الموضوع: كيا بيكانتو...صيانة ال60000!

من حوالي شهر و انا بخطط لصيانة ال 60000 للبيكانتو...و عمال أبحث و ادور أعملها فين...خصوصاً انها تعتبر أهم صيانة في تاريخ العربية لأن بها تغيير سيور و بلي بخلاف باقي أعمال الصيانة العادية...

و بما إني كنت مقرر مش هاروح توكيل تاني...رفعت سماعة التليفون و كلمت الجندي....عشان أسأل علي أسعار قطع الغيار و الأسعار كانت كالأتي:

بالنسبة للسيور:
الأصلي(kia):
كاتينة: 150
تكيف و دينامو 95
بلي كاتينة 150
المجموع 395

الإيطالي:
كاتينة 75
تكييف و دينامو 50
بلي كاتينة 60
المجموع 185

فلاتر:
الأصلي (kia):
هواء 45
بنزين 85
زيت 40
المجموع 170
(مسألتش عن المش أصلي عشان أسعارهم كويسة)

يبقي كده مجموع قطع الغيار:
440+170=610(في حالة جميع قطع الغيار الأصلية)
170+185=355 (في حالة طقم الكاتينة الإيطالي)

انا قررت هاخليني في الأصلي في جميع الأحوال و مش هاحط الإيطالي
نزود عليهم زيت شل هيلكس ألترا تقريبا ب 220 جنيه...يبقي المجموع 830

نقول مصنعيات و كلام فاضي يبقي وصلنا لل 1000 جنيه!

قوم ايه....لازم أتصل بالتوكيل أشوف سعر الصيانة عندهم كام...اتصلت ب 19542...و سألت الأنسة علي سعر صيانة ال 60000 للبيكانتو ...قالتلي ثواني هاتصل بمهندس من التوكيل يقول لحضرتك علطول....دقيقة و ردت عليا و بتقولي سعرها 1400 شامل الضريبة و المصنعيات

قعدت أضربها في دماغي...لاقيت انه من الأفضل أوديها التوكيل...خصوصاً ان ديه صيانة محورية في حياة العربية...و إثبات انها اتعملت في التوكيل شئ كويس ...ده غير اني هابقي مطمن عليها و و هاقولهم علي بعض الملاحظات في العربية البسيطة...اللي مافيش ميكانيكي أو صنايعي هايديها إهتمام....و مش مهم فرق ال 400 جنيه...

عقدت العزم و فضيت نفسي يوم السبت اللي فات و روحت محمد زكي القطامية....
طبعاً يوم زحمة جداً و غير محبذ انك تروح فيه لو عندك شغل كتير في العربية...حتي المهندس قالها لواحد كان عايز يعمل شغل كتير في الفرامل...ان يوم السبت مخصص للصيانات السريعة زي ال 20000-30000-40000 و هكذا...لكن الاوردرز التقيلة يستحسن تبقي باقي الإسبوع


المهم كنت تاني واحد أخش للمهندس و قلتله صيانة ال 60000 ان شاء الله...اخد الرخصة و ملا البيانات و قالي عندك أي ملاحظات؟؟

من غير ما أتكلم طلعتله ورقة مكتوبة علي الكومبيوتر و شيك و منظمة...فيها كل اللي نفسي يتعمل في العربية...الراجل انبصت و قالي ريحتني...:)

قعد ينقل الملاحظات في الجوب بدون ما انا أتكلم خالص....و كانوا كالأتي:

• دبدبة و تخبيط بالعفشة
• ضعف شديد بفرامل اليد و عدد تكات كثيرة
• صعوبة بالغيارات الأول و الثاني
• جميع مفصلات و كوالين الأبواب أصبحت خفيفة
• ثقل دواسات البنزين و الدبرياج
• تغيير فلتر التكييف

قالي إتفضل في الإستراحة و هاتخدها علي الساعة 3:30 - 4...(انا كنت هناك 11)

طلعت الإستراحة و قعدت أقرأ في مجلات قديمة....و اتفرجت علي فيلم سهر الليالي من أوله لأخره....و طبعاً كل ده شايف العربية في الشاشات مبطلوش شغل فيها...و كل شوية تروح من حتة لحتة...لحد ما وقفت علي الرافعة و قعدت عليها بتاع 3 ساعات...

لاقيت المهندس بيكلمني و بيقوللي العربية عايزة تيل أمامي...قلتله دا انا لسه مغير تيل و طنابير في أبو رواش من 25000 كيلو...قالي انا قلتلك مليش دعوة بقي...و قفل
بعدها بشوية ...قالي انزلي تحت الورشة....نزلت لاقيته بيفرجني علي التيل...و فعلا كان قرب يجيب اخره خالص...قلتله ماشي...بس مش النهاردة عشان مش عامل حسابي علي الفلوس...

استنيت شوية تاني...و لاقيت مهندس تاني طلع جربها علي الطريق...فا نزلت عشان اشوف ايه الأخبار....قالي عملنالك كل حاجة...بس فرامل اليد مش هاعرف أعملك فيها حاجة لأن التيل اللي ورا قرب يخلص و مش هاينفع أرجلش أكتر من كده عليه....بس هو يمشيك للصيانة اللي جاية...قلتله ماشي...

علي فكرة كلمت الجندي و قالي التيل الأمامي ب 220 الأصلي و ب 70 الجولد الكوري و الخلفي ب 220 الأصلي (مافيش مش أصلي)

المهم...العربية خلصت علي الساعة 5...لأن الشغل فيها كان كتير...و اتغسلت و طلعت بره...جربت الدواسات...لاقيتهم بقوا أنعم...جربت الأبواب...بقوا أتقل :) و هو المطلوب

دخلت بقي عشان أدفع...و لاقيت المفاجأة....

الحساب: 1097 جنيه مصري فقط لا غير

تفصيل الفاتورة:

زيت محرك شل ألترا (3 لتر) 209
فلتر زيت 20
فلتر هواء 36
فلتر تكييف 80
بوجيهات 60
بلية كاتينة 80
سير كاتينة 130
سير دينامو 48
سير تكييف 51
2 لمبة بدون كعب 7
مصنعيات 276
10% ضريبة 99
الإجمالي1097

انا مش قادر أفهم لحد دلوقتي إزاي التوكيل أرخص من بره!!!
و في جميع قطع الغيار التوكيل أرخص!!!
و وقفت الصيانة بالمصنعيات أرخص مما لو عملتها بره!!!

حد يفهمني يا ناس!!!!
__________________________________

ده كان ملخص لصيانة ال 60000 للكيا بيكانتو....أتمني يكون أفادكم و لو فيه أي أسألة انا تحت أمركم :)

الف مبروك وعقبال صيانة ال 120000