الحمدلله رب العالمين استلمت امبارح الماتريكس
السلام عليكم و رحمة الله و بركاته
اخواني في المنتدى كل عام و انتم بخير جميعا بمناسبة شهر رمضان الكريم
بفضل الله تعالى استلمت امبارح الجمعه 31 اغسطس سيارتي الماتريكس الجديده
اولا أحمد ربنا على النعمه الكبيره دي
احمد ر بنا سبحانه و تعالى على نعمه كبيره جدا و هي هذا المنتدى الي فيه اخوه كرام بيتفننو في مساعدة الغير و ابداء الرأي بدون اي مقابل او طمع في اي حاجه
احمد الله ان في منتدى زي ده عرفت منه اراء اصحاب السيارات بكل صراحه بعيد عن عدم ضمير التجار و اصحاب الورش و مراكز الخدمه
الحمدلله استلمت السياره و رأيي المبدئي انها ان شاء الله تعالى و بفضله اختيار صائب
العربيه هايله و تقفيلها هايل و واسعه جدا زي ما قال اخونا الكريم هاني (بايو)
ياريت اي حد في المنتدى عايز ياخد فكره عن العربيه او يجربها كمان لو عايز يشتري ماتريكس يبلغني و يعتبر العربيه بتاعة اخوه
انا استلمتها بدون افراج جمركي لأنه لسه ما وصلش يعني انا ماشي بيها بدون نمر
و بدون كاسيت و انذار كنت جايبلها كاسيت سي دي من برهو قولي روح ركبه في عشم الدوار
رحتله و بعد ما وصلت قالي احنا ما بنركبش غير جي في سي!!
اتصلت تاني ب غبور قالوي ايوه ما دام مش جي في سي لازم يركب في مركز الخدمه بابو رواش (ربنا بحفظكو كلكو!) المهم حسيت ان اليله فيها سبوبه بين مستر عشم و مستر غبور!
عرفت انهم بيركبوه ب 200 جنيه طبعا اتحرق دمي لأني ممكن اركبه بره ب 30 جنيه!
و كمان مظطر استنى ليوم الأحد او الأتنين عشان اروح اركبه
المهم في حاجه تانيه لمبة الصالون و لمبة الباب ما بينوروش قلبت العربيه عشان الاقي مكان الفيوز مش لاقيه حد عنده فكره عن الموضوع ده؟
آخر حاجه انهم مارضوش يسلموني الضمان قالي تاخده و انت بتعمل صيانة الألف؟ ده كلام منطقي؟
عموما زي ما انتو واخدين بالكم ما شاء الله العربيه كلها ايجابيات و سلبياتها حتى الأن في مستر غبور
تحيه طيبه لكل اخواني في المنتدى
عبدالله