امكانيات الماتركس

**Ahmed Hassan** · 02-09-2007 12:39 AM

امبارح الصبح كنت راجع من القاهره لبورسعيد حوالي الساعه 06:30 و ده معاد ظريف لأن الطريق لسه مش بيكون زحمه و في نفس الوقت بيكون النور طلع.... المهم وان بجري (160) عديت من جنب عربيه ماتركس جديده كانت ماشيه حوالي (140).

المهم لقيت العربيه جت ورايا و بدات تقرب.. "قولت يا واد تنث خااااالث"... دلوقت الراجل يستسلم و يهدي.. بس مهداش و فضل ماشي ورايا.. قولت اكيد هوه كدا جايب اخر العربيه.. اسرع شويه كمان و جبت (170) لقيت بردو بيجي ورايا و المسافه بيننا مش بتزيد الا لما يكون فيه مناوره او بناخد غرز لأنه بيضطر يدوس فرامل شويه.

قولت اشوف اخره ايه... فوصلت (180) و دي كانت الطريقه الوحيده لزياده المسافه بينا حتى و الطريق مستقيم (اعتقد ان اخر سرعه ممكن العربيه الماتركس توصلها 170).

بس بصراحه السواق دخل دماغي لأن سواقته كانت اكثر من رائعه.. وفي نفس الوقت اعجبت بامكانيات الماتركس لأني بصراحه مكنتش متوقع انها ممكن تعمل كده.

مع الاسف افتقدت السائق العزيز بعد الكارته لأن كمين "حُماه امن الوطن" وقفوه.. و طلبو منه يركن على جنب!!!

نكته كده على الماشي... كان راكب معايا واحد صاحبي قلتلو شايف العربيه الماتركس بتعمل ايه!!!
قاللي عادي... ده احسن وقت العربيه الماتركس ممكن تأدي فيه.
قلتلو ليه؟!!
قاللي لأن احنا الصبح بدري و الطريق مندّي.. و بكده "المكواه" تمشي بسهوله على الطريق :mrgreen:
معلش محدش يزعل مني القافيه حكمت