ممكن نهدى شوية
من الاخر مفيش حاجة ح تنزل للأسباب التاليةاولا بالنسبة لأسعار الوقود مستحيل انها تنزل للأسباب التالية:
1-الوقود اصلا كان مدعم من الدولة فالوضع الحالي انه حاجة من اتنين
• ياأما قيمة الدعم نزلت وقيمة الدعم قلت شوية
• يا أما انه دلوقتي مفيش دعم وبيتم تدعيم سلع اخرى مثل الخبز
2- الوقود يعتبر مصدر من مصادر الدخل القومي وفي مرحلة زي العالم بيمر بيها من ازمات اقتصادية يبقى مستحيل انه يخفض قيمة الوقود او الجمارك او الضرائب .....الخ
3- الحاجة اللي احب اوضحها للسادة الزملاء مش شرط ان الفلوس اللي الحكومة بتلمها بتروح على الشوراع او صرف صحي او... في جانب من الفلوس ديه بيروح في مشروعات عسكرية وبدون الدخول طبعا في تفاصيل ولا أنفي الفساد الكتيرعلشان عارف ان ح يكون في تعليقات كتير على النقطة ديه
ثانيا بالنسبة لأسعار السيارات أو اي منتج آخر
أولا:الوكيل ليه بيغلي سعر السيارة:
في مثل قديم بيقول اطعم الفم تستحي العين
• مدام الوكيل بيمول وزارة المالية بالضرائب والجمارك.... الخ يبقى ليه الحكومة تزعله؟؟؟
• مدام الوكيل لما بيكون في استيراد للسيارات وفي مبالغ بتدفع من تحت الترابيزة لتسريع عملية اخراج السيارات من الميناء يبقى من وجهة نظر الوكيل ان العميل لازم يدفع الفلوس ديه (مش العميل هو اللي مستعجل على ركوب العربية)

ثانيا بالنسبة للمقاطعة
1- فلسفة المقاطعة لسه لم تصل للمستوى اللي احنا متخيلينه في مصر زي ماذكر بعض الزملاء في ناس لسه بتروح تشتري ومدام معاك فلوس يبقى ايه اللي يجبرني اني انتظر
2- المقاطعة ياجماعة معلش انا لي فيها وجهة نظر يمكن الكل لا يوافق عليها ، المتضر الأول من المقاطعة هم نحن وليس الوكيل بمعنى:
أ- لو المستثمر شعر انه بيخسر اول حاجة بيتم عملية تسريح للعمالة الموجودة علشان يعوض فرق الخسارة لان بالبلدي مفيش مستثمر (عبيط) وطبعا العمالة ديه هي انت وانا وغيرنا وبيوت كتير مفتوحة والمستثمر ممكن يعيش على ارباح الفلوس الموضوعه بالبنوك
ب - لو شعر الوكيل أو المستثمر ان الطلب قل ، يبقى بناءا عليه ح يقلل حجم الاستيراد على حسب طلب العملاء ويمكن نصل لمستوى احجز دلوقتي واستلم بعد 6 اشهر والله اعلم ممكن ياخد الفلوس ويهرب
ج - معارض السيارات هي تعتبر موزع للوكلاء في نظير ذلك الوكيل ممكن يخلي المعرض يخفض شوية من سعر السيارة غير السعر المعلن من الوكيل وبناءا عليه المعارض ديه ممكن تقفل خطورة قفل المعارض في جزئين:
• ان صاحب المعرض ده ممكن يكون حضرتك وبناءا عليه في بيوت كتير اتقفلت واحنا لازم لما نعالج مشكلة نشوف تبعتها على الاخرين ايه مش نبص لنفسنا وخلاص
• خطورة قفل المعارض لو تخيلنا ان كل محلات البقالة في مصر قفلت والاتجاه الآن للمجمعات الاستهلاكيه
انا مش بعقد الزملاء بس انا بحاول اوضح الصورة
وكل سنة وحضرتكم بخييييييييييييييييير