الموضوع: شغل في كهرباء اللانوس - دينامو , تكييف , كتاوت نور امامي , فوانيس خلفي

السلام عليكم و رحمة الله و بركاته
من يومين عملت شوية شغل في كهربة عربيتي - لانوس1 موديل 99 - عند كهربائي في الحي السابع اسمه الاسطى رضا

انا قلت اشرك الاخوة الكرام هنا معايا في التفاصيل , على اساس لو فيه حاجة مش مظبوطة في اللي حصل او حاجة غالية اعرف و اللي ما يعرفش يعرف برده , و لو مظبوط يبقى باقي الناس يعرفوا مكان كويس

ملخص الشغل
________
* خشونة في بلية الدينامو
فك الدينامو لحد ما وصل للبلية , و طلب مني اخلي الخراط يفكها - الخراط اخد 5 جنيه - و اجيب له غيرها , اشتريت بليتين جداد من محل قطع غيار هناك برده اسمه رسلان بس مش فاكر بكام - خد في القصة دي 30 جنيه

*تبريد التكييف ضعيف
قال لي محتاج يتشحن فريون , خد في القصة دي 70 جنيه

*النور الامامي ضعيف
طلب اشتري كتاوت نور بأسلاكه - محل قطع الغيار - جنبه برده بس محل تاني - خد في الكتاوت و الاسلاك 75 جنيه

*الكلاكس بيعلق
فكه و ركب له حتة من فيوز زجاجي و بقى كويس

* تغيير الفوانيس اللي ورا
الفوانيس التايواني لقيت الواحد ب220 جنيه , فاستغليتهم , كان الموجود التركي و الصيني , كان الفانوس ب100 جنيه ,طلب يشوفهم و لما وريتهم له قال لي خليك في التركي , بس لما ركب لقيت الفانوس خارج عن جسم العربية حوالي 3 مللي تقريبا

*تركيب اريال الراديو

خد هو في القصص التانية اللي انا ما كتبتش قدامها اسعار دي 20 جنيه كمان
انا ما فاصلتوش بصراحة