الموضوع: اية رايك فى تجميع النوبيرا بغض النظر عن صوت شكمانها :)

المشاركة الأصلية كتبت بواسطة khalidsdk

الموضوع يا أستاذ محمد مش عند ولا تحدي ، على العكس تماما

انا معاك تماما و صدقنى لو الموضوع قلب عند او تحدى انا مش حكمل فيه اطلاقا

أنا عايز أوضح فكرة معينة (وجهة نظر) إن الأوتوماتيك مش بالسوء ولا بالضعف اللي معظم الناس متخيلاه ومقتنعه به ، يا راجل انا بأقابل ناس تحلف إن عمرها ما تركب أوتوماتيك لو ببلاش ، وواحد تاني قال سمع من ابن خالته إن جوز أخت جاره في السكن القديم كان ابن عمه عنده عربيه مش أوتوماتيك لا هيدروماتيك والفتيس ما قعدش معاه أكثر من سنة ؟؟!!!!

بكل واقعية أنا بقالي 13 سنة ما بأسوقش غير أوتوماتيك كابريس - كريسيدا - نوبيرا - ليجانزا ، ولم أواجه أي مشكلة على الاطلاق طالما إنك بتغير زيت الفتيس والفلتر في المواعيد المحددة (من 15000-20000كم على الأكثر ) ، الأداء أكثر من رائع - العزم ممتاز ، ومش ممكن حأركب مانيوال على الاطلاق .

احنا كدة بنتكلم فى نقطتين مختلفتين... كلامك بيناقش التطور اللى حصل فى التكنولوجيا الفتيس الاوتوماتك و تلافى العيوب القديمة و تحسين اداء الفتيس عشان يبقى زى ما بيقولوا user friendly

انا لم اتطرق للنقطة دى خالص... انا كنت بتكلم عن مقارنة اداء الفتيس المانيوال مقارنة بالاوتوماتك و الميزة اللى بيتفوق فيها المانيوال على الاوتوماتك نظرا لاختلاف طريقة نقل الحركة من الموتور الى الفتيس بين النوعين

انا كنت من سنه تقريبا عند منصور شيفورليه في ش الطيران بأتفرج على الأوبل البائع أخبرني إنها بتنزل دلوقتي أوتوماتيك كتجهيزات أساسية (ستاندر) ومافيش مانيوال (العهدة على البائع) يبقى الألمان بجلالة قدرهم ولهم ما لهم من باع في عالم السيارات لغوا المانيوال من حساباتهم ، نيجي نقول إن الأوتوماتيك ضعيف ووحش وكله عيوب !!!

انا مقولتش انة وحش و كله عيوب... انا قولت ان المانيوال يتفوق علية فى نقتة الهدر فى العزم نتيجة وجود محول العزم... دة لا يعنى ان الاوتماتك "وحش" و المانيوال "حلو" انما يعنى ان المانيوال يتفوق على الاوتوماتك فى نقطة معينة

التقنية الحديثة في الأوتوماتيك للسيارات 2009-2010 تجعل من الأوتوماتيك متعة حقيقية في القيادة وفي القوة والأداء نظرا لتعديل Gear Ratio وتحسينه عن الأول بكثير وأيضا لتعديل زمن النقل سواء في Kickup أو الـ Kickdown وإضافة زرار الـPower للفتيس ودمجه بالمانيوال في الـ TipTronic ....الخ ، الاتجاه الحديث كله الآن للأوتوماتيك والشغل كله والأبحاث والتحديث والمستقبل للأوتوماتيك .

كلام عظيم ولا جدال فيه اطلاقا

الشاهد في الحديث إن الناس تغير فكرتها القديمة البالية وغير الصحيحة والمغلوطة عن مشاكل الأوتوماتيك التي تحدث إما لسوء الاستخدام أو سوء الصيانة أو سوء وجهل في الاصلاح ....الخ

مازلت على وفاق معاك فى وجهة النظر

ومع ذلك إثبات وجهة نظري (مش حأقول تحدي) قائمة ومستعد أثبتها مع أي عربية أخرى مانيوال تكون مماثلة لعربيتي علشان المقارنة تكون عادلة ، ونشوف الأوتوماتيك ممكن يعمل ايه لو متزبط صح وبيتساق صح بغض النظر عن سائق المانيوال محترف أو معوق أو لسه بيتعلم .

و انا معاك... قوللى مواصفات عربيتك ايه... و حتى من غير سباق او جرى حنشوف عربيتك زمن تسارعها من صفر الى 100 فى قد ايه و نقارنة بزمن النسخة المانيوال من نفس العربية من واقع كتالوج السيارة

ما اتوقعة هو تفوق المانيوال فى الزمن التسارع و دة ناتج عن هدر العزم اللى بيحصل فى محول العزم بتاع الفتيس الاوتوماتك و دة اللى انا موجة تركيزى علية بغض النظر عن تكنولوجيا الفتيس نفسة

واختلاف وجهات النظر لا يفسد للود قضية .

طبعا يا باشا و انا سعيد جدا بالحوار الراقى بيننا

على فكرة دى مش اول مرة ادخل فى حوار مع حد فى قصة المانيوال و الاوتوماتك... و افتكر انى فى الاخر كتبت قصة افتراضية صغيرة بين 3 اشخاص معاهم نفس العربية بس واحد فتيسة مانيوال وواحد فتيسة اوتوماتك وواحد فتيسة CVT... التلاتة اتقابلوا و عملوا سباق و روحوا بيتهم.... و كتبت ايه اللى حصل فى السباق و السبب و ايه اللى حصل و هما مروحين بيتهم و السبب

المشكلة انى مش فاكر لا عنوان الموضوع ولا فى اى قسم عملتة... انا ححاول ادور علية و ابعتلك القصة دى اكيد حتعجبك جدا

ويحيا الأوتوماتيك

يحيا المانيوال برضة

MMamdouh