محتتتتتتتتتتار ومحتاج المشورة....!

السلام عليكم جميعاً. الموضوع باختصار شديد هو اني محتار بين حاجتين

الاولي هي اني انزل اجازة لمصر طيران واستأجر سيارة طول مدة الاجازة (50 يوم) وانا في مصر وطبعاً ادفع مبلغ وقدرة (عادي) في الايجار وامضي علي شيك علي بياض (بلوة سودة ومصيبة)

الثانية، انزل بسيارتي براً زي ما عملت السنة اللي فاتت وطبعاً الفكرة دي جتلي لما قرأت مواضيع كتيييييييييرة جدا هنا في المنتدي عن ارتفاع اسعار السيارات والايجارات في ام الدنيا...المشكلة ان الرحلة طويلة جدا ومرهقة وتاخد لها علي الاقل 3 ايام في الطريق

مش عارف اعمل اية...افيدوني يا اخواني في الله

انا رايي طبعا انزل بعربيتك بدل ما تحتاس هنا في الأيجار وتخلي احد ياخد عليك ورق وانت لست محتاج لذلك
فأنت اعطاك الله سيارة فليه تبهدل نفسك مع الناس سواء مواصلات او ايجارات
صدقني هات عربيتك علشان متفكرشي في اي حاجه هنا غير انك تركب عربيتك وتمشي
هتتعب 3 ايام في الرحلة بدل ما تتعب كل يوم هنا في بهدلة المواصلات او الأيجارات

وتيجي بالسلامة ان شاء الله

اقتباس:

---

المشاركة الأصلية كتبت بواسطة أبو عبدالله

انا رايي طبعا انزل بعربيتك بدل ما تحتاس هنا في الأيجار وتخلي احد ياخد عليك ورق وانت لست محتاج لذلك
فأنت اعطاك الله سيارة فليه تبهدل نفسك مع الناس سواء مواصلات او ايجارات
صدقني هات عربيتك علشان متفكرشي في اي حاجه هنا غير انك تركب عربيتك وتمشي
هتتعب 3 ايام في الرحلة بدل ما تتعب كل يوم هنا في بهدلة المواصلات او الأيجارات

وتيجي بالسلامة ان شاء الله

---

+11111
خصوصا لو اجرت عربية 50 يوم هنا فى المحروسة .
مش هتخلص من المشاكل و ممكن لا قدر الله العربية يحصل لها حاجة و اكيد هتبقي مش فاضي تصلح وتعمل خصوصا ان قائدى السيارات فى مستوى تفكيرهم فوق العادى ..

يسلموا (ابو عبد الله و Terrible _Darsh) علي الافادة وعموماً انا معايا واحد صاحبي عايش هنا في قطر هاتفق معاة علي الموضوع دة واشوف ان شاء الله وما انحرمش منكم يا شباب

انا رايى قولى على ميعاد الرحله وابعتلك عربيه للمطار وخدها ال 50 يوم وارجعك تانى المطار وجرب وصوابعك مش زى بعضيها
بنعمل كده مع العرب والاجانب ايش حال المصريين

اقتباس:

---

المشاركة الأصلية كتبت بواسطة mohamedezat

انا رايى قولى على ميعاد الرحله وابعتلك عربيه للمطار وخدها ال 50 يوم وارجعك تانى المطار وجرب وصوابعك مش زى بعضيها
بنعمل كده مع العرب والاجانب ايش حال المصريين

---

ممكن تقوله انواع العربيات و التكلفه للمدة دي كلها هتبقا كام تقريبا عشان يكون عامل حسابه و يعرف يقرر صح

غالبا هاتكون لانسر اتوماتيك او مانيوال الشكل البومه
السعر 160 جنيه ليك حق 120كم
او 180 جنيه عداد مفتوح
السائق لو احتاج 25 لليوم وطبعا السائق مسؤال مسئوليه كامله عن السياره

اقتباس:

---

المشاركة الأصلية كتبت بواسطة mohamedezat

غالبا هاتكون لانسر اتوماتيك او مانيوال الشكل البومه
السعر 160 جنيه ليك حق 120كم
او 180 جنيه عداد مفتوح
السائق لو احتاج 25 لليوم وطبعا السائق مسؤال مسئوليه كامله عن السياره

---

طيب لو المسافة اقل من 120 كم\يوم هايكون السعر كام؟ مستني الرد يا زعيم...وتسلم علي اهتمامك

عن تجربة شخصية لو قادر مادياً أشحن عربيتك وتعالى طيران واستلمها هنا وممكن يوصلوهالك لحد باب بيتك لو عايز وماتفكرش أبداً انك تنزك سايق المدة دى كلها وربنا يكفيك شر الطرق.وعلى فكرة لو حسبتها مادياً هاتلاقى شحنها ونزولك طيران هايكلفك اقل من الايجار فى المدة اللى هاتقضيها فى مصر بس هاتفرق انك تكون تجنبت خطر الطريق والسواقة وفى نفس الوقت بتسوق عربيتك اللى انت واخد عليها ومش خايف من أى حاجة زى الشيك اللى هاتمضيه او أى أصابات فى العربية لاقدر الله.

انزل اشتري عربيه صغيره وبيعها لما تمشي ومهما خسرت فيها انت الكسبان
لانك حتريج دماغك من خرابيش الايجار وخبطاته وتلاكيكه ولو خسرت حتي فيها 5000 جنيه ودي مش حتحصل طبعا حيقف عليك اليوم ب100 جنيه
وفي الاول والاخر انت مريح دماغك من اي قرف وامضائات

100كم لليوم = 140ج
لانسر بومه

اولا ربنا يكفيك شر الطريق والمصاريف الى هاتتصرف فى الطريق بس هاتخليك تاجر عربية لمدة شهر وانت مرتاح وتيجلنا بالسلامة

ده يتوقف علي نوع عربيتك

اقتباس:

---

المشاركة الأصلية كتبت بواسطة powerofhelll

ده يتوقف علي نوع عربيتك

---

انا عربيتي نوعها تويوتا برادو 6 سلندر VX موديل 2004 (شوف صورة التوقيع زيها بس عربيتي لونها ابيض) وعلي فكرة نزلت بيها السنة اللي فاتت وما شاء الله كانت ممتازة وريحيتني كتير في الطريق وفي مصر ودة لاني عايش في القاهرة ووالدي واخواتي كلهم عايشين في المنوفية ولازم علي الاقل كل يومين انزل المنوفية عشان اشوفهم فكانت دراعي اليمين

والله يا استاذ ميدو نفس المشكله والحيره دى واقع فيها اخويا وعلى فكره برضه هو عندكم فى الدوحه مهندس تخطيط ومعاه تيدا 2009 وكان نفسه ينزل بيها الصيف ده على شهر 7 بس اصلا دى اول سنه ليه بره مصر ومعهوش حد كمان يبدل معاه فى السواقه والطريق طويل جدا بس برضه موضوع الايجار ملعبك اوى ..شيكات ووصلات امانه ومش عارف ايه ياما شركه محترمه بس هتبقى غاليه اوى 5000 او 6000 بالقليل وهو محتاج العربيه جدا فى الاجازه لان عنده مشاوير كتير كلها سفر بين دمياط والقاهره واسكندريه

ياجماعه بجد لو فى مكاتب تاجير محترمه بس تكون اسعارها معقوله تقولولى

اقتباس:

---

المشاركة الأصلية كتبت بواسطة mokhtar

ياجماعه بجد لو فى مكاتب تاجير محترمه بس تكون اسعارها معقوله تقولولى

---

باردو
طيب ع العموم لو حد عاوز حاجه يكلمنى باردو

اشتري عربيه صغيره وخليها في مصر لزوم الاجازات
127 ولا ماروتي في حدود 20 الف بالكتير
لو جيت بعربيتك 3 ايام سفر محتاج اسبوع راحه بعدها

اقتباس:

---

المشاركة الأصلية كتبت بواسطة mohamedezat

باردو
طيب ع العموم لو حد عاوز حاجه يكلمنى باردو

---

حضرتك لو انا عايز لانسر بومه اتوماتيك لمده شهر ان شاء الله هتبقى من شهر 7 تقريبا ميعاد وصول اخويا من الدوحه فى مطار القاهره الشهر كله بتوصيلها للمطار يعمل كام لو عداد مفتوح ويعمل كام لو محدد
شكرا مقدما

اقتباس:

---

المشاركة الأصلية كتبت بواسطة mokhtar

والله يا استاذ ميدو نفس المشكله والحيره دى واقع فيها اخويا وعلى فكره برضه هو عندكم فى الدوحه مهندس تخطيط ومعاه تيدا 2009 وكان نفسه ينزل بيها الصيف ده على شهر 7 بس اصلا دى اول سنه ليه بره مصر ومعهوش حد كمان يبدل معاه فى السواقه والطريق طويل جدا بس برضه موضوع الايجار ملعبك اوى ..شيكات ووصلات امانه ومش عارف ايه ياما شركه محترمه بس هتبقى غاليه اوى 5000 او 6000 بالقليل وهو محتاج العربيه جدا فى الاجازه لان عنده مشاوير كتير كلها سفر بين دمياط والقاهره واسكندريه

ياجماعه بجد لو فى مكاتب تاجير محترمه بس تكون اسعارها معقوله تقولولى

---

لالالالالا اوعي تخلية ينزل بالتيدا. حرام دي عربية صغيرة ما تستحملش الطريق وكمان المشوار هايفرمها وبعدين التيدا مش امان بالنسبة للطرق الطويلة لانها بعد 120 كم بتكون زي الريشة وخلي بالك السرعة العالية مع ضغط الهوا بيكسر الاكسدام الامامي والكشافات لاني شفت السيارات اللي في السعودية معظمها مكسرة اكسدام وكشافات امامية.
لو اخوك عيلتة صغيرة خلية ينزل طيران ويريح نفسة وفيما بعد لو حب ينزل بري يكون غير التيدا وجاب عربية 4x4 تكون افضل في السفر والمسافات الطويلة

اقتباس:

---

المشاركة الأصلية كتبت بواسطة نور القمر

اشتري عربيه صغيره وخليها في مصر لزوم الاجازات
127 ولا ماروتي في حدود 20 الف بالكتير
لو جيت بعربيتك 3 ايام سفر محتاج اسبوع راحه بعدها

---

انا فكرت في الحكاية دي بس فية مشكلة..اولا انا عاوز عربية تكون كبيرة شوية لاني بسافر اسكندرية للمصيف وباخد معايا اخوات مراتي او ساعات حد من ولاد اخواتي يعني بتكون الحكاية ليلة كبيرة اوي. بس السنة اللي فاتت ماشاء الله البرادوا ساعدتني كتير وخاصة اني رميت الشنط والحاجات اللي كنت واخدها معايا في شنطتها الكبيرة ورا
ثانياً..العربية اللي هاجيبها هاستخدمها مدة شهر او 2 فقط وبعد كدة هاركنها ودة هايأثر عليها ودي من واقع تجربة ناس كتير عملوا كدة...

بصراحة مش عارف اعمل اية...محتاااااااار
علي فكرة كمان، انا ليا واحد صاحبي ظابط في ميناء نويبع بيقولي لو جبت معاك قطر كلها هاعديك بدون تفتيش وبصراحة الموضوع مجنني.

شوفتي بقي انا اد اية محتار يا نور القمر....!

اقتباس:

---

المشاركة الأصلية كتبت بواسطة Mido80

لالالالالا اوعي تخلية ينزل بالتيدا. حرام دي عربية صغيرة ما تستحملش الطريق وكمان المشوار هايفرمها وبعدين التيدا مش امان بالنسبة للطرق الطويلة لانها بعد 120 كم بتكون زي الريشة وخلي بالك السرعة العالية مع ضغط الهوا بيكسر الاكسدام الامامي والكشافات لاني شفت السيارات اللي في السعودية معظمها مكسرة اكسدام وكشافات امامية.
لو اخوك عيلتة صغيرة خلية ينزل طيران ويريح نفسة وفيما بعد لو حب ينزل بري يكون غير التيدا وجاب عربية 4x4 تكون افضل في السفر والمسافات الطويلة

---

شكرا ليك يا استاذ ميدو على النصيحه فعلا السفر عايز حاجه كبيره جيب بس انا مستغرب بلاقى عربيات كتير جدا فى الصيف جمرك مابين لانسر وكورولا وتيدا والنترا العربيات دى بتستحمل السكه ازاى خصوصا انه هيسوق جوه السعوديه مسافه جباره تقريبا بيقطع المملكه بالعرض وساعات بلاقى عربيات قديمه لانسر كريستاله او كورولا 97 مش عارف ازاى بيقدروا ييجوا
اخويا لسه مش متزوج وجاى لوحده واصلا الشركه بتوفرله تذاكر طيران ذهاب وعوده من الدوحه للقاهره بس هو فعلا محتاج عربيه فى مصر ضرورى

انا رأيي انك تشحنها وتنزل طيران لأن موضوع الايجار ده سيء جدا وفي نفس الوقت موضوع السفر بيها مرهق لك جدا فنمسك العصاية من النص و تريح نفسك وفي نفس الوقت تركب عربيتك في مصر ..وربنا يكتبلك الخير وتيجي بالسلامة .

اقتباس:

---

المشاركة الأصلية كتبت بواسطة Mohammed_Adel_Amin

انا رأيي انك تشحنها وتنزل طيران لأن موضوع الايجار ده سيء جدا وفي نفس الوقت موضوع السفر بيها مرهق لك جدا فنمسك العصاية من النص و تريح نفسك وفي نفس الوقت تركب عربيتك في مصر ..وربنا يكتبلك الخير وتيجي بالسلامة .

---

طب الشحن ده نظامه ايه طيران برضه مش عارف ليه حاسس انه غالى موووووووت

ياجماعه كلمه لو فى مكاتب محترمه دى بجد بتضايق
وع العموم باردو انا عندى عربيات ايجار وجربوا المعامله
واللى يجرب يبقى يحكى ويحكم

اقتباس:

---

المشاركة الأصلية كتبت بواسطة mokhtar

طب الشحن ده نظامه ايه طيران برضه مش عارف ليه حاسس انه غالى موووووووت

---

هو حضرتك انا لما كنت في السعودية كنت شفت ناس بيعملو الموضوع ده بس كان لازم تسلم العربية قبلها بفترة وكان بري مش طيران واعتقد فعلا انه غالي , حضرتك ممكن تسأل عليه وتقيم الموضوع من عندك ..

اقتباس:

---

المشاركة الأصلية كتبت بواسطة mokhtar

شكرا ليك يا استاذ ميدو على النصيحه فعلا السفر عايز حاجه كبيره جيب بس انا مستغرب بلاقى عربيات كتير جدا فى الصيف جمرك مابين لانسر وكورولا وتيدا والنترا العربيات دى بتستحمل السكه ازاى خصوصا انه هيسوق جوه السعوديه مسافه جباره تقريبا بيقطع المملكه بالعرض وساعات بلاقى عربيات قديمه لانسر كريستاله او كورولا 97 مش عارف ازاى بيقدروا ييجوا
اخويا لسه مش متزوج وجاى لوحده واصلا الشركه بتوفرله تذاكر طيران ذهاب وعوده من الدوحه للقاهره بس هو فعلا محتاج عربيه فى مصر ضرورى

---

كلامك مظبوط بس الناس دي بيكون معظمها عايش في السعودية يعني المسافة اللي بيقطعوها بتكون بسيطة مش زي اللي عايش في قطر او في عمان. اضف الي ذلك الناس دي بيكون عندهم اولاد (2،4) وبيجي يحسبها يلاقي نفسة هايدفع مبلغ كبير للتذاكر فيريح نفسة ويشد بري بس بيكون مرتب مع مجموعة يمشي معاهم. السنة اللي فاتت كان نازل معايا 3 عائلات واحد راكب اوبترا والتاني راكب بروتون ويرا والتالت راكب كامري وكمان كان نازل معانا شاب مصري لوحدة راكب BMW -3 بس عايش حياتة. وكمان شفت واحد مصري محمل بيجو 405 ستيشن علي عينها ونازل بيها.بس دي مغامرة وتعب في الطريق وعموما انت السنة دي هاتلاقي مصر كلها عربيات جمرك لان اجازات المدارس السنة دي في الخليج هاتكون 3 شهور فكل الناس نازلة بري. اخيراً طالما ان اخوك لوحدة خلية ينزل بطيارة احسن وأأمن..

اقتباس:

---

المشاركة الأصلية كتبت بواسطة Mohammed_Adel_Amin

انا رأيي انك تشحنها وتنزل طيران لأن موضوع الايجار ده سيء جدا وفي نفس الوقت موضوع السفر بيها مرهق لك جدا فنمسك العصاية من النص و تريح نفسك وفي نفس الوقت تركب عربيتك في مصر ..وربنا يكتبلك الخير وتيجي بالسلامة .

---

الشحن هايكون مكلف جدا يعني اكتر من اني ااجر عربية في مصر وكمان لازم أسيب لهم العربية قبلها باسبوع علي الاقل عشان الشحن بيكون بري وانا فعلا شفت ناس عاملة كدة معانا في العبارة وكمان في السعودية

اقتباس:

---

المشاركة الأصلية كتبت بواسطة mohamedezat

ياجماعه كلمه لو فى مكاتب محترمه دى بجد بتضايق
وع العموم باردو انا عندى عربيات ايجار وجربوا المعامله
واللى يجرب يبقى يحكى ويحكم

---

طب يابو حميد انا بس فية عندي استفسار...
هل لو اجرت عربية من عندك هاوقع علي شيك علي بياض ولا شيك بقيمة السيارة ودي في حالة لو كانت السيارة مش متأمن عليها
طب لو السيارة متأمن عليها (شامل) هل هاوقع علي الشيك بردو ولا اية الحل؟؟

اقتباس:

---

المشاركة الأصلية كتبت بواسطة Mido80

طب يابو حميد انا بس فية عندي استفسار...
هل لو اجرت عربية من عندك هاوقع علي شيك علي بياض ولا شيك بقيمة السيارة ودي في حالة لو كانت السيارة مش متأمن عليها
طب لو السيارة متأمن عليها (شامل) هل هاوقع علي الشيك بردو ولا اية الحل؟؟

---

شيك او بدون شيك مش هتفرق .
الشيك ده بيضمن لكل فرد حقه .
و اكيد الرجل هيكرمك ..( لما نشوف ) :)

اقتباس:

---

المشاركة الأصلية كتبت بواسطة mokhtar

حضرتك لو انا عايز لانسر بومه اتوماتيك لمده شهر ان شاء الله هتبقى من شهر 7 تقريبا ميعاد وصول اخويا من الدوحه فى مطار القاهره الشهر كله بتوصيلها للمطار يعمل كام لو عداد مفتوح ويعمل كام لو محدد
شكرا مقدما

---

ايه يا بوحميد ماردتش على سؤالى يعنى انت رحت فين وسبتنى كده

رغم ان السفر هيكون مرهق لكن هيكون افضل ليك انك تنزل بعربيتك لان الايجارات مكلفة وفكرة انك تشترى عربية صغيرة مش مريحة برده لانك اكيد اتعودت على عربيتك وصعب تركب عربية صغيرة ولا موديل قديم استحمل السفر بس هترتاح لما تيجى وتخرج براحتك

اقتباس:

---

المشاركة الأصلية كتبت بواسطة Mido80

طب يابو حميد انا بس فية عندي استفسار...
هل لو اجرت عربية من عندك هاوقع علي شيك علي بياض ولا شيك بقيمة السيارة ودي في حالة لو كانت السيارة مش متأمن عليها
طب لو السيارة متأمن عليها (شامل) هل هاوقع علي الشيك بردو ولا اية الحل؟؟

---

انا تقريبا بأجر العربيات للى اعرفهم او تابع لحد اعرفه وده ضمان للحفاظ على العربيه ثانيا علشان يخاف عليها انا مش بافرح لما حد يخبط العربيه لانها حتى لو اتصلحت انا الخسران تمام كده
ع العموم الشيك بيكون بقيمه السياره لو العميل طلب
انما لو ساب الشيك ع الابيض ده لان لقدر الله حصل حاجه فى العربيه بيتكتب قيمة المبلغ المطلوب فقط لحين السداد
ثانيا العربيات مأمن عليها لقدر الله لو حصل حادث مركز الخدمه بيعمل مقايسه ويبلغنا بالتكلفه والمده
والتأمين بيحملنى جزء كصاحب عربيه
فى الحاله دى انا باخد الجزء المطلوب من شركة التأمين من العميل وباخد تمن عطلت السياره وهى 100 عن اليوم
غيرى بقا انتوا عارفين بيعملوا ايه بس انا بادعى من الله لما العربيه تطلع شغل ترجع سليمه

اقتباس:

---

المشاركة الأصلية كتبت بواسطة mokhtar

حضرتك لو انا عايز لانسر بومه اتوماتيك لمده شهر ان شاء الله هتبقى من شهر 7 تقريبا ميعاد وصول اخويا من الدوحه فى مطار القاهره الشهر كله بتوصيلها للمطار يعمل كام لو عداد مفتوح ويعمل كام لو محدد
شكرا مقدما

---

المشكله شهر 7 ده بيكون موسم ومشكله الموسم مش فى السعر انما بيكون فى تواجد السياره
ع العموم هى مش هاتقل عن 6000 عداد 150 كم لليوم