لماذا توجد فروق كبير فى أسعار السمكرة و الدهان

**hkyfgvyiyu** · 12-03-2009 01:07 AM

سلام عليكم

انا دلوقتي عاوز ارش العربية خارجي طبعآ واسمكرها ولما بدأت اسأل فوجئت بتفاوت غريب في الأسعار

واحد قالي هرشهالك فرن دهان نمرة واحد واسمكرهالك ب 2400 !!!!

واحد في الحرفيين قالي سمكرة ودهان ب 1500 فرن وهنظفهالك واجيبها علي الصاج وكلام كده

واحد تاني قالي 1000 وهرشهالك رشة تمام وهخليها ميه ميه !!!

طبعآ انا جاهل في الحوارت دي فعاوز اعرف لما اتكلم اسأل علي ايه واعرف بالظبط الفروق ازاي يعني ايه دهان واحد واتنين ويعني ايه فرن ومن غير فرن والكلام ده افادكم الله وشكرآ

**karimone** · 12-03-2009 01:35 AM

اعتقد في ورشة نايل موتورز هتلاقي ناس 100 100 يفيدوك في الموضوع ده...

ياريت تطرح سؤالك هناك...

و كمان ياريت تختار عنوان مناسب لمحتوي الموضوع... و شكراً

**zeyad1810** · 12-03-2009 02:26 PM

الموضوع دة ما تختارش فية بالنظر للسعر ولكن شوف حد نضيف ومضمون وتكون الناس مجرباة وبتشكر فية
موضوع المصنعية دى بقى انت ممكن تفاصل فيها معاة
وكمان موضوع الخامات زى البوية والمعجون والورنيش الحاجات دة هتلاقى منها ماركات باسعار مختلفة يعنى كل مالحاجة تكون غالية هتكون انضف
فانت الافضل تشترى الخامات بنفسك وتخلى البوهيجى يشتغل بس وياخد مصنعيتة لانو لو قالك هاجبلك انا الخامات يبقى غالبا هيعمل عليك شغل ويجيبلك ارخص حاجة ويحاسبك غالى

**aYaBooY** · 12-03-2009 04:12 PM

بص انت العربية عندك نوعها ايه و ديه الرشة رقم كام
يعني لو اول مرة تترش من بعد الفبريكة الي يقولك هاجيبها على الصاج تسيبك منه و ايه هيا حالة السمكرة الي فيها
حاجات جامدة و لا حاجات بسيطة علشان السعر هايتاثر بجودة السمكري بص
انت تشتري كل الخامات على حسابك تنزل تسال و تلف شوية اعرف ان افضل انواع البوية اسمها اسكينيز تقريبا و هي الماني و لما تتفق مع حد لازم
تراعي ان السمكري و بتاع البوية ميعرفوش بعضهم يعني بعد ما السيد السمكر يخلص تجيب الاخ بتاع البوية و يستلم منه العربية مش حضرتك طبعا
و بعد كدة لما تحاسب السمكري لازم تبقي ليه فلوس علشان لو السيد بتاع البوية اكتشف حتة مش عاجباه ميهريهاش معجون لا ترجع للسمكري و هكذا
و مواضيع الدهان هاتلاقي في منها كتير في القسم التعليمي

**walids** · 12-03-2009 10:45 PM

بص

السمكره و البوهيه اسعاهم قد تكون مرتفعه نوعاً ما

يعني انا مثلاً عملت سمكره لعربيتي اتكلفت 600 جنيه ،
و دهنتها دهن فرن ميتالك اتكلفت 1200 جنيه

الأسعار دي تعتبر مخفضه نوعاً ما لأني عملتها عن طريق ناس معرفه

**aymoonoo** · 13-03-2009 03:39 AM

بقلكو ايه طيب انا كنت عايز اعمل عربيتي فرن وادهنها تاني بس ناس قالولي عربيتك فبريكه حرام تعملها فرن وقررت اعمل بس الحتت الصغيره الي مضروبه عندي الباب الي كلو قالي ممكن يتعدل عالبارد وبرضو عندي ضربه خفيفه فالرفرف اليمين والشمال برضو المهم انا عايز اسال هوا لو انا سمكرت الحاجات دي البسيطه ودهنتهم الدهان لسا لما اجي ابيع العربيه يعتبر انه فابريكا حتا لو الحتت دي مدهونه ؟

**lolo2884** · 14-03-2009 06:47 PM

المشاركة الأصلية كتبت بواسطة aymoonoo

بقلكو ايه طيب انا كنت عايز اعمل عربيتي فرن وادهنها تاني بس ناس قالولي عربيتك فبريكه حرام تعملها فرن وقررت اعمل بس الحتت الصغيره الي مضروبه عندي الباب الي كلو قالي ممكن يتعدل عالبارد وبرضو عندي ضربه خفيفه فالرفرف اليمين والشمال برضو المهم انا عايز اسال هوا لو انا سمكرت الحاجات دي البسيطه ودهنتهم الدهان لسا لما اجي ابيع العربيه يعتبر انه فابريكا حتا لو الحتت دي مدهونه ؟

وانا كمان عندي نفس المشكله