الموضوع: خلاص اتخنقت

المشاركة الأصلية كتبت بواسطة mrghost

السلام عليكم ورحمة الله وبركاته
انا ترددت كتير قبل ماكتب بس خلاص انا اتخنقت وعاوز اراء الاعضاء فى مشكلتى
انا فى بكارليوس هندسه السنه دى ومشكلتى هى خلافاتى المستمره مع والدى اللى مش لاقيلها سبب
كل يومين بالكتير لازم تحصل مشكله مش عارف لازم يتلكك على اى حاجه معايا بالنسبه ليا وخصوصا العربيه يعنى ساعات يقولى انت فكيت كذا ليه انت بتنتقم منى انت مش تعبان فى فلوسها هى دى كلمته المشهوره مع العلم ان كل فلوسى ضايعه عليها اساسا وكمان لو قعد جنبى وانا سايق وحد زنق عليا ولا وقف مره واحده بيزعقلى انا مش هو !!!!! مع انى بسوق اكتر من 8 سنين والمشكله ان بعدها علطول ياخد الموضوع عادى وكأن محصلش حاجه بعد مايكون دمى اتحرق
وانا خلاص بصراحه مش قادر استحمل اكتر من كده وكل مره اقول خلاص مش هاركب العربيات دى تانى (مع العلم ان عمره مبيروح لميكانيكى انا اللى بعمل كل حاجه تقريبا ومتبهدل بالعربيات لوحدى ) تيجى والدتى تتحايل عليا علشان اوصله الشغل لانه مبيحبش يسوق فى الزحمه ارجع اقول معلش ومفيش بعدها علطول تحصل مشكله وانا بجد اتخنقت ومش لاقى حل

اتذكر انى فى فترة المراهقة و التمرد كنت كثيرا ما احس "بالخنقة" من والدى بسبب اشياء صغيرة مثل التى تحكيها...... لكن..... مع تقدمى فى العمر و الخبرة و ايضا فى الحياة...... ابحث فى نفسى الان فلا اجد سوى ينابيع من الحب تجاه والدى، ولا اتذكر له الا كل خير و كيف تعب من اجلنا جميعا انا و اخوتى، كان و مازال يفضل راحتنا على راحته، كان و مازال لا يستريح الا اذا اراحنا جميعا، كان وما زال يضحى بوقته و صحته و مجهوده و اهتمامه و عنايته و قلقه الشديد علينا..... كان و مازال يضحى بكل هذا من اجلنا..... ولو رجع به الزمن، انا متاكد من انه سيفعل نفس الاشياء و ان امكن اكثر.
ربنا يخليلك والدك، و ارجوك لا تسمح لهذه الاشياء الصغيرة بأن تجعلك تزعل منه، فصدقنى انا لا اتذكر الان الا كم كنت انا سخيفا احيانا كثيرة مع والدى ولا اتذكر اى شئ سلبى منه الان، كل ما اتذكره فقط هو الاشياء الحقيقية الجميلة فيه...... لانه...... والدى

بص يا مستر جوست

انا عانيت تقريبا من نفس مشكلتك وبذات برده في موضوع العربية الناس تغلط وانا اخد كل الخناق والزعيق

كنت الاول بتعصب واقعد احرق في دمي واتنرفز

بس لقيت حل جميل جدا وده مش استخفاف بالوالد والله

انا بقيت كل مره اقول لبابا حاضر معلش انا اسف وركز على كلمة حاضر وانت مبتسم وان كنت جواك مضايق

وربنا يهدي الجميع