بياع كيا سيراتو 2009 فيوزات مخه ضربت

**germanmissile** · 09-03-2009 11:23 PM

النهاردة ياجماعة كلمت معرض موتور وان وسالت على شعر ا انها ب 125000
بقوله بس كده الاسعار بقت مبالغ فيها جدا دى كده بتمن الاسترا الانجوى تقريبا
يقوم الاخ الكفتجى اللى انا ماعرفش ده اساسا شغلته بياع جوافة ولا بليلة ولا ايه بالضبط
يقولى اصل الكيا كورى انما الاوبل المانى
هههههههه طيب حضرتك هو الكورى المفروض يبقى اغلى ولا الالمانى
يقولى الكورى طبعا لان الكورى التسارع بتاعه افضل وبيعيش اكتر انما الالمانى بقاله 10 سنين فى النازل
بصوا انا مش هاعلق عشان والله هاقول لفظ ****
خليها تصدى وموديلها يعدى

**kareemhisham** · 09-03-2009 11:41 PM

يانهار اسود على الباياعين ,,, ما هما خلاص بقا بالنسبالهم الناس بتصدق اى حاجة على امل انهم يبيعوا اى حاجة
خلوها تصدى

**Hacker5** · 10-03-2009 12:03 AM

حضرتك متأكد انك اتصلت بمعرض ولا بعربية كبدة و سجق ؟

**tawfic** · 10-03-2009 12:53 AM

المشاركة الأصلية كتبت بواسطة germanmissile

بصوا انا مش هاعلق عشان والله هاقول لفظ ****

خليها تصدى وموديلها يعدى

الحق يا صديقى عدل الجمله بتاعت اللفظ او قدم اعتذار علشان عضويتك لا تحذف
اما بخصوص المعرض انا عرفه اللى فى سوق الجمعه وبالاماره بيبيع سمك زينه

**KHALED AYMAN** · 10-03-2009 01:46 AM

طبعا يا جماعه الكورى احسن من الالمانى هقولكو ليه :
الالمانى عربيات ثابته و دى طبعا حاجه وحشه ...

انما الكورى غالبيته مسمعش عن الثبات
و طبعا دى حاجه حلوه
لانها بتعمل جو من الاثاره على السرعات
و فى نفس الوقت لو قلبك ضعيف
هتقرر انك متجريش تانى و ده فى الاخر لمصلحتك و الشركه قاصده الموضوع ده .

و كمان العربيات الالمانى اعطالها قليله و ده شىء ممل لانها مش بتخليك تتمرمط فى التوكيل و عند الميكانيكه و علشان كده العربيات التانيه بيبقو عندهم خبره احسن من صاحب الالمانى فى العربيات...

العربيات الكور صاجها ضعيف و دى ميزه لانها لما واحد يخبطها مش بيتأذى جامد ...
و دى حاجه الشركه قاصداها علشان المصلحه العامه و مش مهم ان عربيتك تتأذى يا اخى حب لاخيك ما تحب لنفسك ...
انما الالمانى بقى عربيات صاجها قوى و ناشف و لما بيتخبط مش بيحصله حاجه جامده و طبعا دى بينعكس سلبا على الى خبطك و بكده انت بتحب الاذى لغيرك .

كمان العربيات الالمانى عمرها طويل ...
هتزهق منها ...
انما الكورى عمره اقصر من الالمانى و بكده انت هتغير العربيه بسرعه و هتعيش فى جو من التجديد ....

و طبعا الالمانى بقاله 10 سنين فى النازل و الدليل :
1-اوبل انسينيا سياره العام 2008 .
2-ال S الجديده مش حلوه و مفيهاش كماليات و محققتش ارقام قياسيه فى المبيعات فى الشرق الاوسط ...
3-اودى و بورش و مرسيدس و بى ام و اوبل شركات تقرف و ملهاش فى العربيات و الدليل ان الموديلات الجديده منها مش حلوه خااااااااااااالص .
4-الفتيس الاكثر تطورا فى العالم و هو Dsg و ده فولكس عاملاه و بيدى عزم شبه متواصل و بالتالى سحب خطير و سرعه رهيبه و السرعه ايه ؟
السرعه خطر ..
يبقى ايه ؟؟
يبقى الفتيس وحش.

فعلا فعلا الالمانى وحش و اانا مش بحبه و الدليل انى راكب عربيتين المانى ...

قولتلى بقى المعرض اسمه ايه ؟؟
علشان لما اجى اشترى كفته اجيب منه ...

**lordnykon** · 10-03-2009 02:14 AM

أصلا بقى الألمان دول مبيعرفوش يعملو حاجة غير السجق "فرنكفورتر"
لكن العربيات ملهومش فيييييييييييييييييييييها تماما .
كوريا بقى احسن بلد في العلم بتعمل عربيات عارفين ليه ؟ علشان انا راكب كورى .....
لو سمحتوا يا جماعة اللى ناوى يشتم يشتم على الخاص علشان محدش ياخد بان بسببى , تمام ؟

**wildwest100** · 10-03-2009 09:44 AM

المشاركة الأصلية كتبت بواسطة Hacker5

حضرتك متأكد انك اتصلت بمعرض ولا بعربية كبدة و سجق ؟

+11111111111111111111111

**ghazy12** · 12-03-2009 12:28 PM

يا سعادة الباشا دي كانت قهوه بلدي و ده كان القهوجي............ شاي لبتون سكر زياااادة يابني و شوف الرجاله في المنتدى يشربو ايه.... :k48:

الكوري احسن من الألماني.....
و الصيني احسن من الياباني....
و :10D5C8~1107: يا جدع........