الموضوع: التفكير المجتمعي السلبي و نظرة المجتمع للدراجة و البساطة

مش كل الناس تعرف بيتك و تقدر تخش جواه عشان تعرف مستواك المادي، إنما كل الناس تقدر تشوف عربيتك .. لذلك تحولت السيارة إلي السلعة الوحيدة تقريباَ التي تستطيع أن تعبر عن مستوي الشخص المادي، و كلما كانت السيارة فارهة أكثر زاد إحترام ووجاهة الشخص .

لو عربيتين بيركنوا واحدة مرسيدس و واحدة 128 .. السايس هيجري علي مرسيدس .. و ذلك ليس تقديراَ لراكب المرسيدس و إنما المرسيدس نفسها .. و تجاهلوا لل 128 هو تجاهل للسيارة نفسها و ليس راكبها أيضاَ .

و مع إرتباط الطبقة الوسطي فما فوق بالسيارات، إرتبطت المواصلات بالمستويات الدنيا في المجتمع و هي الطبقات التي يسهل تجاهلها خاصة بالنسبة للحكومة إذ أنهم لا يمثلون أهمية لهم .. فأصبحت المواصلات غير أدمية .

لذلك فعملية التنقل في المواصلات في مصر مرتبطة بعوامل نفسية و تراكمات ثقافية أكثر من أنها عملية تنقل من مكان لمكان أخر، بل أن الجوانب الإجتماعية فيها تفوق عملية التنقل ذاتها .

لذلك فمن الصعب أن يخرج من هذا الخليط أشخاص يفكرون في البيئة و الزحام و مصلحة المجتمع .

الموضوع كمان مش على العربية الوضوع فى الشغل كمان كله عايز الشغل يجيله تحت البيت و كله عايز يشتغل فى بيته أصلا و يسكن جنب بيت والده أو العيلة
فى واحد صاحبى أخوه الكبير عربيته زى الزفت و بيبقى عليها تراب لازق بسبب الندى الصبح بقوله هو ليه أخوك قبل ما يروح الشغل يمسح العربية لحد لما تسخن يقولى ما ينفعش أصله بيبقى لابس بدلة مش فاهم يعنى إيه مع إن نضافة العربية بتأثر على نفسية الواحد
دا غير واحد تانى بيوصل لأخر شارعهم يعنى بتاع 200 متر بالعربية عشان يجيب علبة سجاير و لو العربية مع والده يبقى ينام
الناس عايزة الحاجة تجيلهم لحد عندهم
و لما نظيف نزل لعب كورة و طايرة الصحافة إتريقت و الناس إتريقت عشان نزل

المشاركة الأصلية كتبت بواسطة tutankhamoun

نسيت ذكر بعض فوائد الدراجة
حرق الدهون و تدريب العضلات مما يعود بالفائدة على الجسم .
تنشيط الدورة الدموية و تقوية عضلات الفلب .
توفير استهلاك البنزين .
المحافظة على البيئة .
أنا بتكلم عن المسافات الصغيرة .....
****************
مع تحياتي

فضلت حوالى شهر اقنع والدى انى اجيب عجله و اروح الجامعة
بيها و هو يرفض رفضا قاطعا معتبرا ان ركوب العجلة قفزة للخلف و يقوللى "احنا مش عارفين نمشى على 4 هتمشى انت على اتنين ؟ "- يقصد العجل- ده غير انه يرفض بشده انى اسوق العربية و غالبا بيصرف عليها اكتر ما بيصرف عليا
يلا يعيش و يصرف

بس فى اتنين اصحابى دلوقتى بيروحوا الكلية بالعجلة يوم و يوم
هى بس عاوزة شوية شجاعة و ثبات
يعنى لما بنجرى حول القصر الجمهورى او الكلية الحربية تلاقى ردود افعال الناس غريبة جدا يعنى اللى يبصلك من فوق لتحت و اكنه بيقول ايه الهبل ده
و اللى يطلع دماغة من العربية و يقولنا عاش يا رجالة عاش و اللى ينظرلك نظرة خاوية من اى تعبير متعرفش هو متعجب ولا مش مستوعب

موضوع متميز وعرضه أكثر من وافي ..
فكرني بجدي (خال أمي) رحمه الله، كان يذهب لعمله ويعود يومياً بالدراجة مسافة لا تقل عن 15 كيلومتر.. بصراحة كنت دايماً اقول يابخته، كانت سككته كلها كورنيش :) والطرق أكيد فاضية .. .إنما دلوقتي نمشي بالدراجات للعمل ازاي؟ لا أتخيل أنني أجرؤ على قيادة دراجة في شارع الطيران مثلاً، أكيد النتيجة مفرمة !!

تعليق آخر على الموضوع، احنا شعب يموت في الأنتخة عشان كدة الستات عندنا مربربة والرجالة من ذوي الكروش لأننا نكره التعب والمشي، وده في كل الطبقات حتى اللي معهوش سيارة، خد عندك الست حالياً بدلاً من المشي للسوق تشير لتوكتوك في الذهاب والعودة، الشباب يوقف ميكروباص لمسافة نصف محطة وهو زي الشحط ولامؤاخذة، الأطفال في خروجهم من المدارس يتقافزون في أوتوبيسات النقل العام لنصف محطة أوتوبيس ويتعرضون لزجر الكومساري في منظر هزلي يومي احنا شعب أنتييييييييييييخ.

ياعم انت دخلت دماغي وعششت فيها اخر حاجه
خصوصا فموضوع الجواااااز فعلن يا جماعه صباح المنظره الفارغه