الموضوع: سرعات dsl للاعضاء هااااااااااااااااااام.

المشاركة الأصلية كتبت بواسطة CryptonX

امثلة حضرتك ظريفة .. بس تعالي نبص للامثلة الي انا ذكرتها

لعبة او برنامج حضرتك اشتريته او نزلته بيتباع بتمن لا يقل مثلا عن 200 جنيه مصري .

حضرتك سلفته لاصحابك و اصحابك سلفوه لاصحابهم .. و انشتر.

فكرت حضرتك في الي صمم البرنامج او اللعبة ؟ لو واحد لوحده سهر كام شهر او كام سنة يعدل و يحبث و يشتري برامج تانية منتجة علشان يطلع البرنامج او اللعبة الي عملها ؟
وبيبيعوا بتمن لا علاقة له بالتكلفة و انما " عدد المبيعات " هو الي بيعوضع بربح او بخسارة ..

لما تيجي حضرتك تنزله او تشتريه و تسلفه .. غير انك بتخالف قوانين دولية و محلية .. انت كدة بتاخد من حق واحد المفروض تدفعله .. دي مش سرقة ؟

السرقة مش حرام ؟ ولا هي السرقة كسرقة حرفية بس ؟

حط نفسك مكانه انت صاحب برنامج جديد مثلا .. و نزلته في السوق .. ايه شعورك لما تخش منتدى تلاقي الوف منزلاه كانه مجاني ؟
هل ده يشجعك انك تطوره ؟ او حتى تكمل عملك ؟

ياريت تفكر زي موقلتلك والي حيقولي معندوش امكانية .. لا عنده بس لو يفكر صح .. يعني الي بيقى راكب عربية و يروح يشتري جنط ب 5000 جنيه ؟ ليه مش بيسرق الجنط ؟ و لا ليه مش بيشاركه مع واحد صاحبه ؟

البرامج و الالعاب و الخدمات الالكترونيه ماهي الا سلعة تجارية هي الاخرى .. و بالتالي مايسري علي اي سلعة يسري عليها !

بس احنا علشان الموضوع بقى سهل جدا خلاص .. استسهلنا فنسينا ان الي بتعمله ده حرام !

---



يا سيدي انا مش غني و لا اي حاجة .. و الي زي منت بتقول علي قد لحافة .. ميشتركش في انترنت اصلا و يوفر فلوسه لحاجة افيد ..

و لو واحد شغله انترنت يبقى اكيد شركته فيها نت .. لو مسالة حياة او موت يبقى ازاي تسترخص تشترك لوحدك ؟؟
مش معنى مبسترتخش تشتري لحمة ؟ متشاركه مع جيرانك ؟

ده غير ان العقد الي انت ماضي عليه او غيرك صاحب الخط ماضي عليه مذكور فيه بند عن مشاركة الخدمة و منعها ..

طب انت مش ماضي .. صاحبك ده مش ماضي ؟ طب كدة مخالفش العقد ؟؟ خالف قانون ؟
مش حرام برده ؟

و لا هو حرام في الاشياء المادية و الاشياء الاخرى لآ ؟

شكرا .

أنت كده دخلت في مواضيع جدلية معقدة.

أولا، مش كل ما هو غير قانوني يبقى غير أخلاقي. ايه الحرام في مشراكة خط انترنت؟
في النهاية المشاركين في الخط لم يكلفوا الشركة مليم زيادة وحصلوا مجتمعين على نفس السرعة التي يحصل عليها المشترك في الخدمة لوحده. هم لم يسرقوا الشركة بل ارتضوا أن يحصلوا على خدمة أقل بمشاركتهم مع بعضهم.


نيجي لفكرة "سرقة" البرماجيات. لن أدعي انها ليست غير اخلاقية، ولكنها ليست سرقة بالمعنى التقليدي. لما تسرق شيء من شخص ما، هذا الشخص لم يعد بحوزته هذا الشيء. المشكلة هنا أن المنتج مش شيء ملموس. دي بيانات سهلة النسخ. عشان كده لما تشتري برنامج، انت مش بتشتري نسخة منه، انت بتشتري رخصة باستخدامه. عندما تستخدم برنامج دون ان تدفع ثمن ذلك فأنت لم تسرق مطور البرنامج بالمعنى التقليدي بل أنت استخدمت خدمة/منتج بدون تصريح من مقدمها.

اسمها ايه الحكاية دي؟ مش عارف. بس مش سرقة
هل هي غير اخلاقية؟ نعم ولكن ...
في كثير من الأحيان، الرخصة باستخدام البرنامج بتسلب منك حقوق كثيرة في التصرف فيما تملكه. مثلاً، لا يحق لك عمل نسخة من البرنامج للاحتفاط بها كاحتياط لفقدانك النسخة التي حصلت عليها من المطور. لا يحق لك القيام بتعديل البرنامج كما يحلو لك. ولا أقصد هنا الاعدادات التي يسمح البرنامج بظبطها، بل أقصد التعديل في البرنامج نفسه وتغييره. بعض هذه الشروط مجحفة. عشان كده أنا بفضل استخدام البرامج الحرة التي تعطيني رخصة باستخدامها كما أشاء.

نفس الفكرة (الى حد ما) مع القناوت الشفرة وبرامج التلفيزيون والأفلام. ولو أن الموضوع معقد، لأنه يحق لك أن تشاهد ولا تسجل. يحق لك المشاهدة أنت واصحابك بس لو عملت "عرض عام" حتى ولو مجاني فهذا غير قانوني ... الخ

ببساطة، المشاركة في كل ما هو حسي ملموس لا غبار عليه. وكذلك المشاركة في الخدمة التي لا يستطيع أكثر من شخص استخدامها في آن واحد.

المشاركة فيما يمكن نسخه موضوع آخر جدلي.

المشاركة الأصلية كتبت بواسطة CryptonX

بدول جديل كتير .. سيبك من النسخ و ما غير النسخ .

بمجرد شرائك او تعاقدك علي خط تليفون ..

لو مضيت علي العقد انك حتديهم هدومك كلها لما تستخدم البرنامج او الخدمة دي يبقى انت موافق علي شروط العقد . اخليت بيها تبقى خالفت القانون ! من غير اخلاقيات ! دي كدة سرقة علنيه !

كون حضرتك شايفها انها مش ملوموسة فمتبقاش سرقة دي هي المشكلة اصلا !

بس للاسف احنا في بلد لا يحترم اصلا حقوق الملكية و القرصنة فيه من اعلي معدلات القرصنة في المطقة ..

بالنسبة لاسعار الDSL هو حضرتك غصبوا عليك الاشتراك ؟؟

انت شايف اشتراك بسعر معين .. شايفه غالي ؟ مش معنى ماقطعتش الDSL زي محنا عاملين مع السيارات ؟؟

وبعدين الDSL ال 256 اول مابدا كان ب 300 جنيه بعدين ب 150 و دلوقتي بقى ب 95 !

اخيرا برده نفس الفكرة انت مضيت علي عقد الDSL و وافقت علي شروط العقد الا وهي انك لا تشارك الاخرين خارج منزلك في الخدمة !

حتقولي بتخسر الشركة ايه ؟

اشرحلك !
حضرتك اشتريت خط كبير مثلا 2 ميجا .. رحت مقسمه عليك انت و 10 كمان حوليك .

كدة الشركة اومقدم الشركة خسر ايه ؟

- خسر اولا ان الخط ده حيكون استخدامه اعلي بكثير من استخدام شخص واحد و بالتالي حتسهلك BANDWIDTH اكثر بكثير من العادي .. حتقولي انه المفروض UNLIMITED حقولك فعلا بس في بند في العقد برده اسمها FAIR USAGE POLICY بس محدش بيبصله و كمان تسهيلا من المقدم بتاع الخدمة محدش بيطبق عقوباته !

- ثانيا حضرتك لما خليت 9 مستخدمين غيرك يخشوا معاك .. حضرتك كدة حرمت الشركة من 9 مستخدمين كانوا ممكن يشتركوا معاهم !

- المصيبة بقى ان غالبا الخطوط دي كمان بتبقى سرعات كوميدية .. يعني تلاقي خط 512 - عمارة كاملة بحالها مشتركة فيه ! كل واحد يدفع 5 جنيه في الاخر ! و مفيش حد عارف حتى يفتح ال EMAIL
الي يغيط اكتر انهم بمنتهى البجاحة يديك رايه يقولك اه الشركة دي اسرع من دي و لا احسن من دي !

وبنفس البجاحة لو حصل حاجة عنده و هو مش صاحب الخط اصلا يتصل بخدمة العملاء يتخانق معاهم !

انا مشفتش كدة بصراحة !

---

نهاية الموضوع ..

الرخصة الي حضرتك بتشتريها لبرنامج او للعبة .. تنص علي عدم نسخها ( الا لنسخة واحد ليك او علي حسب الشروط ) و عدم تاجيرها او تسليفها لصاحبك .

حضرتك وافقت علي الشرط ده باقتنائك ليها !

مترجعش تقول لا اصلي دول كدة سرقوني ! تقوم انت سارقهم !

و مازالت " سرقة " مش عمل غير اخلاقي فقط و لو حضرتك تعرف حد بيشتعل كمبرمج في شركة كبيرة او خارج مصر حتعرف معنى كلامي كويس .

--

تعديل :
البديل ؟ هو استخدام برامج مجانية
و بنسبة 95% كل البرامج فيه منها شبيه او حاجة مقاربة جدا مجانية .

و اذا تعذر الحصول علي برنامج مجاني .. و البرنامج الغير مجاني مهم جدا لعملك او لاكل عيشك يبقى متسحترمش فلوسه ..

أنا مدرك كويس أوي معنى وأهمية وقانونية حقوق الملكية الفكرية وحقوق النشر.

لو مضيت على عقد بعدين أخليت بالعقد ده يبقى غير قانوني فعلاً، بس مش سرقة!

بالنسبة لل DSL، انت مشترك في خدمة مادية.
يعني انت لا تقدر على نسخ الخدمة وتوزيعها على اصدقاءك بحيث انهم يحصلوا خدمة طبق الأصل من الخدمة اللي انت بتحصل عليها. ما يمكن فعله هو اقتسام السرعة المادية. لو في تسع اشخاص اشتروا تفاحة وقسموها على نفسهم كل واحد نصيبه هيبقى تُسع تفاحة لا يغني من جوع. هما حريين!

قلت لي في حاجة اسمها Fair Usage Policy. أيوة، ده تحايل قانوني على حقوق المستهلك وعدم تقديم الخدمة له عند تجاوز "الاستخدام المعتدل" للخدمة. ازاي تسوق الخدمة على انها Unlimited وبعدين تضع بند مبهم عن استخدام عادل (وغير محدد) للخدمة؟ طيب ما هي حدود هذا الاستخدام "العادل" للخدمة؟
أنا من حقي استهلاك ال Bandwidth كله اللي أنا مشترك فيه بدون Quota أو Fair Usage Policy (لو مشترك Unlimited) سواء أنا لوحدي أو معي عشرين واحد في العمارة.

في النهاية أنا شخصيا مشترك في خط 2 ميجا Unlimited لوحدي وأرفض فكرة مشاركة النت لأسباب عملية وليس لأسباب قانونية أو أخلاقية.

الموضوع بالنسبة لي موضوع مبادئ. حقوق المستهلك و سيطرة الرأسمالية غير المقننة وما الى ذلك.

المشاركة الأصلية كتبت بواسطة CryptonX

لو حضرتك تعرف حد بيشتعل كمبرمج في شركة كبيرة او خارج مصر حتعرف معنى كلامي كويس .

الجملة دي ولو أنها مهذبة لكني اعتبرها تلميح لي بالجهل وعدم الادراك بما يجري في العالم.

عموماً، أنا عارف ان حضرتك ماتقصدش الاهانة. بس حبيت أقول لحضرتك انطباعي السلبي عن الجملة.