حاجة غريبة حصلت النهارده (مياة التبريد نقصت جامد)

**ahmedmaklad** · 11-03-2009 12:06 PM

ازيكوا يا اوبلاوية عاملين ايه معلش انا بغيب شوية بس والله غصب عني
انا كنت مسافر في الاجازة اللي فاتت دي و العربية كويسة و و قبل ما ارجع من السفر قلت افتح الكابوت كان بقالى كتييييير ما فتحتوش قلت اشوف المياه لقيت الدنيا كويسة الحمد لله و قفلا و مشيت
رجعت من السفر و انا نازل امبارح قلت افتح الكابوت اشوف المياة لقيت مفيش مية في القربة خالص اترعبت بس العربية ما كانتش بتسخن و لا حاجة خالص الحراره عادية جدا زودت مياة و خلاص و قفلت الغطا كويس و بصيت تحت العربية مافيش اي اثر للمياة
نزلت النهارده الصبح لقيت المياة ناقصة كتير بس مش كل القربة زي قبل كده و مفيش اثر للمياه تحت العربية برده مش عارف ده ايه بالظبط
حاجة تانية بصيت على الزيت النهارده انا لسه مغير زيت من 2500 كيلو كده و كنت حاطط شيل هيلكس الترا اللي هو 10000 كيلو و ده اول مره احطه قلت يمكن يكون في حاجة كبيرة يمكن الميه بتدخل على الزيت
المهم لقيت الزيت لزوجتة كويسة بس لقيته اسود شوية مش فاتح زي ما حطيتة في الاول انا كنت بحط شيل هيلكس ال 5000 قبل كده
ده ممكن يكون حاجة كبيره يا جماعة بس العربية في السحب و السخونية عادي
حاجة كمان حد يعرف ثمن الديسك و الاسطوانة كام و الماركة الكويسة
تقلت عليكوا يا جماعة

**فادى محمد** · 11-03-2009 12:17 PM

ازيك يا احمد باشا .. يسعدني اني اكون اول واحد يرد عليك .بخصوص نقص مياه التبريد فاكيد فيه تسريب من احد الخراطيم او الافزان او حتي غطاء القربه وده مش لازم تلاحظه تحت العربيه انما بيكون علي شكل بخار ميه وده دليل علي ان التسريب من مكان صغير جدا .شيك علي الخراطيم لانه ممكن يكون قد ثقب دبوس وشوف كاوتشه غطا القربه ..اما بالنسبه للزيت اهم شيء فيه اللزوجه ومعني ان لونه اسود انه بيقوم بوظيفته في تنظيف الموتور من الكربون والاكاسيد -طقم الدبرياج يعمل في حدود480 ج من غير بليه الدبرياج .

**فادى محمد** · 11-03-2009 12:35 PM

نسيت اقوللك ان الطقم اللي ب450 ج ده تايواني انما الالماني زي ما علاوي قال حيقرب من ال1000 ج

**ahmedmaklad** · 11-03-2009 12:40 PM

المشاركة الأصلية كتبت بواسطة Ahmad Allawy

طقم الدبرياج بتاعي اللوك الالماني كان تمنه 700 جنيه اسطوانة و ديسك و بلية..
بتاع عربيتك انت هيكون تمنه في حدود 1000 مثلا ولا حاجة الالماني.. بس نصيحة.. غيره ف التوكيل.. عشان هيبقي عليه ضمان.. ولو فيها حاجة بتروح تغيره تاني علي حسابهم.. و فرق المصنعيه مش هيكون كبير.. عشان ممكن الطقم اللي تشتريه ميكونش كويس زي ما حصل معايا..

طب سلم الاول بس

ازيك يا علاوي عامل ايه
انا بعمل الشغل عند احمد عبد الراضي راجل محترم و كويس و زي التوكيل في المصنعية بس بيريحني:k36:
انا قلقان بس من موضوع المية و الزيت

**Ahmad Allawy** · 11-03-2009 12:51 PM

الله يسلمك يا كبير..
واحشني والله جدا.. بس الحال من بعضه..
مش باعرف اتحرك من الشركة.. مع اني في سمارت.. بس الحركة صعبة
لأ احمد عبد الراضي تمام.. 10/10
متقلقش من موضوع لون الزيت ده.. عادي..
لو في جوان وش سلندر.. العربية هتلاقيها جايبة مية كتير قوي من الشكمان... ولا ايه..؟؟

**فادى محمد** · 11-03-2009 01:02 PM

اهم اعراض وش الساندر الميه في القربه زي الطحينه (خليط ميه علي زيت )وبخار ميه من الشكمان (نتيجه دخول الميه غرفه الاحتراق ) والموتور يمسك حراره .

**Ahmad Allawy** · 11-03-2009 01:59 PM

انا عن نفسي غيرت القواعد لما غيرت الاسطوانة و الديسك..
القواعد اللي اشتريتها كانت اتحاد اوروبي
ووليد عبد العزيز اشتري قريب كانت دنماركي باين.. و كانت كويسة..

بالنسبة للمية اللي بتنقص.. شوف كده ممكن يكون زي ما بيحصل عندي حاليا و اللي اكتشفتها بالصدفة..
ان الكويل بتاع التكييف السخن حصل فيه حاجة.. و المية تكون بتسرب علي خفيف كده جوة الصالون ف الارضية..
شوف كده الدواسة اللي قدام الكرسي اللي قدام يمين.. عشان لو المية بتسرب بتروح للحتة دي..