الموضوع: تجارب "ملاك" الدايهاتسو مع مراكز الخدمة

السلام عليكم و رحمة الله و بركاته
من كام يوم عملت صيانة ال 20000 كم و عند تسليم العربية لمهندس الإستقبال قلتله انا عايز 3 لتر زيت فقط. قاللى زى ماتحب بس الأستاذ ياسر كان موجود من كام يوم و طلب برضه 3 لتر لكن رجع فى كلامه و قال خليهم 4 لتر زى كل مرة ( بس ماقلش رجع فى كلامه ليه بس أنا عرفت بعد كدة ) المهندس قالى إن ده هيكون على مسؤليتك قلتله مافيش مشكلة مادام حاجة صح إيه المانع وكتب فى إستمارة إستلام العربية 3 لتر زيت فقط على مسؤلية العميل و مضيت على الإستمارة زى كل مرة ( غالباً الأستاذ ياسر قلق من موضوع الإمضة دى )
أنا مش عارف أحدد بالظبط العربية فاقت بسبب إية لإن دى كانت صيانة 20000 وفيها تغير الزيت و فلتر الهواء و تربيط العفشة و باقى الحاجات طبعاً كل ده بيخلى العربية تفرق و خصوصاُ إنى إتأخرت حوالى 2500 كم على ال 20000 كم
بس تاى يوم إتأكدت من مقاس الزيت و كان بين العلامتيين و أقرب للعلامة اللى فوق
===========

الدكتور معاذ كلمنى من كام يوم علشان أتكلم مع مهندس أسامة سعد مدير عام ديهاتسو بخصوص المشكلة دى - دخلت للمهندس أسامة بس بصعوبة شوية نظراُ لإنشغاله وكمان رحت من غير ميعاد سابق. المهم مهندس محمد عبد الصمد قابلنى الأول وأكدلى معلومة كمية الزين للموديل 2008 و 2009 إنها 2.9 بدون فلتر و 3.1 بفلتر و قلتله إن مركز الصيانة مش مقتنع بالموضوع ده و بيمضونا على إقرار بالمسؤلية إستغرب من الكلام ده
و دخلت بعد كدة لمهندس أسامة و الرجل كان فى منتهى الود و سعة الصدر و قالى بخصوص موضوع الزيت شوفو إيه اللى يناسبكم وإنهم الأول كانو بيجيبو براميل زيت كبيرة بس الناس ماعجبهاش الكلام ده و خافو إن ده يكون زيت أى كلام فجابو العبوات اللى بيحطولنا منها دلوقتى
وقالى لو تحبو نجيب جراكن 4 لتر بدل العبوات ال 1 لتر و نحط 3.1 لتر و العميل ياخد الباقى مافيش مانع بس الخوف إن الزيت يتأكسد لما يتركن فترة طويلة وقال كل الخيارات متاحة قدامكم و شوفوا اللى يريحكم و إحنا نعمله
و قلتله على موضوع الإقرارات و قالى لا طبعا مافيش حاجة من دى خالص و الموضوع ده هايتحل
و أخيراً طلبت منه يكون فيه قناة إتصال مباشرة معاه من خلال اللقاء معه 3 أو 4 أعضاء فى زيارة سريعة لمناقشة أراء ملاك الديهاتسو و مشاكلهم و مقترحاتهم ووافق برحابة صدر و قالى كمان نبقى نحدد موعد علشان كمان يجيب مدير التسويق يحضر معانا
و كرر طلبه منى تانى اللى كنت قلته قبل كدة من زيارة مركز أبو رواش للمشاركة فى إختيار بعض اللمسات الأخيرة ليكون المكان مريح للعملاء ووعدته إن هشوف إيه اللى تم فى الموضوع ده لأنى عرضته على المنتدى قبل كده - بس طبعا ماجبتش سيرة فى المنتدى لإنى عرفت بعد كدة إن الموضوع خلص خلاص و إن فيه ناس هاتروح و طبعاً أنا مش منهم لأنى ماعرفتش إلا بالصدفة زى حضراتكم دلوقتى ماعرفتم

معلش طولت عليكم بس كان لازم أوصل الكلام بالتفصيل و ده كمان مش تفصيل قوى


http://www.nilemotors.net/Nile/showt...397#post854397

حجزت يوم الأربع اللي فات صيانة الخمسة و عشرين علي إني أعملها إنهاردة صباحاَ
و لأن كنت مشغول جداَ الفترة اللي فاتت للأسف معملتهاش في معادها أوي
كنت ماشي زيادة 1400 كيلو يعني 26400 كيلو
و مشيت عالزيت 11400 .. بس انا كنت بكشف عليه هو منقصش من ساعة ما إتحط
و لونه كان كويس جداَ كنت حاسس إن ممكن أمشي عليه كمان كتير ! و لزوجته كانت كويسة
الزيت اللي كان محطوط كان زيت شيل الترا هيلكس .

المهم رحت رحلة العذاب إلي العبور و أخدت الدائري كله من أوله لأخره (مشوار علقة)
وصلت و سلمت العربية عالباب .. المركز كان زحمة شوية .. كان فيه ماروتي زرقة راكنة قدامه و حاطة ستيكر نايل موتورز مش عارف بتاعة مين .
بعد نص ساعة كدة كان مهندس عمرو الهضيبي فضي .. و أول مرة أتعامل معاه بصراحة لكن هو شخصية ذوق جداَ و بشوشة و كان متعاون جداَ .

ملاحظاتي عالعربية اللي قلتهالخ و طلبت تتعمل :

1- صوت غريب ظهر عند كبس البنزين أثناء تشغيل التكييف و انا دايس عالدواسة بحس إني دايس علي رقبة واحد و تسمع صوت حد بيطلع في الروح .. و لقيتها مرتبطة بالتكييف فا طلبت الكشف عليه .

2- شخللة عامة في العفشة و تهبيد في المطبات خاصة في العفشة الأمامية .

3- كنت عايز أوطي سينسور الإنذار لأنه إبتدي يصدعني انا شخصياَ ما بالكم اللي في الشارع .

4- الدلاية اليمين واقعة كالعادة و الكارتيرة مدلدلة شوية .. و كل كلبسات الكارتيرات التانية واقعة .

5- صوت صفارة عالسرعات العالية .

6- طلبت وضع 3.1 زيت فقط لا غير .. و مهندس عمرو عمل إتصال و قاللي أصل إحنا بنحط 3.8 .. و اللي كلمه قاله لأ حط 3.1 مفيش مشاكل .

عند تسليم السيارة قلتله أوريك صوت التكييف .. إن الصوت يطلع !! أبداَ .. مش عارف إيه لعنة مركز العبور إن أي عربية فيها عيب أول ما بتخشه بتتعلم الأدب .. بس انا أكدت عليه و قلتله إنه صوت بيظهر كتير و كان لسة شغال و انا جي في الطريق .

العربية دخلت و إترفعت .. و نزلوا الزيت القديم و ربطوا العفشة و رشوها بشوية حاجات كدة قالولي إنها مضادة للصدأ .. و تقريباَ زودوا مياه الريدياتير مكنتش شايف أوي .. و عملوا شيك عالكهربا .. و بعدين جابوا 4 زجاجات موبيل وان مقفولين .. و حطوا تلاتة و قاسوا الزيت .. و ندهوا لمهندس أحمد عبد الوهاب يشوفها (مكنتش كلمته أو يعرف إنها عربيتي ولا قلت لحد نايل موتورز ولا حاجة أو جروب السيريون علي فيس بوك) .. و فتحوا العلبة الرابعة زودوا منها "سيكا" كدة .. و قاسوا الزيت تاني و العربية طلعت .. تم توطية سينسور الإنذار .. و تركيب الكلبسات و الدلاية المرة دي بإتقان شديد غير أي مرة! حسيتهم ثبتوا كدة، و عدلوا الإكصدام شوية أصل حامل الإكصدام عندي مكسور، ثم تم الكشف عالتكييف .

النتائج : 1- طلع عندي عيب في الكمبروسر فعلاَ هو سبب الصوت اللي بيظهر و هيتم تغييره تبع الضمان فيما بعد لأنه مش موجود .. و قالولي إني محتاج أغير علبة الدركسيون برضه لأنها سبب صوت الشخللة (التعديل إياه) .. و إتعمل ريكويست بإسمي بالكمبروسر و علبة الدركسيونو اما يوصلوا هيكلموني .

تم تغيير فلتر الهواء لأني مغيرتوش في العشرين عشان حالته كانت كويسة .. و العربية صوتها هدي و بقت أنعم كتير مع الزيت المزبوط و الفلتر الجديد و النتشة اللي في الغيار الأول راحت و بقت جراية أكتر .

صوت الصفارة كانت سببه عدم تغيير فلتر الهواء .

الإجمالي بتاع الفاتورة 514 بالخصم .. بعد الضريبة و الذي منه .. حساب الزيت لوحده 205 جنيه فقط .

أبو رواش المفروض هيفتح أول الشهر الجي .. و نترحم من علقة العبور .. إن شاء الله الصيانة القادمة هناك (هتيجي هوا دنا خلاص قربت علي 27!) .. و أعمل التعديل و تغيير الكمبروسر هناك .

فلتر الهواء القديم إتحط في علبة الجديد و حطوه في شنطة دايهاتسو و إدوهوني .

السلام عليكم ورحمه الله وبركاته
مش عارف هو الموضوع بسيط وبقالى فترة وبصراحه مكنتش عاوز اكتبه بس قولت اشارك السادة الاعضاء بالتجربه دى واقول للتوكيل بما انهم معانا يمكن !!!!!!!!!!!!!
كنت فى التوكيل من فترة "مركز العبور"وكان عندى لمبه الفانوس الامامى اليمين "الواطى"بس مش بتنور المهم سألت قالولى ممكن تكون الفيشة ولازم يكشفوا عليها علشان يقولوا المشكلة ولو كانت اللمبة تتغير
بكام ب240 جنيه مصرى فطبعا قولت مفيش داعى لاللتغيير ولاحتى الكشف وبعدين بكام يوم الشمال طفى هو كمان ...فاروحت التوفيقية وجبت لمبتين"3 ريشة"125/130 وات تقريبا ب55 جنية ورحت لكهربائى وفك الاصل ولاقيت ان الوات بتعهم 55/60 فقولته الفرق دة ممكن يعمل مشكله فقال لأ عادى وجرب وإشتغالوا بدون اى مشاكل وتانى يوم بليل لاقيتهم مش شاغلين وطبعا الساعه كانت 2:30 باليل ولا فى واطى ولا عالى ولا اى حاجة خالص بس الحمد لله ربنا سترها وروحت بخير وتانى يوم فكيت اللمبات و شيكت على الفيوز لاقيته محروق
وروحت التوفيقيه جبت اللمبات بنفس الوات وجبت كمان فيوز بدل اللى باظ وكمان الراجل ادانى 15 جنيه باقى ال55 ورجعت ركبتهم والحمد لله كله تمام بقالى كدة حوالى اسبوعين تقريبا ...
1-السادة الأعضاء الوات بتاع اللمبات بتاعت السيريون 2008 55/60 وات و3 ريشه وطبعا فى انواع
2-التوكيل (المهندسه مى)الموضوع ابسط من كدة بدل متخالوا العربيه فى مستوى العربيات الاقتصادية والموفرة غلوها اكتر من كدة شوية وبدل ماتعملوا اعلانات وتخالوا المقدم ب5 الاف زودوة كمان شوية علشان كدة كدة الطريقان واحد بعد شوية الناس بتعرف العربيه من اصحابها اللى هم فى الاصل احسن داعايه ليها من الراديوا
واللى بيخالى العربيه تنتشر قطع الغيار مش رخص تمنها ...
وعلشان محدش يفهمنى بشكل مش صحيح انا كلمت ناس كتير فى التوكيل وفى call center وسجلت اكتر من شكوى علشان يعيدوا حسابتهم اللى مش عارف هم عملنها على اى اساس وقولتهم على قطع غيار بعنها وقولتهم يسألوا عليها فين وفرق السعر عامل ازاى وبردة جاية من اليابان ولعربيات المفروض فئة سعريه اعلى
انا بقول الكلام دة يا جماعة علشان انا بحب العربية دى بجد ومش عايز لا اتبهدل ولا ابهدلها معايا عند كل واحد شوية اللى بيفهم واللى مابيفهمش وعاز اعمل كل حاجة فى التوكيل بس ما احبش حد يضحك عليا ولا ييغلى عليا حاجة .شكرا واسف للأطاله ومش عاوز حد يزعل منى

رابط الموضوع:
http://www.nilemotors.net/Nile/showthread.php?t=81111