الموضوع: حوار هادئ عن ماركة بروتون

استاذ توت انا اسامة متهيالى انا من الناس الى خدت رايك من الاول فى العربية بس انا هقولك عن تجربتى بعد سنه مع الجين 2 و 25000 كيلو بين سفر و داخل المدينة .
العربية ماشاء الله زى الفل رغم انى بشتكى من مشكلة التكييف الى محدش عارف يحلها بس لو تكلمنى عن الطريق لاما شاء الله
و عاوز اقول للناس جميعا انا عندى اصدقاء معاهم ميجان و معاهم النترا
و الله فى اول سنه كلهم غيروا حجات ما بين علبة دريكسون و ما بين حاجات تانيه.
بس المهم ان كل الماركات فيها مشاكل بس عشان احنا مركزين مع ماركة جديدة بنفكر فى كل العيوب الى فيها مع ان اننا نسنا الماركات الكبيرة .
و برضه يا جماعه بعد اذنكوا حد يقولى اشترى ماتريكس 100.000 الف
مفيهاش اى حجاه فى الدنيا من السيفتى و لا الثبات على الطريق وده عن تجربة سفر مش كلام ولا اجيب جين 2 .
بس ياريت التوكيل يهتم بينا زى ماحنا مهتمين بالعربية
و يا استاذ توت اعمل الى عليك و توكل على الله فى خدمه الناس لان الاجر عند الله مش عند التوكيل ولا ااعضاء .

موضوع جميل جداً .. وشكر خاص لأستاذ توت

بس سا جماعة إنتوا مش واخدين بالكو من حاجة مهمة جداً ... إنتوا بتتكلموا مع مين ( the Consumer ) معظمهم وإن ماكانوش كلهم من الشباب واللي أكتر حاجة بيهتموا بيها العربيات

بمعني إنهم كلامهم كتير وإنتقادات كتير عليها عشان الفئة دي من المستهلكين بتهتم أوي بأدق تفاصيل السلعة المعروضة مع الإستخدام الرياضي القاسي

لكن لو جينا شفنا عربيات تانيه زي ال لانسر مثلا هتلاقي الناس بتشكر فيها وطالعين بيها السما .... بس تعالوا نشوف مين اللي راكب ال لانسر معظمهم أو نسبة كبيرة منهم فئه عمرية مختلفة تماما مطلبهم من العربية إنها تمشي وخلاص وتكون ناعمة و مش فارقة معاه حاجات تانيه

بالإضافة إنه مش هتسمعوا صوتهم لأن نطاق الفئة دي مختلف عن الشباب ... والتواصل من خلال الحديث عن السيارات والمنتديات

علي سبيل المثال منتدي نايل موتورز أعتقد إن هنا هنلاقي الفئة العمريه
الموجوده علي المنتدي معظمها شباب

من الأخر ملخص الكلام ده ( إن الشباب بتتكلم كتيييير ) مش زي واحد عنده ٤٠ أو ٥٥ سنة ( عنده إهتمامات مختلفة ) مش هيقضي حياته في الكلام عن العربيات

وزنا في الأخر في رأيي إن العربية مناسبة لثمنها إلي حد كبير جداً بالمقارنة بالسوق


وربنا يبارك لكل واحد في عربيتة ... وشكراً لأستاذ توت علي الموضوع الجميل ده

والله يا توت انا باحمد ربنا دايما على توفيقى لشراء هذه السيارة دون غيرها , فعلا العربية دى تستاهل اكتر من تمنها , عربية رائعة بكل المقاييس , قوة موتور و اداء رفيع , شياكة و عصرية بالداخل و الخارج , و انا قبل ما اجيبها كنت باقارن ما بينها هى و النيو اكسنت و الاوبترا و السيراتو , بس بعد ما اشتريتها ايقنت انها تتفوق على كل هذه السارات بمراحل , ده كفاية يا راجل الثبات الرهيب للعربية , حاجة مش معقولة فعلا , اقسم بالله كنت راجع من الاسكندرية بوم الاحد الماضى صباحا , و عاوز اوصل الشغل فى الميعاد المضبوط و الوقت كان بدرى لسة مفيش رادار قمت فاتح على 150 او 160 , بعد شوية فوجئت بوالدتى بتقولى " محمد انت بتسبق العربيات التانية , تبقى اكيد عديت المائة كيلو فى الساعة " , يعنى حتى اللى راكبين معايا مش حاسين بقلق و لا حاسين ان العربية بتجرى جامد , ربنا يبارك لنا كلنا فى عربياتنا و يقينا شر الطرق .
و بعدين انا استعجبت من انى كنت بقارن بالجين2 بالنيو اكسنت , ده لا وجه للمقارنة مطلقا , الجين 2 فين و الاكسنت فين , الحاجة الوحيدة اللى تتفوق فيها النيو اكسنت هو صوت الموتور , و حتى النقطة دى صوت الجين2 جميل و يديك احساس بالقوة المفرطة و انك راكب عربية سباق .
و انا باحسدك على اهتمامك بعربيتك و على مواضيعك المميزة جدا اللى بتخلى الواحد ميفكرش يعمل اى موضوع علشان مش هيقدر يخش المنافسة .

فى الأول أحب أشكر القائم على المشاركة والأخوه الذين قاموا بالرد أنا من الاسكندرية وأمتلك السيارة جين تو2 وكنت من أول الناس اللى استلموا العربية يعني فى شهر مايو الجاي هقفل 3 سنوات ما معشوقتي الجين2 العربية من وجة نظري لا تقارن بالنسبه لسعرها وبتك على بالنسبه لسعرها وكمالياتها مع أقرانها من السيارات الأخري وبصراحه العربية معايا زي الفل ولم تظهر فيها أي حاجه غير حجات عادية ممكن تعدي يعني مثلاً صوت الكنبه ده ما انت برضو شوف راكب عربية بكام مش مرسيدس والفوانيس الأمامية اتعطل المتور بتعها صوت المتور عالي شويه خرطوم التكيف اتخرم عشان جنب الفرن ممكن تحصل لأي عربية يعنى مثلا كان معايا هونداي قبل الجن تو بعد ما استلمتها بشهر غيرت طلمبة البنزين وهيه زيرو طبعا ديه لوحصلت مع البروتون الدنيا تقوم وماتقعدش بلاش هيونداي فى أحسن من شركة مرسيدس مع والد واحد معرفة جابت متور فعلا بعد 20 ألف كيلوا ( مش عيب سواق ) بس بتحصل حجات مع أي ماركة بس تعليقي الوحيد على العربية واللى فعلا كنت هكره العربية بسبه الوكككككككككككككككككككككك ككككيل:k17: يعنى فى رأي هوه ده عيبها من غير دخول فى أفلام الوكيل وتجاربي معاه عشان معملش دعاية سيئة للعربية

انتا كده أصبت تماماً في الموضوع ده عشان انا فعلاً كان عندي ماتركس 2008 و كانت لسه جديدة بس مش عايز أقولك فعلاً انها عربية تعبانة جداً و متستاهلش الإنتشار الكبير بتاعها في الشوارع والله بستغرب العربية دي ليه عليها أقبال كبير كده المهم انا لسه من كام يوم مغير العربية دي و بدلتها ب جين 2 2009 و مش عايز أقولك اد ايه حسيت بفرق رهيب بسم الله ما شاء الله يعني احسن بمراحل و كأنك راكي عربة بفئة أعلى منها بمراحل مع ان الجين 2 أرخص من الماتركس و انا على العموم مفيش حاجه اضيفها كتير بعد الكلام اللي حضراتكوا قولتوه عن العربية و عشان انا كمان لسه مكملتش اسبوع بيها بس إنطباعي الأول إنها مفيش ليها اي منافس في الفئة السعرية دي و كمان العربيات الكوري كلها وحشة جداً و عن تجربة لموديلات كتيرة منها فا بجد اي حد معاه العربية دي بقولوا ألف مبروك عليها و على حسن إختيارك ليها و إن شاء الله مش حتندم