سؤال على العفشات الرياضية؟

**same7** · 11-03-2009 11:05 PM

عايز اعرف من حد فاهم لو غيرت العفشة بعفشة رياضية لازم العربية توطى واية الفرق بين العفشة العادية والرياضية وتكلفة عفشة ريا ضية لنوبيرا 1 تكون فى حدود كام
وشكرا مقدما

**محمد فريد** · 12-03-2009 12:20 AM

أكيد لازم توطى عشان أصلا السوست بتاعة المساعدين الجداد للعفشة الرياضية بيبقوا أقصر من العادى لزيادة الثبات
أعتقد الكونى بتبدأ من 2000 والله أعلم
استنى هدور وأقولك

**حماده المصري** · 12-03-2009 01:55 AM

العفشه الرياضيه بتيجي بسوستها برضو

وهي تقريبا في حدود 4500 سوست ومساعدين

والعفشه الرياضيه لو مثلا koni

مش بتنزل ستوك لكل العربيات لا لكل عربيه عفشه ليها

وهي تقريبا نفس مقاسات العفشه الاويجنال بس طبعا انشف واقوى بكتيير

وعامه معظم الي بيركبوا عفشه رياضيه بيركبوها عشان يعرفوا يجنطوا مقاسات كبيره عشان العفشه دي بتستحمل مش بتبوز بسرعه

وبرضو ليها انواعها

في 4 مساعدين كوني زي العاديين بس انشف فقط

في بقى الادجستابل بتقدر تعدل في نعومه اونشوفيه المساعد وبرضو سعرها مش غالي ودي المنتشره تقريبا ب 4500

في العفشه الكهربا الي بتوطى وتعلى وفي برضو عفشه بتتالم مع ظروف الطريق ناعم او ناشف من غير تدخل منك

**same7** · 13-03-2009 06:37 PM

حضرتك بتقول ان فى مساعدين كونى زى العاديين بس انشف فقط
حضرتك تقصد انها انشف فابتمتص الصدمات
ولا ناشفة على المطبات والطرق الوعرة
عشان انا بدور على عافشة للعربية طرية وانعم فامش معقول مثلا هغير عفشة بعفشة رياضية وتطلع ناشفة فى المطبات

**محمد فريد** · 13-03-2009 11:22 PM

معلش يا جماعه ممكن توضيح لمصطلح ناشفة
يعنى ناشفة بتدب فى الحفر ولا ناشفة بتستحمل وتشيل
وايه هو النوع اللى يكون مريح ومتحسش بالمطبات وفى نفس الوقت يدى ثبات ؟؟؟

**حماده المصري** · 14-03-2009 12:29 AM

مهو ناشفه دي معناها بتدب في الحفر والمطبات
بس معنى كده برضو انها بتستحمل وقويه

اساسا العفشه الكوني من اقوى العفشات في الاستحمال

واضافه الى كده هي مش النشوفيه الي تقرف يعني

النوع الي مش بيتعدل نشوفيه هي اقل نشوفيه بالنسبه للنوع الي بيتعدل

بعدين برضو انت لما تجيب عفشه بتجيبها كامله بمعنى ان المساعدين والسوست الكوني بيبقى اداؤهم كويس مع بعض

مفيش عربيه عفشتها ناعمه وطرييه هتبقى ثابته الا بقى لو واحد بيعدل في عربيته ومش برضو هيبقى الي هو معدل يعني يوطى العربيه ويبقى المساعدين الاصلي بتوعها ناعمين على جنط مثلا هتتزبط
لكن العفشات الرياضيه باشا على الطريق وتستحمل الجنوط من 17 وانت طااالع كمان