الموضوع: يوم معووج لعربية معووجة في توكيل معووج :)

امبارح و في محاولة منى لعمل صيانة الالف للمرة التانية خرجت من المعادي الساعة 5 الصبح(مبهزرش على فكرة) علشان اوصل لتوكيل دايو ابو رواش اول واحد
وبالمناسبة لا يوجد اي علامات ارشادية تدل على وجوده على وجه البسيطة
و مع العلم اني عملت مغامرات علشان اعرف مكانه بالظبط اليوم اللي قبله (يعني رايح متجه)
وصلت الساعة ستة بالتحديد لقيت نفسي نمرة 7!!!!!!!
ولاني بتفائل بالرقم ده قلت كويس انها جت على قد كده و اظن ان ده كان علشان الاخوة من الاقاليم كانو هناك من 5 الصبح
بدأنا دخول الساعة 7 و خدت الرقم بتاعي و بدأوا استلام العربيات الساعة 8 و تم الأستلام بعد ما لبسوا الكرسي غطا بلاستيك و حطوا ورقة على الارضية
و اخدوا ملاحظاتي و كان المهندس مستمع جيد و دي ملاحظاتي:
زوايا
نشع زيت من الموتور
صوت الموتور مش سلس (واعزى النقطة دي لان العربية لسة مكملتش5000كم)
غربلة في الفرامل (خاصة على السرعات العالية)
فروقات في الشنطة والكبوت و الأكصدام الامامي كالعادة(و دي بعد ما اخلص اطلع على قسم السمكرة)
و قعدت اتكلم مع بعض الناس و اجمع الاراء عن التوكيل
انقسم الناي اى فريقبن:
الاول....فريق راضي تماما عن التوكيل و من الاخر مبيعملش اي حاجة برة
التاني....فريق متعذب معاهم في عربياتهم و اغلبها زيرو
عموما ملقيتش حد عامل خناقة كبيرة او بيزعق على مشكلة كبيرة او اي دوشة حاصلة او ان اي حاجة يتم اعزائها الى ان العميل عنده تهيؤات او قلة ثقة في العربية

الساعة كام يا ريس؟؟
الساعة 2!!!
دي صيانة 1000 يا ناس و كمان مطلبتش زيت علشان احط شل الترا مش موبيل وان

اظاهر الكلام كان خدني و نسيت اسأل عن العربية

النتيجة:
تم تغيير الطنابير الامامية في التوكيل في الضمان من غير اي مناقشة
تربيط وش الموتور و ضبطه بالكمبيوتر
وللأمانة كل مشاكلي اتحلت رغم الوقت الكتير ما عدا الزوايا و انا ناوي اروح اعمله عند واحد اعرفه فنان زوايا
تعالى بقى للسمكرة
دخلت تبع الضمان طبعا و ابدى المهندس قبولها تماما في الضمان نظرا لأنها لسة زيرو
لكن العامل كان ليه رأي تاني:
يا باشا الفروقات الامامية دي من حكة في الأكصدام من تحت (و فعلا لقيت حكة بسيطة)
بس انا مبسيطش على العربية و انا بستلمها من المعرض و ارجوا من الجميع مراعاة ذلك في المستقبل
قلتله:انا مستلمها كده و مفيش خربوش واحد فيها من اي مكان زي ما انت شايف!!
المفروض اخد عربية زيرو و اروح ارفعها مثلا؟؟
هو:انا نضطر اقول للمهندس علشان الموضوع كده ب.......(قلتله ظبطها و هظبتك)
في لحظة:يا باشا عنينا ليك من غير اي حاجة (سعر الراجل ده 10 جنيه بالتمام والكمال)
و ساب كل حاجة في ايده و جري على العربية و في 5 دقايق كانت زيرو فعلا!!!!

مشيت من عندهم الساعة4 و بقول كويس انها جت على قد كده

ولكن.....

اذا لم تكتشف اي حاجة بنفسك في العربية فبل ال1000

فالعوض عليه

طلعوا كمان مرببطوش وش الموتور و ربطه بنفسي النهاردة........!!!!!!!!
اظاهر مغيروش غير الطنابير و حلقوا للباقي