الموضوع: عيوب الهيونداى i10

أنا كنت كتبت موضوع بخصوص الهيونداى i10 2009 و فيه مميزات العربية.
http://www.nilemotors.net/Nile/showthread.php?t=59729

انما هنا هسرد لكم عيوب العربية اللى لاحظتها بعد 2200 كم من الاستخدام:

علامة هيونداى الموجودة فى الدريكسيون شكلها جامد جدا و شيك للاسف بدأ يظهر عليها نقط سوداء رغم انى مش بلمعها كتيير يعنى لمعتها حوالى 3 مرات بقماشة مبلوله. و ده معناه انها هندى ابا عن جد, انا بركب رينو كليو 2003 علامة كليو زى الجديدة تماما..!!! طبعا اختلاف خامات و اكيد علامة هيونداى انتاج محلى فى الهند.

الكاوتش و الثبات:

مقاس الكاوتش صغير كان المفروض يبقى اعرض من كده و ان كنت شايفه لا يؤثر على ثبات العربية لكن هى مسألة شكل انه بيبان رفيع. لكن عن تجربة العربية ثابتة جدا لكن انا مجبتش بيها سرعة 100 كم/س خالص يعنى اقصى حاجة 90-95 و حتى فى الطرق الغير مستوية ثباتها هايل و الدريكسيون ثابت جدا و ماسك نفسه و بيتقل مع السرعة و بدون اى اهتزازات. و فى المناورات ثابته جدا و ملهاش حل و مفيش تعويم او اى شىء يعنى على 60-70 تاخد غرز بعرض الشارع حتى لو الارض مليانه تراب و رمل مفيش مشاكل بجد و دى فى اكتر من موقف فوجائى حصل لى و كانت ممتازة حتى الملفات الحاده بلفها على 70-80 و الحمد لله ثابتة جدا و متحسش بميل جامد يمكن الماتريكس بتميل اكتر منها.

العفشة و الراحة:

العفشة ناشفة و ده بيحسسك بتفاصيل الطريق و بالذات لو فى اشباه مطبات و حفر جامده و اخدتها على سرعتك يعنى انا اخدت واحدة و العربية لسه جديدة على طريق الاوتوستراد و انا رايح حلوان كنت ماشى على 80 كم/س و على يمين الكوبرى خدت حته مدغدغة و عاليه عن مستوى الطريق حسيت ازاى العربية ناشفة لكن مفيش مشاكل فى اتزان العربية نهائيا. و العربية مريحة و ناعمة جدا متحسش بأى اهتزازات او خشونة فى ارضية العربية و كمان الموتور ناعم جدااااااااااااااااااااااا ااااااااااااااااااااااااا اااا و مفيش اهتزازات اطلاقا سواء اثناء السير او فى السلانسيه و احسن من عربيات فى فئات اعلى منها.

الكراسى ايضا ناشفه بس مريحة جدا و الكنبة الخلفية مريحة جدا بناء على آراء الناس اللى ركبت ورا. و اكدوا لى انها اوسع من الفيرنا بشىء بسيط بالنسبة للراكب الخلفى و ده من واحد بيركب فيرنا على طول و بيسافر مع اصحابه. لكن اعتقد ان عرض العربية يبقى قليل على 3 افراد فى الكنبة الخلفية. لكن بالنسبة ل 2 راكبين اكدوا انها مريحة جدا و مش مزنوقين رغم انى قاعد مستريح جدا قدام و مرجع الكرسى و مايل للخلف.

التكييف لم يتم تجربته غير مرتين و اشتغل اقل من دقيقة و كان اثناء السير. و كان معدل تدفق الهواء عالى جدا و سرعته عاليه جدااااااا لكن حسيت ان الهواء نفسه مش بارد اوى زى عربيات تانية (الماتريكس و الكليو...)
لكن كتجربة حقيقية لسه مش متأكد لكن فى عضو قال ان التكييف مش بارد اوى علشان كده قلت اشارك باللى عارفه.

من ضمن العيوب ان غبور منزل موديلات 2009 من غير ساعة فى التابلوه و لما سألت عليها فى التوكيل عرفت انها ب 600 جنيه و فى نظرى متستاهلش اكتر من 100 جنيه.

نظام الصوت:

الكاسيت RoadStar CD MP3 و طلع كويس جدا عكس ما كنت اتوقع تماما و بيشغل Audio و ملفات MP3 فقط لكن ال WMA لازم تتحول الى MP3. و ممكن تحط 150 اغنية و اكتر على الاسطوانة الواحدة و ممكن تقلب اغنية اغنية او تقلب عشر اغانى للامام او للخلف او تختار نظام Random يعنى التشغيل العشوائى.. و فيه مميزات تانيه لكن انا مجربتش ولا دورت. و كمان الشاشة بتعرض اسم الاغنية و الشريط...

السماعات من وجهة نظرى جودتها مش عالية بالذات فى الاغانى اللى جودة الصوت فيها منخفضة لكن الاغانى اللى جودتها عالية يعنى لو 258 و 300+ Kbps هتلاقى الصوت نقى و لو عالى مفيش مشاكل فى السماعة.

كماليات ناقصة:

العربية نازله بدون سنتر او انذار و ممكن تركب اللى يعجبك, انا ركبت الانذار و السنتر الاصلى اللى بينزل فى هيونداى زى الماتريكس و الالنترا.. الريموت بالمفتاح مع بعض كلفونى 600 جنيه من عند عشم نوار فى شارع دمشق و معاهم 3 سنين ضمان شامل تركيب سنتر للشنطة.

اسعار قطع الغيار الظاهر انها عاليه يعنى هواية الزجاج الخلفى اتكسرت فى محاولة سرقة و غيرتها كانت بحوالى 300 ج او اكتر بدون التركيب و الذى منه و كانت اخر واحدة موجودة فى التوكيل. لكن انا مسألتش على اسعار قطع الغيار.

مميزات العربية اللى قلتها قبل كده:

ناعمة جدااااااااااااااااااااااا اااااااااااااااااااااااا و الموتور استجابته سريعة و استهلاك البنزين قليل جدا و راحه و اتساع و ثبات و سواقتها مريحة جدا و سهولة الركن و المناورة فى الاشارات و الزحام و الفرامل مدهشة و قوية جدااااااااااااااااااااااا ااااا تحس انك فى عربية افخم و اكبر من فئتها.

ارجو ان اكون قد افدتكم و لو بقليل.

المشاركة الأصلية كتبت بواسطة haany_ghazy

انسان محترم جدا شكرا على المعلومات الهايله
وانا انشاءالله ناوى اشترى العربية دية هل تنصحنى بيها ولا بيكانتو
وشكرا

الله يخليك يا باشا بجد انت اللى ذوق.. انا كنت زيك و حابب البيكانتو بس ال i10 عجبانى شكلها اكتر من قدام و من جوه اعتقد الخامات افضل شىء بسيط لانى كنت دايما بتفرج على العربيات بالليل فى المعرض لكن لما شفت البيكانتو مره الظهر حسيت ان ال i10 افضل كخامات بشىء بسيط, لكن البيكانتو اللى التابلوه بتاعها رمادى*اسود شديده.. و ال i10 تتميز عن البيكانتو ان حجم الشنطة اكبر شوية و فى الخلف المساحة اكبر من البيكانتو قليلا لو الكراسى الامامية راجعة خالص.
و انا شايف ان ال i10 فيها على الاقل سى دى و سعرها اقل من الكيا حوالى 5000-6000 جنيه؟؟؟!!!!!!!!!!!!! معرفش ليه البيكانتو غاليه و مرخصتش بالعكس بتغلى.. و البيكانتو مش هتكون احسن من ال i10 فى تقديرى رغم انى لسه بحب البيكانتو جدا. و الدليل ان معظم المواقع اللى بتقيم ال i10 فى اوروبا قالوا انها بتتميز عن البيكانتو فى نقاط قلت عليها قبل زى ميل العربية فى الملفات الحاده اقل من البيكانتو (road handling) و الباور افضل فى ال feedback و بيتقال انها ممتعة و سواقتها مرحه entertaining and fun to drive و ملقتش مواقع قالت كده على البيكانتو لكن اعتقد العربيتين شبيهين جدا اذ لم تكن ال i10 افضل نتيجة ان تصميمها احدث.
لكن البيكانتو فيها عيب ناس كتيير قالت عليه انها بتتنطط كتيير و الكلام ده مش بلاحظه فى ال i10 خالص و يمكن ساعات لما الطريق يبقى طالع ناااااااااااااااااااااااا اازل كله مطبات صغيره بيكون فى حركه عادية من العربية لاعلى و ده رد فعل طبيعى حتى فى الماتريكس بيتحس.
كمان متفكرش فى موضوع كورى و هندى انا مكنتش بفكر فى ال i10 علشان هندى لكن لما ركبتها بجد لقيت عربية مكنتش اتوقع انها تكون كده و بالنعومة دى خاااااااااااالص بجد ابدااااااااااع.
و الفرش الجلد 100 100 ميتبهدلش زى القماش.
ميزة البيكانتو ان الكاوتشات اكبر حاجة بسيطة عن ال i10 لكن حرااااااااااااام تدفع 6000 جنيه فرق و مش هتحس بفرق!!!!!!!!!
و لو ناوى تشتريها توكل على الله و ربنا يوفقك.