الموضوع: لماذا لم تقوم مصر بانتاج اول سيارة مصرية 100 % مطابقة لاحدث التقنيات !!

ده سؤال وجيه جدا

واعتقد من وجهة نظرى
المشكلة مشكلة فكر سياسي واقتصادي للبلد
اليوم عندنا وكلاء لسيارات تجميـــــــــــــــــــــ ـــــع قرابة 50 سنة بالسوق وكل الي فكرو فيه تجميع واضافة مكونات مصرية خيبه يعنى بطاريه واطارات وفرش يعنى مش اضافات اصلا

المهم في اعتقادي هؤلاء رجال الاعمال بيدورو على المكسب السريع بالاضافة الى ان فكر الصناعة يختلف دائما ورائة حب حقيقي للبلد مش مجرد كلام وهتافات المشكلة اراها ليست بالتكنولوجيا وليست بالايدي العاملة المشكلة دائما وابدا بمصر هي الفكر ثم الفكر ثم الفكر

للاسف ليس لدينا اي استراتيجية احنا عيشين وبس حكومة بتمشي الامور وبس وكل ما تلاقى مطب تقع في وضحضيرة تقوم تسوط ادى باختصار مصر

بجد نفسنا في ناس تجي تغربل المجتمع المصري كله
محتاجين زعامة حقيقية محتاجين فكر واستراتيجية جديدة وادارة واعيه
وقبل كل ده الضمير وحب البلد وجعل مصر قبل كل شيئ وخاصة المصلحة الشخصية والمكسب السريع


الموضوع اكبر من كده بكثير
السؤال الاعم
ليه مصر ما زالت وستستمر دولة نامية بالرغم من قدرات شعبها ...؟؟

من الاخر احنا وبعض الدول ممنوع ان احنا ننتج اى حاجة زى دى او نصنع لأن فى اتفاقيات مفروضه علينا بكده وطبعاً القرارات دى من امريكا واسرائيل

المشاركة الأصلية كتبت بواسطة ZOZODERAZ

الف باء اقتصاد قوي هو وجود صناعه ذات معرفه كثيفه بمعني ان هذه الدوله تتميز بصناعه معينه او عده صناعات تملك اسرارها و تملك تفردا يميزها عن منتجات الدول الاخري , الفكر ده اصلا مش موجود ومش متطبق هنا !!!
لو القينا نظره علي خريطه مصر الصناعيه نجد توسع في صناعه الخدمات ( سياحه , اتصالات , قناه السويس ...الخ) , و انتشارا لصناعات استهلاكيه غذائيه( البان وبسكوت ) , و وجود صناعات تحويليه ذات معرفه محدوده( صناعه حديد التسليح , سيراميك , تجميع سيارات , تجميع اجهزه الكترونيه...الخ) .
جميع الصناعات التي ذكرناها تتفق جميعها علي اساس واحد و هو الاعتماد علي الخارج , يعني ببساطه انه يجي رجل اعمال او مجموعه مستثمرين بفلوسهم او بفلوس البنوك و عندهم فكره معينه و الفكره دي تتحول لمصنع و منتج معين , طيب. المصنع ده الماكينات بتاعته هتيجي منين ؟ و المواد الخام اللي هتصنع المنتج هتيجي منين ؟ و مين اللي هيركب الماكينات ؟ و مين اللي هيدرب الناس عليها؟ طبعا الاجابه معروفه , من الخارج . هيجيلك خبير اجنبي ( احنا بنقول عليه خبير بس هو بره بيقولوا عليه اخصائي في حاجه معينه مش خبير . تفرق كتير) المهم , هييجي و يقوم بالمطلوب هو و الفريق بتاعه , . طيب. مين اللي هيشغل المصنع ؟ الناس بتوعنا طبعا , يجيبلك كام مهندس و يسافروا بره ( علي حساب صاحب المصنع ) و يتعلم ازاي يشغل الماكينات الجديده و يجوا مصر و الفرحه مش سايعاهم شاعرين انهم اصبحوا حاجه كبيره اوي و مهمه و ينقلوا اللي خدوه لناس جديده . و بس علي كده و المصنع يشتغل و الانتاج يزيد وولادنا اللي بيشغلوه . طيب . صيانه المكن من اللي هيعملها احنا و لا سياده الخبير ؟ طبعا سيادته , و لا يجرؤ اي شخص اذا تعطلت ماكينه في المصنع ان يقترب منها ولا يجرؤ ان يقف بجانب الخبير لما ييجي يصلحها top secret و طبعا سياده بييجي في فندق 5 نجوم و يقبض الشيء الفلاني و يرجع تاني عشان صاحب المصنع او مديره( لو كان مصنع كبير) خايف علي استثماراته !!
لما نيجي ننظر للواقع نظره موضوعيه هتلاقي ان الغرب ينظر الينا انهم ( المبدعون و المفكرون و اصحاب النظريات ) واحنا ( طبقه الشغيله ) علينا اننا نعمل و نخدم علي افكارهم وابداعاتهم التكنولوجيه بس . لكن تملك سر تصنيع منتج معين , لا ممنوع و سنتك سوده و هتتعرض للعقوبات انت هنا ترس في آله من آله كامله .
الوضع ده للاسف الشديد موجود و عن تجربه شخصيه و تجارب و خبرات آخرين و موجود في الصناعات كلها من اول مصانع الحدديد حتي مصنع البونبوني و العلف !!!
صناعه زي السيارات و معلش لو كنت طولت عليكم , تعتمد علي العلم و المعرفه , التصميم علم و حتي لو بالكومبيوتر, الكومبيوتر بيسهل و يختصر الوقت و ادق لكن تعتمد بنسبه كبيره علي العنصر البشري و علي المهارات الفرديه , التنفيذ علم العلم و محتاج مهارات عاليه و متدربه جيدا , باختصار عايز تصنع سياره , لازم اولا تعدل المناهج في الجامعات و تخليها تعتمد علي الابتكار و الابداع ومتخافش من فكرتك و انك تفكر و تحاول مره و هتفشل التانيه هتنجح . لازم وجود دعم مادي يدعم الابتكارات و تكون عليه رقابه عشان ما يتسرقش و يروح في حته تانيه . النقطه اللي بعد كده بعد ما اعددنا العنصر البشري , ياتي دور الحكومه و هو مسانده العقليات المتخرجه من هذا النظام التعليمي الجاد و توفرلهم الدعم و نبدأ خطوه خطوه حتي لو المصنع هيخسر في البدايه او هتقلد منتج معروف , بس في النهايه هتوصل هتوصل .
المشكله ياجماعه ان احنا ننظر تحت اقدامنا , و بنفرح لما نشتغل و نقول احنا بنقضي علي البطاله . و بنقول ان احنا بندعم الناتج المحلي و بنصدر للخارج , آه فعلا ممكن ده بحصل , بس هيحصل لفتره قصيره و مش هيخليك تتقدم للأمام , لان الصناعات اللي عندنا تعتمد اعتماد شبه كلي علي الخارج و يخليهم يتحكموا فيك و مش هتوصل لحاجه في النهايه , انما الصناعات كثيفه المعرفه او متعدده المعرفه هي دي ميدان السباق الحقيقي و حلبه المنافسه و ميدان خصب للتقدم لانها ببساطه تعتمد علي الفكره و الفكره بطبعها متغيره و متطوره . و شكرا و آسف للاطاله .

معاك فى كل كلمة قلتها
احنا فعلا ينقصنا :
-العلم
-التكنولوجيا
و دول بييجو بالاهتمام بالتعليم اولا ثم الشراكة مع الشركات الكبرى فى المجال و التجميع ثم انتاج الصناعات المغذية ثم شراء اسرار الصناعة و هى الاصعب و الاغلى وبدا التصنيع المحلى
-الرغبة
و هذا هو العامل الاهم على الاطلاق

احنا مش هانشترى عربية مصرى حتى لو نزلت لاننا عارفين صناعتها

المشاركة الأصلية كتبت بواسطة octooo

احنا مش هانشترى عربية مصرى حتى لو نزلت لاننا عارفين صناعتها

أيه الحاجة المصري اللي حضرتك جربتها و على أساسها داخل تقول كدا ؟؟

و لا حضرتك بتتكلم على السُمعة و الكلام القديم بتاع عقدة الخواجة ؟؟

مش النيسان صني دي فيها أجزاء كتير مصري و شغالة زي الفل .
مش البي الام فيها أجزاء مصري و برضه شغالة و بتتباع
مش المرسيدس برضه شغالة و مصنوع منها أجزاء في مصر
مش أوتوبيسات النقل العام شغالة طحن ليل و نهار و مصري الصناعة و شغالة زي الفل .
مش العربية النص نقل الدبابة ( شيفرولية ) مش 75 % منها مصري و شغالة و هي أفضل واحدة في سوق النص نقل .

يا جماعة بلاش تهبيط معنويات و كمان دي أبواب رزق مفتوحة لناس كتيرة
بالاضافة ان الصناعة عمرها ما هاتتقدم لو فضلنا نقول كدا على بلدنا و لعى صناعتنا حتى لو الصناعة دي بسيطة .


و لو فيه أي عيوب بتظهر في حاجات مصري
أنا مستعد و بالبرهان أجيب حاجات و عربيات ألماني و ياباني و أوروبي عموما و فيها عيوب و بالاثبات
بس للآسف عيب الحاجة المشهورة بيبقى على قلبنا زي العسل
إنما الحاجة اللي مش مشهورة عيبها بيبقى جمل و حصان على رأي الجماعة العرب البدو . ( عامل نفسي هام )

المشكله ان دا استثمااااااااااااااااااار طويــــــــــــــــــــــ ــل الاجـــــــــــــــــــــ ل
عايز صرف كتيــــــــــــــــــــــ ـــــــر الاول من المستثمر او الحكومه عقبال ما يبتدي يدي ارباح ودا لا يحقق الارباح السريعه زي البورصه والاستيراد والتصدير
كمان مفيش هدف قومي ان مصر تبقى دوله صناعيه
دي مقضياها جبايه يا جماعه
وإنا لله وإنا إليه راجعون