الموضوع: تجارب "ملاك" الدايهاتسو مع مراكز الخدمة

السلام عليكم و رحمة الله و بركاته

معظم الاعضاء اللى متابعين قسم دايهاتسو عارفين انى كنت غيرت علبة الدركسيون للعربية بدل الفابريقة بتاعتها تقريبا فى اخر شهر مارس.

بعد تغيير العلبة الاصلية بفترة صغيرة (حوالى 7-10 ايام) الصوت بدأ يرجع تانى, لكن فى الحتة المكسرة جامد .... و ده كان تعليق اكثر من شخص غيروا العلبة بعدى, فقلت مش مشكلة اوى, الصوت بنسبة كبيرة كان اختفى و كنت على استعداد للتعايش مع ظهورة بنسبة اقل بكتير من قبل كده.

لكن على شهر 5 كده, الصوت بدأ يطلع بشكل اقوى بكتير لدرجة انه على بداية شهر 6, كنا بيطلع على الطرق المستوية كمان ... حاولت اروح مركز الصيانة لكن كنت مشغول جدا فى الامتحانات, و كنت فعلا حاجز انى اروح مع مهندس توفيق طه يوم 22/6 لكن منفعش خالص.

المهم الاتفاق مع مهندس احمد عبدالوهاب انى اكلم الانسة مى عبدالحميد علشان ترتب تواجد المهندس مصطفى الشريف مسئول الضمان فى دايهاتسو علشان يشوف العربية و يحدد العيب فين علشان يتصلح.

اخدت ميعاد فى او ل شهر 7 بعد اما خلصت, و رحت للمهندس مصطفى و جربها و فعلا اتخض من قوة الصوت اللى عندى, و قالى انه معداش عليه عربيات الصوت فيها قوى للدرجة دى و اتفقنا بما انى مش عاوز العربية تبات, هجيبها يوم من اوله خالص, و نفضل قاعدين لحد اما نخلص.

فعلا اخدت ميعاد يوم الثلاثاء 21/7 الساعة 9 صباحا, و قلت للمهندس على كام حاجة كمان موجودين علشان نشوفهم:

1- جوان غطاء التاكيهات, لأن كان فى تعريق زيت جامد على الموتور
2- دواسة البنزين تقيلة, و ده لاحظه مهندس مصطفى
3- التكييف, ادائه مش مرضى ليا, ده بالاضافة الى ان صوته عالى

رحت فى ميعادى, و العربية دخلت و اتضح ان العلبة اللى كانت راكبة باظت ... فتم تغيرها بعلبة جديدة فى الضمان طبعا

بالاضافة الى كده تم تغيير عدد(1) شداد الميزان و المفروض كان يتغير (2) لكن التانى هركبه الاسبوع ده ان شاء الله مع صيانة ال 35 الف كم.

بعد تركيب العلبة الجديدة, الربية طلعت على جهاز الزوايا, و للأسف متظبتطش, لسه فى حدفة شمال ... بالاضافة لكده برضه بتلف فى ناحية اكتر من التانية لكن بشكل اكبر من المرة اللى فاتت.

المشكلة ان الجهاز بتاع الزوايا "هنج" و كان فى كذا عربية مستنية لكن مكنش عاوز يشتغل خالص... فأتفقنا هنعملها مع الصيانة ان شاء الله

تانى حاجة اتعملت كان تغيير جوان غطاء التاكيهات فى الضمان... و المهندس مصطفى شريف قالى ان فى batch عربيات معينة معروف ان الجوان ده خامته مش كويسة اوى ... و ان ملوش تأثير على اى حاجة تقريبا غير تعريق الزيت.

العربية خلصت تقريبا على الساعة 7, كنت انا و مهندس ماجد و الفنى بس اللى مستنين فى المركز... فملحقناش الحاجات التانية

المركز كان زحمة جدا جدا جدا ... فعلشان كده العربية اخدت الوقت ده كله

اخر كلام بيتقال ان الافتتاح الرسمى لأبورواش هيبقى 17 اغسطس فى حضور الشيخ محمد جميل

العربية مش هقول انطباعى غير بعد اسبوع على الاقل من التغيير علشان ابقى خدت وقتها زى اللى قبلها.

كلمة اخيرة .... مهندس مصطفى الشريف بجد شخصية اكثر من محترمة, و فعلا انا اتشرفت فعلا انى اتعرفت عليه.

http://www.nilemotors.net/Nile/a/86419-1-5-2008-a.html

السلام عليكم زرحمة الله وبركاته
ازيكم يا اخوانى عاملين ايه وكل سنة وانتم طيبيين بمناسبة شهر رمضان
ربنا يرزقنا بلوغه وصيامه ويعينا على قيامه
وحشتونى كتير
انا بفضل الله عملت صيانه ال 10000 كيلو يوم الاتنين اللى فات
انا عربيتى سيريون 2009 xl سماوى
حجزت يوم التلات اللى قابله استغربت ان المعاد جه متأخر كده انا عملت صيانه الاف وال خمس الالاف بعد ماحجزت بيوم المهم انا قولت يمكن فيه ضغط علشان شهر رمضان
الميعاد كان الساعه 3 عصرا روحت 3 الا ربع كده دخلت وسلمت العربية على الساعه 3 وعشرة وكنت عايزه يثبت الاكصدام كان اتخبطت في حادثه زمان اول ماجبت العربية هوا مش باين بس مفارق سنة من عند الكشاف يعنى كان عايز تثبت كويس بكلبسات قالى هاشوف ينفع نعملك الاكصدام والا لا ما فهمتش قصده ايه المهم قالى هتستلمها على الساعه 4 ونص قعدت في الاستراحه طبعا كان فيه نت وتليفزيون ومشروبات وجرايد حاجه جميلة
استلمت العربية على الساعه 5 الا تلت اتكلفت الصيانة حوالى 380 جنيه يعنى السعر الطبيعى
الملاحظات بقى يعنى مش مبسوط قوى من الصيانه المرة ديه العربية طلعت متوسخه شوية قولت للمهندس قالى ماهى مش بتنضف قوى يعنى كان فيها وساخه تحت باب الشنطة وجوه العربية برضه سحيت انهم منضفوش حاجه المهم وبرضه معملش الاكصدام بجرب العربية كنت اول مرة اراجع بعد الصيانه لاقيت الزجاج الخلفى بيعمل صوت وهوا نازل ندهت للمهندس تانى قالى علشان مرشوش عليه ميه والميه دخلت جوه الكاوتش فبينزل بالعافية بس لاقانى مش مبسوط فقالى خلاص هات العربية خدها منى ودخل جوه تانى قعدوا يرشوا على الزجاج اسبري كده المهم قعدت حوالى ربع ساعه وخرجت جربت لاقيته كويس
العربية طبعا بقيت احسن من حيث الاداء الفرامل يقيت اقوى بس فرامل اليد بقيت تقيلة قوى مش عارف ده صح والا غلط

على العموم انطباعى عن العربية متغيرش العربية جميله جدا وبحس انى اجمد واحد على الطريق مش عارف ليه
ربنا يحفظنا جميعا
وكل سنة وانتم طبيببن

بسم الله الرحمن الرحيم

النهارده 29/9 كنت النهارده فى مركز خدمه وصيانه دايهاتسو ثرى اس

العنوان : طريق طنطا المحله السريع (جنب بنزيه التعاون ,وقاعه افراح اسمها دهب ) قبل المحله بحوالى 5 كم

سبب الزياره : عمل صيانه ال 15 الف لعربيتى دايهاتسو ماتيريا 2009

انتوا عارفين ان انا لسه فى طنطا فكنت عاوز اعمل صيانه العربيه فقولت بالمره اجرب المركز ده
كلمتهم امبارح علشان احجز وخت ميعاد النهارده
روحت وصلت هناك الساعه 12 ونص صباحا ....لقيت تانده (مظله واقف تحتيها العربيات ) ركنت تحتها ولقيت شخص بيسلم عليا ويقولى اتفضل على مكتب الاستقبال
[mtohg=#ff0000]http://up1.arb-up.com/files/arb-up-2009-9/Rm340747.jpg[/mtohg]
[mtohg=#ff0000]http://www12.0zz0.com/2009/09/29/17/914618041.jpg[/mtohg]
دخلت مكان الاستقبال عباره عن مكتب فى اخر غرفه واسعه فى اولها تلفزيون يعرض قناه عن العربيات( فيها شويه عربيات خليجى لببيع كامرى موديل 2009 تقريبا ممشيتش ب 85 الف ريال) فيها معروض بعض منتجات شركه جليد بتاعت المعطرات وشركه كرافت وعلى الحائط صور للماتيريا والتريوس والسيريون وكمان البيكانتو (معلومه هو كمان معاه توكيل تويوتا وكيا ورينو )
المهم كان هناك المهندس خالد قاعد مع عميل لما خلص قولتله انا حاجز صيانه لماتيريا قالى صيانه ايه ...قولتله بأمانه انا معملتش العشره لانى كنت فى المصيف فغيرت زيت وربط عفشه فى بريدجستون وخلاص وانا عربيتى دلوقتى داخله على ال14 الف فبما ان صيانه العشره اهم وهى هى صيانه ال 15 الف فنعمل الحاجات اللى بتتعمل فى العشره قالى اوكيه
1-تغيير زيت موبيل اكس اتش بى (لانى فى انتظار الزيت الليبيى )
2-تربيط العفشه وتشحيهما وتزيتها
3-فحص كهربه السياره وكشف على السوائل
4-رجلاش الهاند
قولتله انى عاوز اعمل روتشين للكاوتش بالطريقه الكروس قالى دى فى العشرين الف
المهم شويه والعربيه دخلت كان شغال فيها اتنين فنيين ...والنقطه الاهم انك بتبقى واقف معاهم وعلى ايدهم وشايف كل شئ وبتكلمهم (مش زى العبور من ورا قزاز )
غيروا الزيت (3ونص لتر من جركن 4 لتر) ادونى باقى الزيت نص لتر...والفلتر والعربيه اترفعت وربطوا على العفشه يدوي ورشها اسبراى للتزيت ...وزود الميه الحمرا بميه حمراء فعلا انتاج موبيل ...(مش زى العبور...بيزود ميه من الحنفيه ويوقلك الميه اللى فيها مركزه فممكن نخففها)
وزود ميه المساحات ...وكمان نضضف الفلتر بتاع الهوا لقاه نضيف انا بنفخه باستمرار...ونضف حوض الماتور والماتور بسبراى كده
كان عندى التربيدوا بتاع المساحات (الفبره السوده اللى فيها المساحات دى كانت بتتهز وبتتلخلخ علشان كان واقع منها كليبسيين لما كنت فاككها خليته يركبهم )
كنت قايله على موضوع صوت المروحه بتاعت التكييف عالى وانت بره العربيه (الموضوع اللى سألتكم عليه )وقولتوا عادى قالى هو عادى دا مش عارف ايه وايه ونفس الكلام اللى قاله استاذ سمير عادل فبرده كنت مقلق ومش مقتنع اوى قالى تعاله فكان فى هناك جراند تريوس وشغل التكييف ولقيت الصوت قريب برده ...وبرده نفخ المروحه والسيرابنتينه بالهوا
المهم راح ودا العربيه للغسيل...فقولتله اه نسينا نعمل رجلاش الهاند فجربه وهوا واقف قالى ماهو كويس عاوز اعملهولك دلوقتى خليه مع العشريين ...قولتله لأ فى العشره قالى مش عارف فرامل ايه وممكن تقفش منك ايه ..بصراحه انا خوفت بس برده قولتله ممكن تعمله بس مش تزود اوى انا اصلا مش فاهم فقولتله هو ليها ليمت مش لازم تقفشه اوى ربط عليه وخلاص ...قالى براحتك رجعنا تانى ورفع العربيه من ورا وفك الكاوتش اللى ورا وعمل شويه حاجات كده ونفخ فى البتاع ده اللى جوه بيبقى ماسك الجنوطو وطلعت تراب اسود كده ورش اسبراى على شويه حاجات كده صغيره جوه وركب تانى وربط

روحنا للغسيل بأمانه غسيل بنزيته نضييف ...(انضف من غسيل العبور بكتيييييير بره وجوه )

خلصت خلاص واشتيريت منظف فرش وموكيت من هناك ب 30 جندى وكمان فوطه قطيفه كده
الفاتوره بقى
زيت اكس اتش بى 105 جنيه ...فى العبور 120 جنيه
فلتر زيت ماتيريا بى 50 و10%ض.م يبقى بى 55جنيه
صيانه 10 الاف كم 110 و 10% ض.م يبقى 121 جنيه
شحم ومواد تنظيف 10 جنيه و 10% ض.م يبقى 11 جنيه
كليبس 6.46و 10% ض.م يبقى 7.11 جنيه
كليبس 5 جنيه و10% ض.م يبقى 5.5 جنيه (كنت جايب الواحد من عند البيطار اللى فى الحرفيين ب 5 جنيه )
الاجمالى 304.61 جنيه مصرى + فوم التنظيف بتاع الفرش ب 30 جنيه + الفوطه رزلت عليهم علشان اخدتها مجانا ووافقوا لما عرفوا انى هعملهم تقرير على نايل موتورز:10D5C8~1107:
هى تمنها كان مش فاكر كان حوالى 4 او خمسه جنيه
نيجى للأهم ...:10D5C8~1107:سألت على بعض الحاجات هناك
1- الانذار (بتاخد اتين ريموت ) عليهم علامه دايهاتسو بالتركيب بكله قالى 550 جنيه ..يعنى ارخص من العبور كنت سألت زمان عليهم فى العبور قالى بتاع 800 جنيه
2- الفرش الجلد ...مفأجاه برده 500 جنيه بالتركيب برده ارخص بكتيير من العبور

ميدو باشا سيريون ومحمود بك موتورايزر انا مش نسيتكم ....سألتلكم على الزجاج الامامى للسيريون ال2007 كان بى 1500 جنيه والتركيب حوالى 60 جنيه وموجود دلوقتى عندهم

انا هقفل دلوقتى مع العلم ان فى صور تانيه لسه هارفعها

http://www.nilemotors.net/Nile/97888-a.html

السلام عليكم و رحمة الله و بركاته

يوم السبت 10 اكتوبر قمت بعمل صيانة ال 35 الف للسريون فى مركز ابو رواش

بداية, المركز هو فى مكان محدوف شوية جوه ... لكنه فعلا مركز مميز

فى وسع جامد جدا, خصوصا فى صالة انتظار العملاء و فى مسجد و صالة المدخنين فيها تليفزيون

لكن انا حاجتين كانوا ضايقونى:

اولا, عدد مهندسى الاستقبال قليل مقارنة بالحجم اللى يستوعبه المركز الجديد (يعنى هما كانوا 2 بس اما كنت هناك) و اللى موجود اصلا 4 مكاتب بمكتب السمكرة و الدهان

ثانيا, الزجاج اللى بيشوف الورشة من فوق, زاوية الرؤيا مش كاشفة الورشة كلها, يعنى ممكن تبقى عربيتك جوه و مش شايفها, او طلعت بره و انت متعرفش .... مساحة الرؤية صغيرة ده غير ان المكان اللى فيها مش هو الامثل

اما حاجة من الحاجات الكويسة, ان مكتب مدير المركز موجود فى الاستقبال تحت, و معمول من زجاج, بحيث يبقى متابع كل حاجة بتحصل و استجابته تبقى اسرع فى حالة وجود اى مشاكل

بالنسبة للصيانة: انا مكنتش عملت صيانة ال 30 الف فطبعا فى ال 35 الف هتتعمل صيانة ال 30 الف + تغيير الزيت

انا كنت هناك مع مهندس حاتم, و هو مدير الاستقبال تحت, ده غير انه من اوائل المهندسين اللى اشتغلوا فى دايهاتسو لكنه فى الفترة ما قبل افتتاح ابو رواش كان فى الجزائر

اليوم الصراحة مكنش لطيف خالص .... يعنى كله كان اخبار سيئة, و ده يمكن اللى اخر شوية متابتى عنه, ده غير انى مشغول شوية فى بداية الكلية

اول مفاجاة فى اليوم ده كان موضوع الزيت, انهم هيحاسبونى على 4 لتر زيت و هيحطوا ليا 3.1 لتر فقط و اخد الباقى .... جادلنا بعض كتير على النقطة دى, بس هو قالى لو كنت سألت بتوع الكول سنتر كان قالوا لك على النظام الجديد, و انهم منبهين عليهم يبلغوا العملاء بكده

تانى مفاجأة غير سارة, قبل سفرى فى اخر شهر يوليو, كنت غيرت علبة الدركسيون لتانى مرة, و كان فى شغل ناقص فى العربية زى ظبط الزوايا, تغيير الشداد التانى مع شوية حاجات تانية ... و من حظى ان اللى كان شغال فيها هناك ساعتها هو مهندس ماجد, اللى هو حاليا مايك السمكرة و الدهان فى ابو رواش و كان فاكر اللى حصل معايا .... بلغونى ان اى شغل يتم فى العبور, لازم يتم استكماله هناك, لنه مش مذكور على السيستم اى حاجة بخصوص الموضوع ده

و ان حصلت مشاكل بسبب الموضوع ده, و حوار طويل خلاصته انى مش هعمل الحاجة اللى ناقصة, و لازم اكملها فى العبور

فطبعا اليوم كده مكنش لذيذ من اوله ... المهم قلت له اوك ابدا فى الحاجة .... و طلعت انا و ابو حمزة نتفرج على ماتش مصر و زامبيا مع بعض

الاول هكتب ملخص الفاتورة بتاعة الصيانة .... و بعدها هذكر باقى التفاصيل الغير لذيذة

عمالة: 187.5

فلتر زيت: 48

تشحيمات : 10

زيت موبيل 1 4 لتر: 260

الاجمالى 505 جنيه

فى خصم 11 جنيه تقريبا (اللى هما 5% بتوع نايل موتورز)

ضريبة : 23 جنيه

الاجمالى: 517 جنيه


نيجى للحاجات الخاصة بالصيانة:

1- غسيل العربية كان كويس بنسبة 80%

2- اسوأ حاجة فى الموضوع, الشخص اللى حط باقى الزيت, نسى يقفل علبة الزيت كويس و بالتالى جزء منها ادلق فى ارضية العربية بالخلف ... الحمد لله جزء كبير على الدواسات الكاوتش, لكن فى منها نزل على موكيت الارضية

3- العربية خلصت تقريبا فى الوقت اللى مهندس حاتم قالى عليه

----------------------------------------------------------------

باقى الاخبار المش لذيذة:

فى الاستراحة بين شوطى ماتش مصر و زامبيا, انا و ابو حمزة قابلنا مهندس محمد عبد الصمد

و هنا تطرقنا لموضوع الزيت, و انه كان لازم يتم ابلاغنا بشكل رسمى زى ما السيدة مى عبدالحميد قامت باعلانه و بشكل رسمى لنا هنا فى المنتدى ... و اظن ده حق لنا خصوصا ان احنا هنا اللى نبهناهم للخطأ ده

هو كان مصم انه لأ طبعا مش لازمو و ان القرار ده يخص كل عملاء دايهاتسو مش بس اعضاء نايل موتورز ... موصلناش لحل وسط فى الموضوع ده

اما بخصوص موضوع ان عربيتى ناقص لها حاجات, و مهندس ماجد اللى كان شغال عليها شاهد و موجود, قالنا ان فى بداية الشغل فى ابو رواش, كان العملاء كلهم يعملوا مثلا الصيانة فى العبور, و يرجعوا يعملوها عليها check فى ابو رواش... و انهم كده اصبحوا كل اللى بيعملوا هو مراجعة شغل العبور تقريبا

ده غير ان هما بيعاملوا كل مركز صيانة ماليا او حاجة كده معاملة مستقلة ... يعنى من الاخر لو حد عمل حاجة فى مركز, و الشغل فيها مكنش مظبوط, يرجع للمكان اللى عمل فيه الشغل, ده بالرغم من وجود قاعدة بيانات مشتركة بينهم!!

ابو حمزة كان تفضل و فتح موضوع بخصوص الزيت:
http://www.nilemotors.net/Nile/101429-a.html

انا بعتذر لكم على قلة التواجد فى الفترة اللى فاتت, و ان شاء الله الفترة الجاية يبقى فى تواجد اكبر

و تحت امركم فى اى استفسار بخصوص الصيانة

http://www.nilemotors.net/Nile/102260-35.html

بداية تم الاتصال بالخط الساخن16168 منذ يومان فقط وطبعا اللى ردت عليا اخدت كل بياناتى مرة اخرى(مش عارف ليه) بما فيها رقم الشاسيه واخذت ميعاد بعد اتصالى بيومان طبعا علي مركز ابو رواش لانه اقرب لي وفى نفس الوقت لاقيت الاتى فيه:
استراحة واسعة تغطى كافة الانشطة والقضاء علي الملل من بلاي استيشن ومشاهدة الtvوالجرائد ولو معاك اطفال فيه مكان برضه لهم وكذلك مكان لمتابعة السيارة
والصالة كبيرة تساع لعدد اكبر من السيارات كان معادى الساعة 2بعد الظهر مالقتش غير اتنين عملاء بس بخلاف العبور اللى كنت ممكن استنى من نصف ساعة الي ساعة الا ربع عشان تدخل العربية وتقريبا ما دخلش غير عميل واحد بس من بعدى
طبعا انا فى صيانة ال5000غيرت زيت 10000ك وكانت صيانة ال10000فى شهر رمضان فلظروف عملي مارحتهاش وبالتالى لما رحت امس طلبت منهم يعملولى صيانة ال10000عشان فيها حاجات ما بتتعملش فى ال15000 اللى بتبقى وقائية بعمل تشك علي العربية فتم عمل الاتى
تزويد ماء المساحات والردياتير
فك 4عجلات وتبديلها
تنظيف الطنابير الخلفية
تنظيف فلتر الهواء
غيار زيت+فلتر
وكمان انا طلبت منهم يركبو الفوج لايت
الاكصدام الخلفى كان مفكوك شويف فطلبت تثبيته
بالنسبة للتكاليف:
فلتر48.5+فوجات846+زيت موبيل120+12كلبس+sundries10
105تركيب الفوج+187.5تكاليف صيانة ال10000+37.5تثبيت الاكصدام الخلفى بالاضافة الى10% ضريبة مبيعات
وعملولى خصم5%عشان نايل موتورز
تبقى التكلفة الاجمالية1424ج بالتمام والكمال
علي فكرة حطولى باقى الزيت فى شنطة تقريبا ثلاث اربع العلبة مليان مش هستفاد منه انا من رايى فى المقابلة الجاية كل واحد يجيب زيته معاه ونديه لاقرب واحد رايح صيانة عشان نفرسهم يعنى افتكر كل اربعة ممكن يغيرو زيت لعربية
انا عن نفسى اول متبرع مش بالدم(بالزييييييييييييييي� �يييييييت)

http://www.nilemotors.net/Nile/106901-15000.html

يا جماعة انا لسة كنت فى توكيل ابو رواش يوم الاربعاء 16/12 وكانت ملاحظتى كالتالى :
اولا : السلبيات ....
للاسف الشديد مفيش يفط "اعلانات" دالة على مكانة انا فعلا كنت تاية لولا يافطة صغيرة متعلقة على عمووووود نور 2متر * متر يدوب على الشارع اللى بعد داندى موووووول ..

الشارع مكسر تماما وفين وفين لما عرفت اوصل اخذت علامة وهى بنزينة التعاون اللى على الشمال دخلت من جنبها لحد لما وصلت ؟؟؟ ولما سالت عرفت ان التوكيل ملوش ذنب ؟؟؟ همة فعلا كانوا معلقين اعلانات ولوحات ارشادية بس للاسف الحى ازالها تقريبا وعلى ما سمعت ان التوكيل لما تم افتتاحة لم يقوموا بدعوة رئيس الوزراء وبعد كدة حصلت المشاكل مع الحى مع انهم طالبوا بسفلتة الطريق ولكن لا حياة لمن تنادى مع انهم اخذوا تصريح من جهاز مدينة 6 اكتوبر لكن للاسف !!!!!!

ثانيا:الايجابيات ....
1- كان ميعادى 10,30ص كنت خارج 12,30 ظهرا مع ان انا كنت بعمل صيانة ال40000 كم ؟؟؟؟؟ المواعيد تحفة
2- الناس هناك زووووووق جدا جدا لقيت المهندس اللى استلم العربية بيقولى انهم لقوا مساعد جايب شوية زيت فقالى انهم غيروة فى الضمان
3- المكان تحفة بجد وشيك اوى زى مالاخ ابو عبداللة صورة فعلا الصور بتتكلم
4- فى بلاى استيشن + انترنت لان والحاجة الجامدة برضة ويشكروا عليها ان اى حاجة بتطلبها من الكافتيريا سواء مشروب سخن او بارد او بسكويت كلة ببلاااااااااااااااااااش مهما طلبت زى مانتا عايز
4- قطع الغيار ؟؟؟؟؟؟ تخيلوا انا طلبت حاجة "قطعة غيار" غريبة شوية وعارف ان انا مش هلاقيها " الذراع اللى بيطلع ظهر الكرسى للامام والخلف ..كان مكسور توجهت لمندوب قطع الغيار وقاللى انة فعلا مش موجود بس همة هيبعتوا يجيبوا من برا وهيوصل بعد 15 يوم دفعت النصف ثمنة والباقى لما استلمة وكان سعرة 85 جنية شامل ضريبة المبيعات
بجد التوكيل فى ابو رواش ممتاز ومحترم وايجابياتة اكتر بكتير من سلبياتة واتمنى منهم التقدم عالطول وربنا يوفقهم فى تلبية جميع احتياجات العملاء...وشكرا