لما بتعمل حدثة خبط عربيت حد او حد خبطلك العربية( بتزل تقول اية)

**Samir Elshahawy** · 02-03-2009 09:10 PM

هي مرة واحدة و أنا اللي خبطت العربية اللي قدامي بس هو كان وقف مرة واحدة و غلط و كان غصب عني لأن عربية نقل زنقت عليا فأضطررت أني أخبطه

المهم نزلت بصيت علي عربيتي (كانت متبهدلة طبعا) و أتكلمت مع سواق العربية التانية بمنتهي الهدوء و أطمأنيت أنه و الركاب اللي معاه كويسين و بخير و ماحدش حصله حاجة , وبعدين قولت له أني مستعد لتحمل أي أصلاحات عنده رغم أنه مشترك في الخطأ و فعلا الراجل قدر موقفي و قابل موقفي بهدوء و عدت الحمد لله .

ربنا مايورينا حاجة وحشة أبدا

**Fadi Ezzat** · 02-03-2009 09:40 PM

انا حصلى موقف يضحك جامد اوى اوى كنت بعربيتى الاوكتافيا كنت واقف عادى كنت بوصل اختى الى مكان واما نزلت اتلهيت معاها وانا بنزلها وكنت فاكر انى جايب مارشدير على حرفف r واما نزلتها رحت دايس بنزين وببص لورا واتارى انا كنت جايب d وهوب رحت لازق فى عربية متسوبيشى لانسر مدمر الاكصدام بتاعها والاوكتافيا محصلهاش اى حاجة فالراجل نزل اتخانق معايا وقعد يشتم وينكت فى نفسة قلتلة ياحج شوف الى انت عايزنى اعملهولك وانا اعملهولك طلب منى 700 جنية ادتهملة وكفانى زعيقة

**dr.nemo** · 03-03-2009 02:48 AM

انا مرة خبطت في تاكسي من ورا بس نور الاستوب عنده مكنش شغال وكنا لسه طالعين من اشارة فكانت خفيفة نزل اطمن على عربيته ملقاش فيها حاجة ولقيت ازازالكشاف اليمين عندي انكسر
قالي ياباشا هو انا موعود اني اتخبط اليومين دول ده لسه واحد كاسرلي المراية
قلتله يلا حصل خير ....مش كده وبس وسألته اشتري ازاز الفانوس ده منين ؟؟؟؟
بس كنت رايق قوي ساعتها مش عارف ليه وازاي

**pro_samir** · 03-03-2009 06:25 AM

99% بكون نازل اضحك (مش عارف لية بجد)

الحمد لله نادرا اصلا ما بتخبط ، ومخبطش حد غير مرة زمان خالص فى شارع ترعة الأسماعيلية رجعت ماشيدير على عربية جيب رانجلر هههههه (بضحك برضو)

ربنا يعافينا جميعا