الحقونى يا اهل الخبره عربيتى باظت

**leeamra99** · 15-03-2009 01:05 PM

انا اسف يا جماعه فى التعبير (فتحت قربة الماء بحذر شديد لقيتها بطلع دخان رهيب)
ماكنش دخان دا كان بخار ماء

**MMamdouh** · 15-03-2009 02:03 PM

المشاركة الأصلية كتبت بواسطة leeamra99

ومن حوالى اسبوعين لاحظت ان العربيه سحبها قل وخاصة فى الغيار الرابع والخامس ومنذ 3ايام لاحظت ان العربيه وانا ماشى وادوس دبرياج علشان انقل الاقيها بطلت وهيا ماشيه وبتكون على سرعات عاليه

فلتر الهواء و البنزين عاملين كام الف؟
البوجيهات و سلوك البوجيهات عاملين كام الف؟
طلمبة البنزين عاملة كام الف؟
هل لمبة التشك بتنور؟

كمان روحت للميكانيكى غير فلتر البنزين وطلعت اجرب برضه بطلت مرتين قالى يبقى طلمبة البنزين و وعايزه تتغير

احتمال وارد

وبعد كده نظف الحساسات التى على البوابه وفضل يدوس بنزين كتير و العادم رائحته سيئه والعربيه

طبيعى

انا حاسس انها سخنت جدا والغريب ان المراوح مشتغلتش وعداد الحراره قبل النتصف بقليل

طيب انت حسيت انها سخنت ازاى طالما المؤشر فى مكانة الطبيعى؟

حرارة مياه التبريد كانت كام لما كنت بتختبر المراوح؟

وانا سامع صوت طقطقه من الموتور والعربيه بقت مش عايزه تدور نهائيا وكل متدور تبطل لحد مادورناها وسايستها بالعافيه ومش بشيل رجلى من على البنزين خالص لحد ما ركنتها فى البيت لانه قريب

نفس العيب بيتكرر... البوابة و نظافتها ملهاش علاقة

وفتحت قربة الماء بحذر شديد لقيتها بطلع دخان رهيب والميه كلها فارت بره

اللى حصل طبيعى و غلط كبير منك... محدش بيفتح قربة ميه عربية سخنة لانك ممكن تتحرق

فكشفت على الزيت وجدته لونه مايل للاسود ورائحته شياط

طبيعى الزيت المستعمل يبقى اسود و ريحتة كدة

وتانى يوم دورت العربيه وجدتها دارت ودورتها كمان مره دارت وبطلت وكل ما افتح الكونتاكت واغلقه اسمع صوت زنة طلمبة البنزين اغلق الكونتاكت وانتظر 30 ثانيه وافتح اسمع زنة الطلمبه تانى فهل فعلا الطلمبه عايزه تتغير ولا ممكن افكها وتتنظف

مش شرط ان الطلمبة بتزن انها تبقى كويسة... ممكن اوى تكون بتفصل لما تسخن او مش قادرة تولد ضغط كافى لتشغيل الموتور بشكل صحيح

وكيف اتاكد من المراوح والمفروض امتى تشتغل

لازم العربية تتحط على سكانر لمتابعة درجة حرارة مياه التبريد و توقيت عمل المراوح مقارنة بالحرارة

MMamdouh

**leeamra99** · 15-03-2009 09:00 PM

وهو فين مكان خرطوم حساس الماب

وعلى فكره انا غيرت موتور الطلمبه بواحد بوش والميكانيكى طلع شوية بنزين ونظف الماكنه وقالى البنزين ده عليه زيت و قالى لازم تحط 92 وتمشى شويه بالعربيه

**samirayad** · 15-03-2009 09:07 PM

والعربيه بقت مش عايزه تدور نهائيا وكل متدور تبطل لحد مادورناها وسايستها بالعافيه ومش بشيل رجلى من على البنزين خالص

الكلام ده معناه أن كبس المحرك بقى ضعيف ومش قادر يدى حمل يساعد فى حركة السياره

وهو فين مكان خرطوم حساس الماب

خرطوم حساس الماب (خرطوم رفيع راكب على جسم الخانق من الخلف علشان ينقل هواء من اللى موجود فى مانيفول الهواء للحساس اللى راكب فى الصدر فو الأسكترا وأنت فاتح الكبوت )

**leeamra99** · 16-03-2009 10:29 PM

الحمد لله العربيه بقت تمام كشفت عليها عند ميكانيكى بالكمبيوتر وكانت لمبة التشك منوره وطلع حساس tpsوركبت واحد استيراد ب 70 جنيه والعربيه بقت تمام ومش بتبطل خالص وكشف على اليوجيهات وجدها مهببه قالى الرشاشات ديه عايزه تتغير بس المشكله ان العربيه سحبها وحش فهل ممكن تكون الرشاشات فمثلا
العربيه عند 2.5 rpm على الغيار التانى تكون السرعه 40 كم
2.5 rpm على الغيار الثالث تكون السرعه 60 كم
2.5 rpm على الغيار الرابع تكون السرعه 80 كم
2.5 rpm على الغيار الخامس تكون السرعه 100 كم
فهل ده طبيعى وهل الرشاشات ممكن تاثر على السحب

**samirayad** · 16-03-2009 10:35 PM

الحمد لله...............

**MMamdouh** · 17-03-2009 12:02 AM

المشاركة الأصلية كتبت بواسطة leeamra99

الحمد لله العربيه بقت تمام كشفت عليها عند ميكانيكى بالكمبيوتر وكانت لمبة التشك منوره وطلع حساس tpsوركبت واحد استيراد ب 70 جنيه والعربيه بقت تمام ومش بتبطل خالص وكشف على اليوجيهات وجدها مهببه قالى الرشاشات ديه عايزه تتغير بس المشكله ان العربيه سحبها وحش فهل ممكن تكون الرشاشات فمثلا
العربيه عند 2.5 rpm على الغيار التانى تكون السرعه 40 كم
2.5 rpm على الغيار الثالث تكون السرعه 60 كم
2.5 rpm على الغيار الرابع تكون السرعه 80 كم
2.5 rpm على الغيار الخامس تكون السرعه 100 كم
فهل ده طبيعى وهل الرشاشات ممكن تاثر على السحب

تناسب سرعة العربية مع الRPM ملوش علاقة بكفائة الموتور

طالما البوجيهات تعبانة يبقى لازم تغيرها... و لو العربية بتغيب فى الدوارة يبقى سبب تهبيب البوجيهات هو الرشاشات اللى بتسيل

MMamdouh