مبروك عليك وربنا يعطيك خيرها ويكفيك شرها
إتفضل يا سيدى
أنا معايا لانسر 98 أوتوماتك 1300 سى سى - وحتكلم عن تجربتى معاها من أول ماإشتريتها من ثلاثة أشهر وكانت عامله 106000 كم
أولا : الزيوت
1- زيت الموتور غيرته بزيت موبيل 1 (متستغربوش) وغيرت فلتر الزيت والحقيقة غيرتهم فى بنزينة عندنا فى سموحة (اكسون موبيل) الزيت والفلتر كانو عاملين يا سيدى 260 جنيه .
2- زيت صندوق التروس غيرته برضه بزيت موبيل جير أوتوماتك إسمه ATF 320 وغيرت فلتر الزيت كمان بس غيرتهم عند ميكانيكى كويس ومغيرتهمش فى البنزينة لأنهم بيعتمدوا على جهاز بيشفط الزيت يعنى مش بيفكوا الطبة وبعدين يربطوها وكمان مكانش عندهم فلتر زيت صندوق التروس فاشتريته من بره أصلى وكان عامل 100 جنيه (عندنا فى شارع صلاح الدين ) .
3- زيت الباور غيرته برضه وهو نفس نوع الزيت بتاع صندوق التروس ويومها العربية أخدت 5 عبوات (أيوه 5 عبوات أدام عينى) العبوة بسعر 24 جنيه .
4- زيت الفرامل غيرته بالكامل (برضه موبيل) فى البنزينة شفط القديم وعبا الجديد والعبوة كانت بـ 14 جنيه تقريبا .
ثانيا : قطع الغيـــار
1- تيل الفرامل الامامى وده غيرته فى توكيل مجدى شاهين اللى فى شارع صفية زغلول أمام المسرح الرومانى ، طبعا أنا روحت هناك علشان يحطولى التيل الاصلى وشوفته يابانى بس مش فاكر ماركته كانت إيه المهم إنى كنت حاسس أنه مش الاصلى بس شغال .. وعموما هما بيدو فاتورة وضمان وسعره 250 جنيه .
2- سير التقسيمة (الكاتينة) ، وسير الباور والتكييف (سير واحد) ، وسير الدينامو إشتريتهم من شارع صلاح الدين سير التقسيمة يابانى وباقى السيور كورى بس محترمين والميكانيكى اللى ركبهم كانوا عاجبينه . وبصراحة الباور فرق معايا جامد بعد ما غيرت السير بتاعه لأنه كان الاول تقيل جدا .. وطقم السيور كان عامل حوالى 160 جنيه .
3- فلتر البنزين وفلتر الهوا إشتريتهم من شارع صلاح الدين ماركة Micro يابانى والميكانيكى ركبهم .. كانو عاملين 90 جنيه .
4- البوجيهات غيرتهم عند مجدى شاهين وكان نوعهم NGK مقاس 16 مللى يابانى .. حسابهم كان 75 جنيه .
5- بطارية جافة 55 أمبير كورى الصنع دفعت فرق سعر بينها وبين القديمة 450 جنيه ، وخليت الكهربائى يغير القواطيش بأخرى جديدة 10 جنيه .
ثالثا: الصيــانه
1- ضبط الكربراتير على السخن وعلى البارد بجهاز كده ، ودا كان فى توكيل مجدى شاهين التكلفة 150 جنيه . والراجل بتاع الصيانة قاللى دا بيتظبط ما بيتنضفش وأوعه حد يقولك الاسبراى بتاع تنظيف الكربراتير ده مش للكربراتير بتاع العربية دى . !!
2- ضبط وتنظيف مجموعة التشوك أو السخان وهو المسئول عن تسخين السيارة بعد التدوير فى الصباح ، ودا كان فى توكيل مجدى شاهين والراجل بتاع الصيانة قاللى الموتور كان عالى من ناحية التشوك وأنا واطيته ومتخليش حد يلعب فيه لأن دا حال العربيات الموديل ده لازم تسخن الصبح كويس يا إما لو مش عاجبك بيتباع استعمال انما مش بيتظبط المهم أنا الكلام معجبنيش فروحت لميكانيكى محترم اللى ركبلى مجموعة السيور وبصراحة الراجل راجع على الشغل وأكدلى نفس الكلام وظبط كهربة الموتور .
3- تنظيف كونترول الجيربوكس وده كان عند الميكانيكى ، لأن العربية كانت بتأخر نقل يعنى صوت الموتور يعلى وبعدين تشد وبصراحة أنا مش عارف ده مكانه فين بالضبط بس هوه يومها فك كارتيرة الزيت الاول وبعدين بدأ يشتغل وكنت بحسب عشان تغير الزيت القديم لازم تفك الكارتيرة بس طلع إن الزيت ليه طبه بيتصفى منها الاول وبعدين تعبى الزيت الجديد من فتحة قياس مستوى زيت الجير بوكس من فوق عادى .. المهم إن بعد الشغل ده وتغيير الزيت والفلتر الخاص بصندوق التروس النقل بقى ماشاء الله زى الفل .
4- ترصيص وظبط زوايا .. بنزينة مصر للبترول شارع بور سعيد أمام نادى المحافظة الشاطبى ، وبنزينة اكسون موبيل اللى فى سموحة برضه كويسين .
5- الكشف على العفشة (مساعدين ، مقصات ، سكاترة ، القنطرة الطولية) وتربيطها .
رابعا: الكماليــات
1- فك جميع الفوانيس وتنظيفها بالماء والصابون من جوه ومن بره وغيرت فوانيس الاشاره اللى قدام كانو مشروخين وشكلهم مش ولابد جيبت نوع اسمه ديبــو ممتاز جدا يعنى خامه لا يمكن تفرقها عن الاصلى صناعة تايوان والفانوسين أخدتهم بـ 65 جنيه جديد بالكارتونة من عند واحد فى الازاريطة إسمه شوقى مزروعه .
2- لمبات فوانيس الاشارة ولمبات النور الواطى فى الكشافات الامامية غيرتهم وجيبتهم أبيض تلجى ، جوز لمبات فوانيس الاشارة عاملين 10 جنيه ، وجوز لمبات النور الواطى عاملين 25 جنيه .. وبصراحة عاملين شغل أنا مش من أنصار الزينون .
3- لمبات الصالون ولمبات التابلوه ولمبات العدادات غيرتهم بالكامل واللمبه إسمها ( سافايه ) وبتعمل نصف جنيه للواحده دى اللى بتركب فى العدادات والتابلوه أما لمبات الصالون فنوع عادى من أم 2 جنيه .. والحاجات دى إشتريتها من عند واحد فى عزبة سعد إسمه سعيد نصار. مع ملاحظة إن فيه لمبات بتبقى مع المفتاح ذات نفسه يعنى عشان تغير اللمبه يبقى حتغير المفتاح - وهما على سبيل الحصر زرار النور الرباعى (الفلاشر) ، وزرار الزجاج الكهربى اللى فى باب السائق – ودول أنا مش غيرتهم .. يعنى بلاهه دول .
4- ركبت إنذار سيمفونى موديل Symphony V300 وبصراحة محترم جدا والحقيقة خليت الكهربائى يوطى الحساس بتاعه جدا لإنى بركن فى جراج وكل اللى عايزه منه إنى أفتح وأقفل العربية بالريموت . ثمن الجهاز 175 جنيه والتركيب 50 جنيه .
5- كل الكماليات دى عملها كهربائى سيارات بس ولد محترم عندنا فى الازاريطة ..
6- فرش أرضية السيارة والشنطة .. فرش جلد ، والحقيقة بعد ما عملته حسيت إنه ملوش لازمه يمكن عشان مطلعش زى ما كنت عايز مش عارف المهم ياخد وقته . وعملت كسوه للكراسى نفس لون وتصميم الاصلى رمادى مش بطال .. طبعا دا شغل سروجى .. على أد حاله .. التكلفة (فرش وكسوة) حوالى 500 جنيه .
خامسا: ملاحظــات
1- بالنسبة للزيوت وقطع الغيار أنصح أى واحد يشترى عربية مستعملة إنه يغيرهم فورا ، وكمان يعمل حساب تكلفتهم مع تكلفة شراء السيارة نفسها عشان يبقى عارف هوه داخل على إيه .
2- بالنسبة للصيانة بتبقى حسب ظروف العربية لكن أنصح بعدم اللعب الكتير فى الميكانيكا لأن العربية دى مش بتاعة لعب وتجارب الميكانيكية اللى إنتو عارفينهم (بيفهموا فى كل حاجة) وأنا عن نفسى شوفت الويل لحد ما لقيت ميكانيكى بيفهم فى العربية دى بالذات ، يعنى مايغركوش إنى مرتب كده لأ دى ممكن تكون الحاجة اتعملت مرة واتنين لحد ما لقيت اللى بيفهم فيها .
3- عيوب العربية دى زى ما انتو عارفين انها واطية وملهاش حل الا الالتزام بمقاس العجل القياسى بتاعها بيبقى مكتوب جنب كرسى السواق بيبان لما تفتح باب السواق عندى المقاس اللى مكتوب 155/80 R13 ، على الرغم إن اللى راكب فعلا مقاسه 185/65 R13 أعرض بس أوطى يعنى مقلكوش على الحك فى المطبات الصناعية .. ربنا يستر .
4- العيب التانـى برضه اللى أنا شايف إنه ملوش حل إن الباور تقيل نسبيا ، والعيب التالت التسخين كويس الصبح يعنى ماينفعش تدور وتطلع .. وعلى فكرة الجرى ورا تظبيط الكلام ده ممكن يعمل مشاكل فى العربية وخصوصا لو الميكانيكى مش لعبته يعنى ممكن تلاقى دخنه وبرجله .
5- أخيرا وليس آخرا – بمشيئة الله- أحب أوجه كل الشكر لكل أعضاء المنتدى المحترم ده وأخص بالشكر السيد المهندس طارق زويل ، والسيد الاستاذ محمد الطويل ، والسيد الاستاذ gemino ، وأخيرا صاحب فكرة الي كل من يمتلك لانسر الكريستاله السيد الاستاذ upnemo .
والرابط ده كمان وإدعيلى ربنا يسترها معايا دنيا وآخره
http://www.nilemotors.net/Nile/showt...412#post297412
المفضلات