان اعرف اشوف

عدم إستخدام الأنوار أصلاَ لازم تنورها عشان تبان والناس تشوفك !!مش معنى انك شايف من غير النور يبقى انت في السليم !!لازم تتشاف انت كمان وبالذات في التقاطعات

الإلتصاق بالسيارة التي أمامك أثناء القيادة- لو فرمل مرة واحدة !!شكرا

إستخدام المحمول يدوياَ عربيتي مانيوال بتتعب طبعا في الحكاية دي لكن لو باتكلم ببقى مركز في السواقة اوي وممكن يبقى بيسألني مثلا على حاجة وماجاوبوش عشان باخد غرزة او واحد بيكسر علي او ارمي التليفون من ايدي عشان انقل ساعتها باقوم مزعق للي بيكلمني ( عشان يسمعني لأن الموبايل حدفته جنبي او على الارض مثلا انه يكلمني كمان شوية او هركن وابقى اكلمه)

طولت معلشي :)

**MoToRiZeR** · 02-03-2009 10:07 AM

بارك الله فيكم يا رجالة
معاَ، ايد واحدة نحو القضاء علينا جميعاَ

**dr.nemo** · 02-03-2009 11:02 AM

بارك الله فيكم يا رجالة
معاَ، ايد واحدة نحو القضاء علينا جميعاَ

مش قادر امسك نفسي من الضحك
متخيل انك اتخنقت من الاستطلاع على الخر

بس فاكران احنا لو قضينا على كل الي دخلوا التصويت مشاكل المرور حتبقى اتحلت
مش حتتحل الا لو غيرنا افكارنا الغلط وملناش دعوة بحد

**MoToRiZeR** · 02-03-2009 11:21 AM

المشاركة الأصلية كتبت بواسطة nemo1987

مش قادر امسك نفسي من الضحك
متخيل انك اتخنقت من الاستطلاع على الخر

بس فاكران احنا لو قضينا على كل الي دخلوا التصويت مشاكل المرور حتبقى اتحلت
مش حتتحل الا لو غيرنا افكارنا الغلط وملناش دعوة بحد

هههه لا و الله انا بقولها من باب الهزار انا مش عايز أقضي علي حد لأن الشارع بقي أمر واقع إنه مش هيتصلح (زي ما تقول كدة رميت طوبته)، و مش عامل الموضوع ده للوعظ في الأخر يعني :k38: بس دي صورة مصغرة للشارع .. يعني اما 71 واحد (انا منهم) بيعملوا 187 مخالفة وهما ماشيين بشكل دائم .. يبقي مش لازم نستعجب من الزحمة أو نشتكي .. و إنما يجب أن نفتخر اننا شعب محب للحرية و الإبتكار :10D5C8~1107: ليه الشارع يمشي لما ممكن يقف ؟!

**dr.nemo** · 02-03-2009 11:28 AM

انا عارف طبعا انك بتهزر بس اتخيلت الموقف كده
كان فيه حملة للسواقة برواقة عملها د/تيمو
امشي برواقة ومتحرقش دمك
ان من يوم ماعملت كده ضغط دمي اتضبط
وبدأت معاها اشوف ايه الاخطاء اللي الواحد بيقع فيها علشان ميعملهاش تاني
فاضلي موضوع السرعة ده بس
بس ان شاء الله حبطل من النهاردة

**Amrrr** · 02-03-2009 12:34 PM

71 واحد بيعملوا 187 مخالفة ؟؟؟؟؟؟؟؟؟؟؟؟؟؟؟؟؟؟؟؟؟؟؟
وغالباً معظمهم بيسوق كويس ومش غشم !!أمال باقي الشعب بيعمل ايه ؟ بس تمام الاحصائية دي

**sh23** · 02-03-2009 02:07 PM

مجرد قراءة في الأرقام
558 مشاهدة ؛ 74 مصوت = 13.3 % نسبة المخالفين بس بصراحة أحييهم علي شجاعتهم الأدبية
74 مصوت ؛ ؛ 194 مخالفة = 2.6 مخالفة لكل فرد ؛ ويا تري هذاالعدد في اليوم ولا في المشوار الواحد
45 عدد مجانين السرعة
9 عدد المرشحين للسجن قريباً
2 مالهمش في الإشارات (واخدينها بالدراع)
7 ملتصقين بالحارة اليسري وماشيين يدلعوا
37 يتسببون في إصابة الغير بالصرع نتيجة لخروجهم من الحارة اليمني في لمح البصر
8 سواقين تاكسيات وميكروباص بيلحنوا بالكلاكس
10 عدد المرشحين للكلبشة (صف تاني )
4 إضاءة مبهرة ؛ منكم لله هاتجيبوا لنا العمي
1 وطواط ماشي في الضلمة ؛ يمكن بخيل وبيوفر في فاتورة الكهرباء بتاعة بيتهم
15 بيحبوا الونس ؛ علشان كدة بيركبوا في شنطة اللي ماشي أدامهم
35 ملياردير لا يحلوا لهم إلا عقد الصفقات بالمحمول أثناء القيادة
-------
ملحوظة أخيرة
484 عدد من يخجلون من ذكر المخالفات التي يرتكبونها ( وأنا من الأغلبية )

**pro_samir** · 03-03-2009 06:38 AM

ماهى الدنيا كلها متركبة على بعضها

يعنى لو مفيش حد عندة التصاق فى الحارة الشمال اية اللى هيخلينا نعدى من اليمين .. والغرز نفس الموضوع

لو السرعة القانونية معقولة اية اللى هيخلى الواحد يتجاوزها ، بأى منطق يعنى يبقى طريق مفتوح والسرعة فية 60 حتى الطريق الزراعى اللى المفروض انة طريق سريع فية مناطق كتير السرعة 60 !
حتى ال90 برضو ملل جدا !

وموضوع الموبايل بقى لو كل اللى هيتكلم فى الموبايل ركن على جنب الطريق هيتحول لجراج هههههههه .. هوا غلط طبعا جدا بس الواحد خد علية ونادر جدا ما بيحصل اى مشكلة بسببة

دى الحاجات اللى اخترتها زى ما قلت قبل كدة ودى الأسباب .. لو حد عندة حل يقول !

ودى اكتر 3 اختيارات واخدة تصويت فى الموضوع

مشاهدة نتائج الإستطلاع: ما هي إضافتك الخاصة لإفساد الطريق ؟

الموضوع: بماذا تساهم في شل و إفساد حركة المرور المصرية ؟

LinkBack

أدوات الموضوع

عرض

-

-

-

-

-

-

-

المواضيع المتشابهه

حادث بطريق أكتوبر يشل حركة المرور

حادث بطريق أكتوبر يشل حركة المرور

حركة المرور فى المنصورة بزرميط

احذر الزحام ...انقلاب مقطورة على الدائري يشل حركة المرور في القاهرة

الكلمات الدلالية لهذا الموضوع

المفضلات

المفضلات

ضوابط المشاركة