الحكاية بالظبط ياجماعة ان يوم العاصفة الترابية اللى كانت من اسبوعين وتحديدا كان يوم خميس وكان الجو لونة اصفر وكلة تراب ورمل بيتطاير فالمفروض ان الناس فى العربيات بيبقوا قافلين ازاز العربية كلة والناس بتمشى بالراحة ومشغلين النور الصغير او الفلاشروالكلام اللى حصل دة الصبح وانا رايحة الشغل وداخل المنطقة التى اسكن بها ، المهم فى ظل الظروف اللى فاتت دى حدث كالتالى انا ماشية ومفيش حد ورايا خالص وفجأة اسمع صوت فرامل من بعيــــــــــــــــــــــ ــــــد وابص فى المراية الاقى عربية لانوس بتقرب بسرعة جدا فحاولت اجى شمال على امل انة يلحق يوقف قبل مايوصلى ولكن قدر الله وماشاء فعل ، العربية خبطتنى ناحية الرفرف اليمين اللى ورا او بيسموها شفة الرفرف او دوران الرفرف ولاقيت الجنط اتنى والفردة بقيت على الارض المهم طبعا غيرنا الفردة بالاستبن ساعتها والجنط اللى التنى استعدلناة ورصصناة لكن اللى مختش بالى منة ساعتها ان الفردة وهى فى مكانها المفروض بيبقى فى مسافة قبلها ومسافة بعدها المسافة اتغيرت يعنى الفردة قربت لقدام وبقى فى مسافة اكبر بعدها ومبقيتش زى الفردة المقابلة ليها الناحية التانية ، يعنى على ماعتقد ان الطنبورة بتاعة الفردة من اثر الخبطة اتحركت من مكانها .
والمهم بردة عايزة اقول حاجة لكل الناس ان لو فى جو مطر اوتراب او شبورة او ايا كان الجو غير طبيعى والرؤية فية مش واضحة لية نجرى واحنا مش شايفين ولما يحصل حاجة لاقدر الله نقول اصل التراب دخل فى عنينا ومخدناش بالنا ، لازم ياجماعة نكون حريصين على ارواحنا وارواح غيرنا ، واسفة للتطويل ولكن حبيت اشرح الموقف كاملا لكى يستفيد كل من يقرأ الموضوع .