مشكلة في الاكسنت 2000 1500 سي سي

**yahiaa1011** · 20-03-2009 04:19 PM

عندي حاجة غريبة عداد الاربي ام بيوصل لواحد و نص و العربيه واقفة منغير لما ادوس بنزين و ساعات بيرجع طبيعي لوحدو و العربية بتنتش علي السلانسيه ولما رحت التوكيل كشفو علي الحساسات بالكمبيوتر وقالولي انها تمام و انا حاسس ان في حساس بيعلق بس مش عارف انهي واحد والكلام دا ظهر بعد لما غيرت السيور و سير الكاتينة هو ممكن دا يبقي بسبب البوجيهات ولا ايه ارجو الرد علشان هتجنن

**samirayad** · 20-03-2009 06:08 PM

فعلا فيه عندك حساس بيعلق ....ومش حيخللى لمبة الأعطال تنور ولا حاجه .....والمفروض كانوا قاللولك عليه.......ألا وهو حساس وضع الخانق tps sensor .....وافضل واسهل حل دلوقتى ...تنظيف البوابه مع تحريك الأكسراتير لتليين البوابه .....وبرضه زى ما بتقول شوف حالة البوجيهات (وقولنا على الوضع واللون وفيه لون لمعه عليها ولا لا ).......وبرضه عاوزين برضه نعرف موقف أستهلاك الزيت عندك وسحب العربيه وشكل العادم .........................

**yahiaa1011** · 20-03-2009 09:32 PM

شكرا علي اهتمامك يا هندسة بس انا السحب عندي سعات حلو و سعات لا و الزيت و العادم تمااااام

**samirayad** · 20-03-2009 09:38 PM

واسهل حل دلوقتى ...تنظيف البوابه مع تحريك الأكسراتير لتليين البوابه

يبقى دى أول خطوه يا أستاذ/ يحيى ......وممكن يجىء الخير من هنا......ومتحتجشى تغير ال tps ....أن شاء الله

_ وبرضه أطمن على البوجيهات وقوة الشراره اللى رايحلها من البوبينا وتكون للأربع بوجيهات بنفس القوه............

**yahiaa1011** · 20-03-2009 10:44 PM

انا بتقل عليك يا باشا بس عايز اعرف ازاي أطمن على البوجيهات وقوة الشراره اللى رايحلها من البوبينا وتكون للأربع بوجيهات بنفس القوه دا عند الميكانيكي ولا عند مين ؟

**samirayad** · 20-03-2009 10:51 PM

المشاركة الأصلية كتبت بواسطة yahiaa1011

انا بتقل عليك يا باشا بس عايز اعرف ازاي أطمن على البوجيهات وقوة الشراره اللى رايحلها من البوبينا وتكون للأربع بوجيهات بنفس القوه دا عند الميكانيكي ولا عند مين ؟

البوجيهات حتتحل من المكنه وينكشف عليها.......وقوة الشراره (حيتم حل كبل كبل والمكنه شغاله ).......والموضوع فى منتهى السهوله وياريت تخللى ميكانيكى اللى يعملك الموضوع ده طالما مفيش سابق خبره (علشان الفولت بيكون عالى جدا اللى رايح للبوجيهات .....وطبعا أحنا خايفيين عليك يا يحيى باشا )

**kemks** · 21-03-2009 07:26 AM

المشاركة الأصلية كتبت بواسطة yahiaa1011

عندي حاجة غريبة عداد الاربي ام بيوصل لواحد و نص و العربيه واقفة منغير لما ادوس بنزين و ساعات بيرجع طبيعي لوحدو و العربية بتنتش علي السلانسيه ولما رحت التوكيل كشفو علي الحساسات بالكمبيوتر وقالولي انها تمام و انا حاسس ان في حساس بيعلق بس مش عارف انهي واحد والكلام دا ظهر بعد لما غيرت السيور و سير الكاتينة هو ممكن دا يبقي بسبب البوجيهات ولا ايه ارجو الرد علشان هتجنن

انا معايا نفس العربيه اول لما تدور الصبح بس بتوصل ل 1.5 و ينزل علي طول كده مفروض انه عادي
اللي مش عادي انه يوصل لغايه ال 1.5 او 2 و مينزلش غير لما تدوس بنزين

يبقي في عيب في التشوك او بيعلق

و المهندس سمير جبلك المفيد اكشف علي البوجيهات و مفيش مانع تخلي الميكانيكي يفكلك البوابه و ينظفها بس هات معاك منظف البوابة و انت رايحله متخلهوش ينظفها ببنزين ولا جاز و هتفاجأ بالطين اللي نازل من البوابه و هوا بينظف البوابه هيفك برضه التشوك و ينظفه

و شكر خاص لمهندس سمير علي الافاده ما شاء الله جميع المواضيع اللي بيشارك فيها يعطي افاده للكل