حمله لإعفاء Abs و Ebd من الجمارك

**tata12001** · 15-03-2009 02:08 AM

حاجه مهمه فعلا و مشكور على الفكره الجميله دى و مؤيد للفكره تماما.

بس بصراحة الفكرة كلها في سؤال واحد ، الحوار دا لو اتعمل ، حيجيب فلوس للحكومة ولا لأ ؟ لو اه يبئة حيتعمل ، لو لأ ، فتأكد تماماً إن الحكومة مش حتفكر فيه

**bemocarlo** · 15-03-2009 03:23 AM

احييك بشده علي موضوعك وفكرتك.اي حاجه لها علاقه باْمن وسلامه المركبه والركاب لازم تكون من الاساسيات وليست رفاهيه وبالتالي تعفي من الجمارك .
bemo,ire

**shalaby2001** · 15-03-2009 04:00 AM

فكرة رأئعة . دا انا كمان بطلب انها تبقى تجهيز اساسى ولا يسمح بدخول سيارات غير مجهزة بهذة التكنولوجيا + ال air bag

**Terrible_DaRsH** · 15-03-2009 05:42 AM

الموضوع ده يا سيدى عايز تدخُل قوى من الحكومة .
وانت اكيد عارف حكومتنا .
اصرف نظر عن الموضوع احسن من وجع القلب .
لو حد من المسئولين سمعك عارف ايه اول حاجة هيقولهالك !!
احنا فى بلد فقيرة ومش عارفين نحل مشكلة رغيف العيش .
يبقي نحل مشكلة ال Abs والكلام الفاضي ده ( ناس فاضية بصحيح ) ..
واحتمال تلاقى المسئولين ميعرفوش يعنى ايه Ebd اساسا !!

**halloween** · 15-03-2009 05:50 AM

المفروض ان ال ABS, BA, EBD, Air bags تبقى من الاساسيات
عربيات كثير فى مصر تفتقر ليهم
المفروض الناس كمان تفكر فى عوامل الامان و درجات العربية فى اختبارات التصادم اعتقد ساعتها فى عربيات واخدة حظ كبير فى مصر هتختفى و عربيات تانية هيبقى عليها العين

انا متفق معاك و شكرا على الموضوع

**heshaaam** · 15-03-2009 07:17 AM

عندك حق ولو الموضوع ده متطلبش دلوقتى هيطلب امتى احنا ف ازمة وف مركز قوة مفروض الناس تشجع مش تحبط

**tutankhamoun** · 15-03-2009 07:33 AM

بصراحة أنا بحييك على الموضوع
و دي خطوة جميلة علشان نعمل حاجة أيجابية في موضوع وسائل الأمان في السيارة

**********************

بس أنا لي رأي في موضوع الحوادث
أغلب الحوادث اللي بتحصل في مصر بسبب السرعة و عدم التزام السائقين بأي قواعد أو قوانين .
علشان نقلل الحوادث في مصر لازم نعمل الآتي :

أولا : سحب جميع الرخص المصدر من جمهورية مصر العربية .
ثانيا : عمل أختبارات جديدة بواسطة خبراء دوليين من دول أوروبية تكون الكوسة و الواسطة لسة ما وصلتش عندهم و في قاموسهم .
ثالثا : أتباع النظم الأوروبية الصارمة في استخراج الرخص .
رابعا : تكهين السيارات الغير صالحة للقيادة على الشوارع و كبسها كعلب السردين المصدي .
خامسا : تركيب رادرات بكاميرات على كل الطرق السريعة و مضاعفة غرامات السرعة و الأنتقال من حارة لحارة بغباء ( غرزة )
سادسا : تطبيق مبدأ النقاط على الرخص المستخرجة و كل غرامة يتخصم عليها نقط معينة حسب فداحة المخالفة .
سابعا : حبس مع سحب رخصه للأبد لمن يسير عكس الاتجاه على طريق سريع وواضح عليه اتجاهات السير مع الغاء عقوبة الحبس للسير عكس الاتجاه في وسط البلد أو الأماكن الغير واضح عليها اتجاهات السير مع الابقاء على غرامة لذلك .
ثامنا : شنق كل سائقي الميكروباص في ميدان عام ليكون عبره لغيرهم من السائقين المتخلفين عقليا .
تاسعا : اعدام سائقي النقل و المقطورة بالرمي بالرصاص في ميدان عام ليكونوا عبرة مثلهم مثل سائقي الميكروباظ .
عاشرا : القاء التكاتك في بحر الرمال الأعظم و التخلص منها نهائيا .

و بكدا هانلاقي أن 99 % من سواقين مصر مش هايبقى معاهم رخص لأن كلهم هايسقطوا في الأمتحانات لأنهم ببساطة أتعودوا على الفوصى و التخلف و الهمجية .

و هانلاقي أن 60 % مثلا من السيارات الموجودة على الطرق هاتختفي نظرا لعدم مطابقتها لمواصفات السلامة و الأمان الأوروبية .
و بكدا الحوادث هاتقل ....... و حرقة الدم هاتقل

حل عملي معملي شوكلوتي معقول جدا .
و كل واحد له شيكولاته كادبوري هدية لمن يقتل سائق ميكروباظ

**Terrible_DaRsH** · 15-03-2009 07:38 AM

طب انت كده يا استاذ توت عالجت حاجة ونسيت حاجة ...
ناقص كيفية اعادة تاهيل واعداد ظباط المرور و ادارات المرور وكيفية التعامل مع الناس ..

**tutankhamoun** · 15-03-2009 07:46 AM

المشاركة الأصلية كتبت بواسطة Terrible_DaRsH

طب انت كده يا استاذ توت عالجت حاجة ونسيت حاجة ...
ناقص كيفية اعادة تاهيل واعداد ظباط المرور و ادارات المرور وكيفية التعامل مع الناس ..

يا باشا دول كمان مينفعش معاهم أي تأهيل
لازم نجيب حُكام أجانب و مشرفين أجانب و مش بهزر و الله
و الله العظيم بتكلم جد .

لازم النظام يكون أوتوماتيكي و لا يوجد أي تدخل بشري مصر فيه
لأن حضرتك عارف الكوسة متأصلة في الدم المصري و الواسطة حاجة فظيعة
و الناس بتعمل الغلط و متعشمين أنهم يعدوا و ما يحصلش أي مُشكلة
أنما لما يكون اللي هايقفشهم أجنبي ... لا له قريب و لا له حسيب .
هاتلاقي الناس خافت و أحترمت نفسها
( أصل أحنا شعب نخاف ما نختشيش )

يبقة ظباط المرور يبقوا مساعدين للأجانب .

و نعدم الأمناء ........ و أقترح رميا بالرصاص مع قائدي التريلات اللي دايما بيبقوا شاربين و ماشيين يتطوحوا
( تتخيل إن أنا كنت ماشي على العين السخنة من كام يوم و ماشي 120 أو 115 .......... و أبص ألاقي تريلا بتعديني و أعتقد و الله أعلم أن سرعته مش هاتقل عن 140 ... أقل واجب

تخيل بقى ده لو أتضطر يقف فجأة ( طبعا مش هايقف ... ده عايز بتاع 2 كم علشان يقدر يوقف الوحش اللي سايقه )

طبعا حاجة أخر أستعباط و أستهبال و استهتار بأرواح الناس على الطريق .

**Terrible_DaRsH** · 15-03-2009 07:55 AM

المشاركة الأصلية كتبت بواسطة tutankhamoun

تخيل بقى ده لو أتضطر يقف فجأة ( طبعا مش هايقف ... ده عايز بتاع 2 كم علشان يقدر يوقف الوحش اللي سايقه )
طبعا حاجة أخر أستعباط و أستهبال و استهتار بأرواح الناس على الطريق .

هو الصراحة احنا عايزين دولة جديدة وارض جديدة وحكومة جديدة ونعيش من جديد بقي لان عشم ابليس فى الجنة مستحيل طبعا ..

اما حكاية التريلا اللى بتقول عليها دى
انا السنة اللى فاتت كنت واقف على اول البارك بتاع الجامعة مع ناس صحابي واتفاجيء بصوت فرامل تييييييييييت من على بعد نص كيلو ولا حاجة وهوب راحت التريلا داخلة فى الميكروباص اللى واقف واتقلبت على البارك و الطلاب اللى كانوا فى الميكروباص اتدمروا و جريوا بيهم على المستشفى والحمد لله انها اتقلبت بعيد عن العربية اللى كنا فيها بشوية وكل ده بسبب استهتار الباشا اللى كان سايق ... (( مفيش فايدة )) .